‘Mutarka Penanggul Chara Sarawak’ Najib

Najib begunakan Adenan ngambika jampat-jampat ngatur bepilihbesai di Sarawak – deka tauka enggai Adenan ningaka jaku ansar nya?

Najib begunakan Adenan ngambika jampat-jampat ngatur bepilihbesai di Sarawak – deka tauka enggai Adenan ningaka jaku ansar nya?

Udah bekau tepagang dalam pengelama beberapa minggu dalam tanya pasal skandal 1MDB ti enda ulih disaut iya, diatu Najib belabuh ngatur chara ‘mutarka ngena chara politik’ dikena iya napi penanggul-penanggul ti endang datai ari iya empu.

Pemeri penerang ari dalam madahka atur nya dikena ngansak pengawa bepilihbesai diatur enggau lengkas di menua Sarawak ti endang dikarapka BN tau menang dikena meresi nama Najib empu.

Nyerumba nya, kenyau ari beberapa hari ke udah bala penyukung Menteri Besai nya mayuh ngembuan pendiau ti ngumbai diri enda nemu pasal pengelenyau beratus ribu juta ringgit ari wang turu 1MDB, ti endur sida ngeluluka diri enda ulih nawa iya.

Sida madahka ngagai orang mayuh nya nadai penanggul enggau penimpang dalam wang turu nya laban semua penerang ti bisi diayanka nya bula sereta pelesu memagang.

Nyerumba nya mega sida mansutka sara penemu sida ti besakal madahka pengawa enchuri duit ti baka nya kala udah dikereja orang siku beberapa taun ke udah lalu nyadika sebengkah penyalah, nya alai nama kebuah orang mayuh diatu patut kiruhka pasal penanggul dalam 1MDB nya?

Ke bendar iya sida enda ibuh sekali ke sida nya bejaku ngerichau tauka ngeligau ke bukai, amat mih bisi orang ta arapka sida, enggau sapa ke enda, enda ulih ngereja sebarang pengawa.

Chara ti bukai sekali agi dikena nerangka pekara ti ngambika nya nyadi mar agi diperundingka, betuju dikena ngasuh orang mayuh saru runding pasal pengawa enchuri ti mudah udah dikereja.

Di luar, USD$1.19 billion ari wang turu nya udah ‘diperanakka’ dalam dagang kunsi 1MDB PetroSaudi, nengah tanggungpengawa Menteri Besai. Tang kelimpah ari ti dipasukka ngagai bup akaun dagang kunsi nya, duit nya udah dipasukka ngagai akaun bank Zurich ti bukai enggi Kompeni Good Star Ltd, ti dipegai siku bakih dagang ti rat bendar kaul enggau Menteri Besai Najib, Jho Low.

Pooofff – diatu duit nya udah lenyau pia aja!

Nyau deka setengah ari duit nya bisi ditemu nyadika bayar ari akaun bank Zurich enggi Good Star Limited dipasukka ngagai akaun enggi Jho Low di BSI di Singapura.
Laluh duit ke bukai nya tentu deka ditemu enda lama agi, enti atur penyalah ngelenyauka duit entara menua deka dititihka menua-menua yi nyadi kaban sereta mega opis-opis penerit undang-undang di menua sida.

Udah bekau pengawa ngenchuri duit ari wang turu nya dikereja enggau mudah, Menteri Besai enggau wang turu 1MDB ti mega dibantu raban juru audit ti kabur-kabur udah nguji ngeluluka penerang pasal duit ti lenyau nya udah dibayar pulai ke menua Malaysia lalu nadai sesen pan semua duit nya lenyau baka ti kena tuduh orang mayuh.

Sida mega udah mansutka beberapa iti jaku ambu ti nyelai-nyelai madahka duit nya udah ditanka lalu udah nya diperanakka, belabuh ari akaