BANSA PENAN – BENUNG KIRUH NGENANKA RAMPA KAMPUNG KITAI (SEBENGKAH TANDA PUJI NENGAH FILEM)

Bansa Penan nya sebengkah bansa asal ti nyelai nguan kampung di menua Sarawak. Mayuh bansa asal bukai udah ngentapka pendiau diri ba genturung pendiau ti meruan di sebelah menua pesisir kenyau ari beratus-ratus taun ti udah, tang bansa Penan mengkang idup bepindah-pindah
Enggau ngembuan perengka idup ti rumpas sereta enda ngeribat, sida enda irau ke sebengkah-dua nya lenyau, tang sida balat bepanggai pengidup ba rampa kampung. Nya mih kebuah bansa sida nya bebendar ngenanka rampa kampung ti endur sida beridup awakka enda dikeruga kompeni kayu kampung ti rangka sereta ngena pengasar.
Taja pan baka nya, kitai enda tau ngumbai bansa sida nya bansa ti agi tinggal arus pemansang ari kitai. Sapa kitai ti agi ngembuan runding ti sempit baka nya, enda tinggi IQ lalu semina ngira pengidup nya enda tau enda betuanka duit ringgit.
Bansa Penan nemu pemesai reti enggau rega rampa kampung Borneo tu, sebengkah rampa kampung ti pengambis tuai di dunya tu. Enti Taib enda kelalu amu sereta rangka, ngila diri deka kaya raja, iya tentu lama udah ngambi kira pemesai reti kampung nya tau nyadika pun penatai ubat-ubat, DNA, dagang temuai, pelajar saintifik enggau reti-reti ti bukai dalam kandang menua tu ti endang ditemu mayuh ngembuan pengeraja asal ti berega tinggi.
Taib udah ngubah kampung puang ti udah dikelitika iya nyadi rampa kampung bekayu sebengkah aja, ti endur tanah deka udu tusur lalu tau bebali nyadi padang pasir. Taib mega ngubah sebengkah ari dua bengkah ‘lempuang’ dunya tu, rampa kampung ti besai ti nyadi ke pun penatai ai ngagai angin kitai lalu nyintak gas karbon dioksida ti tau nganu nyawa, nyadi sebengkah penanggul Pengangat Dunya.
Bansa Penan mereti bendar ke semua utai tu, taja pan sida enda mayuh bepeluang besekula, lalu sida mengkang rinduka pemanah rampa menua enggau semua bansa pengidup dalam nya. Tang Taib sekali ke enggai mereti, tauka udah rabun laban duit, iya endang enda ibuh.
Penan enda mudah deka nyerahka diri
Nyentuk ke diatu bansa Penan agi ngenanka rampa kampung endur sida beridup, lalu enggau nya mayuh pendiau sida udah kena keruga Taib enggau bala apek bayat ti diupah iya. Mayuh agi bansa asal ti bukai udah dikeduan sereta dikeruga pendiau, tang bansa Penan tu mih di nyau majak kurang ba pemayuh tubuh.
Taib udah enggai meri basa ke pengambis mimit ke sida, tauka nagaka sida kandang rampa kampung ti enda bangat besai. Bala menteri iya udah kala direkod bejako madahka kandang rampa kampung endur Penan beridup nya enda tau enda ditebang. Tu deka nyadika siti kebuah orang siku tu tau didawa ngena penyalah ngemunaska raban bansa enti udah datai ba maya iya deka dipechara jemah ila.
Pekara ti ngasuh kitai teguran nya penyumbung orang siku nya ketegal iya udah melakangka tanggungpengawa iya ti nyadi Kepala Menteri ti ngemataka undang-undang menua tu dipejalaika enggau lurus lalu nagang sebarang penyalah tauka penusah nuntung sebarang raban bansa. Mayuh bendar repot udah digaga pasal indu bansa asal tu ti kena pasung lalu dipenyati, tang Taib lalu enda ibuhka penanggul nya.
Baka ke udah-udah, raban polis endang diasuh enda mendingka repot atas pengasar ti dikereja bala tauke ti bekenanas ngulihka kayu kampung – ti bekunsi dagang enggau Taib. Pengawa sida mega muru bala orang bansa asal ari rampa kampung ti diuan sida nya.
Baka nya mega, lebih 30 taun Taib udah bebendar ngulihka pengeraja ari ti betebangka kayu kampung menua Sarawak, tang bansa Penan mengkang nadai udah bulih penguntung mimit, taja pan Kepala Menteri nya seruran begendangka leka jaku “maju” enggau “pemansang”.
Ngelama tu Taib lalu nadai udah ngayanka pengiruh iya ngaga kad pengelala tauka sijil pengada ke mayuh agi bansa Penan, awakka sida ulih sama enggau raban bansa bukai nyepi penyamai buah pemansang dalam menua tu. Semina mimit aja bala sida Penan tu udah bisi hak enggau orang ngundi, sebengkah ari pekara demokrasi ti seruran dipegendangka iya, taja pan ukai pekara ti tau dipuji.
Taib endang nemu raban bansa Penan deka ngelaban iya ba maya muai undi, nya kebuah iya madahka bansa Penan ngenyauhka diri ari iya tauka bala pemesai-pemesai perintah ti deka ngaga ke sida kad pengelala enggau sijil pengada.
Tang enti Taib begigaka pun kayu ke deka ditebang dalam puak kampung din, nadai penanggul mimit ba iya.
Filem tu ngayanka penerang ke raban bansa Penan ti benung kiruh ngenanka pengidup sida sereta mega dikena ngamatka semua macham berita ti udah ditusui dalam Sarawak Report ngelama tu.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments