Utang Enggau Goldman Sachs Ba Penyampau US200 Juta Dikena Ngeluarka Bon 1MDB!

Sebengkah ari nama ti tampak di belakang pengawa dagang ti ngasuh mayuh orang tekenyit ati

Sarawak Report deka narit perati bala pengemata pekara belanja menua US bekaul enggau bayar ti dikumbai kelalu besai dikena meli bon di menua tasik, ti diatur sebuah bank ti tebilang di menua nya.

Atur-atur ti dirintaika dalam surat peminta ngambi bagi nya bisi disimpan kami nya udah ngayanka pekara ti udu dikutuk ketegal dikumbai udah dikereja enggau chara belalai.

Pengawa jual-beli bon tu, ti bisi bekaul enggau pengawa ngangkatka US$1.75 billion bon dikena meli sebuah kompeni pengeluar kuasa elektrik enggi siku ari kroni BN, Ananda Krishnan, udah bisi dikeluarka dalam bulan Tiga 2012 ulih kompeni 1Malaysia Development Bhd (1MDB) ti betuaika Menteri Besai Najib Razak.

Bala penyamin nya bala pemayar chukai enggau kompeni International Petroleum Investment Company (IPIC) enggi perintah menua Abu Dhabi. Pekara ti udu dikutuk mensia mayuh nya pengawa meli kompeni Tanjong Energy, enda diperesa enggau silik lalu mar bendar ungkus, ti udah meri untung bebillion-billion ringgit ngagai siku kroni BN, Ananda Krishnan.

Peminta ari GSI – surat peminta 1MDB nengah Labuan

Agi bisi mayuh jaku tanya bekaul enggau pengawa ngeluarka bon nya empu, ari cara ngatur iya ti nyengkaum bon ti dipelanja ngena duit mensia mayuh ngena ungkus ti besai bendar. Selampur pekara nya udah dikereja bank US GSI nya nengah Labuan, lalu ukai ba dagang tebuka.

Lebuh Financial Times tetemuka pengawa jual-beli tu, sida ngumbai atur tu “sebengkah dagang bon-dollar pemadu besai di Asia” lalu dagang nya nyau deka “telepas ari ti ditemu mensia mayuh”.

Pengawa dagang ti nyau deka enda ditemu mensia mayuh, tang udah nya berita nya ayan ba skrin bala orang dagang

Sarawak Report diatu ulih ngayanka aspek-aspek ti nyelai dalam dagang tu, baka ti digariska dalam surat peminta ti asal, ti endur kami mega bisi ngembuan siti salin iya.

Bon-bon ti dikeluarka nya ukai semina berega kelalu tinggi ba bungai duit, 5.99% bebanding enggau 3.59% baka ti ditikika ba industri-industri baka Petronas, tang fi ti dipinta GSI enggau ungkus bejalaika pengawa “ti dipelalaika” nya kelalu tinggi.

Nitihka penerang dalam surat peminta sida empu nya, sepenyampau US$196,200,000 udah diputung dikena nyadika “fi sekeda pekara, sekeda komisyen enggau belanja-belanja bukai” – ti nyau deka manggai US$200 juta.

 

Semak US$200 juta udah diputung nyadika “fi enggau komisyen enggau belanja bukai”!

Ngelama tu perintah Malaysia enggai napi tanggungpengawa ngagai rumah parlimen, ti endur mayuh bendar jaku tanya udah dipansutka bekaul enggau pekara tu enggau duit injau ti bukai ti nyelai-nyelai. Kami arap bendar ke duit injau tu udah terengkah ba jari bala orang ti ngemataka pengawa nyali duit nya ari menua US ngambi ke meresa bank i bisi kaul terus enggau tu.

GSI udah nyadika bank ti dipilih ngatur pengawa jual-beli semua bon tu, ti udah napi mayuh jaku bantah mensia mayuh laban ngereja pengawa dagang enggau chara belalai.

Semina 3 hari sebedau PRU13 dia bala kaban parlimen penyakal udah tekenyit enggau siti penerang ti madahka pasal sebengkah penyampau duit injau perintah ti besai bendar udah diatur ngena chara ti sama. Atur pengawa nya dikena ngeluarkan tanggam bon bepenyampau $3 billion (lebih kurang RM9.3 billion) mega ditikika GSI ngarika 1MDB.

Kaban parlimen penyakal Wong Chen sekali agi udah madahka diri tekenyit ke pemesai bunga duit duit jali nya ti kelalu tinggi lalu “lebih bayar” ngagai GSI ba penyampau US$71 juta nyadika fi atur pengawa dagang nya.

Engka utai ti lebih ngasuh ati irau dalam kes nya iya pemuntan Menteri Besai/Menteri Pekara Belanja Menua, Najib Razak, ti ngangkatka duit injau ketungkah PRU13 nya nengah 1MDB, ti kenu ku iya ditumbuhka dikena beranakka puku dagang ba pemansang perengka beteknologi tinggi ke menua Malaysia.

BN udah nya enggai nimbal berita angin ti madahka 1MDB udah beranakka puku dagang RM7 billion di Genturung Pulau Cayman. Sida enggai kiruhka penyampau dagang ti kelalu besai nya ti dijamin menua Malaysia nya.

Semina ba minggu nyin kemari 1MDB bisi mansutka penerang ti madahka sida udah mujur meli sebuah agi pengawa dagang ti kelalu mar, ke sekali tu iya dikumbai sekeda orang nya penyelamat ke sebuah kompeni kroni lalu ukai dikena ngulihka dagang kunsi beteknologi tinggi ti tau pulai ke penguntung Malaysia.

Bebelanja baka Taib di Malaysia?

Enggau cara ngangkatka bebillion-billion dollar nengah bank di menua tasik Najib Razak dipeda nunda chara “CEO” Sarawak, Taib Mahmud. Taib bisi ditemu udah ngangkatka mayuh bon nengah Labuan dulu ari tu.

NGO rampa menua Global Witness udah narit perati mensia mayuh ngagai sebengkah isu bulan Lima nyin kemari, ti betanyaka peniki bon ti patut dikena melanja pengawa dalam SCORE. Ba kes tu pengawa nya bisi kaul enggau bon US$1.6 billion ti ditikika nengah Labuan enggau dibantu GSI.

Nitihka surat-surat peminta sida, fi ti dibayar ngagai bank nya manggai US$10 juta, jauh tinggi agi ari nyawa bungai duit jali ari pengawa ngeluarka bon ti biasa.

Bon-bon ti sebaka mega udah ditikika nengah Labuan ke menua Sarawak dulu ari tu, ti dikumbai raban orang ti landik ba ekonomi nya sebengkah pengawa dagang ti nyelai dikena menua sebengkah-sebengkah nya nambahka duit awam sida.

Dalam taun 2005 suba UBS enggau Duestch Bank udah ditemu nikika US$600,000 juta ngena chara dagang bon baka tu.

Kenapa tidak menggunakan pasaran terbuka yang mengenakan kadar faedah yang jauh lebih rendah? Nama kebuah enda ngena dagang tebuka ti begunaka bunga duit jali ti baruh agi?

 

Pekara ti balat ngerugi dalam pengawa dagang bon belalai tu nya bunga duit jali iya jauh tinggi dipinta bank-bank nya. Kami deka betanya, nama kebuah Kepala Menteri Sarawak ti mega nyadi Menteri Pekara Belanja Menua Sarawak udah milih chara ti mar baka tu dikena ngulihka belanja dikena ba projek-projek iya, taja pan mayuh bendar bank ba dagang tebuka endang besedia deka ngena bayar fi ti murah?

Taib enggau Najib udah enda bemunyi ba pekara tu lalu sida udah nuduh raban penyakal ngemesaika berita bula ti madahka bisi ‘peniris’ nyadi dalam bajet pemansang menua Sarawak, ti endang sengaja digaga enggau chara belalai, lalu patut bendar endur raban penerit-adat menua ngambi tindak ba seduai.

Ba undang-undang Pengawa Nagang Makai Suap US, perintah US udah nawa beberapa iti kompeni korporat enggau bank ti udah ditemu puntan bejalaika pengawa sida enggau betul tauka bulih bantu ari piak bukai ngereja penyalah korup.

Raban penerit adat di Switzerland mga udah chakah bejalaika pansik sida ba penyalah-penyalah UBS ngena undang-undang ti sebaka. Lalu raban penerit adat di menua German mega udah mansik kaul Duestch bank enggau Kenanga holdings, iya nya sebengkah kompeni beranakka puku dagang kunsi ti bisi kaul enggau kompeni CMS enggi sida Taib sebilik.

Kami deka meri tuduh penemu ngagai raban penerit adat menua di Malaysia ngambika sida meresa siri-siri dagang ti diatur di Labuan, ti udah ngujungka utang ti mayuh dilempaika ba bau rakyat menua Malaysia. Bala pemayar chukai bisi kuasa ke penampak ba pengawa dagang.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments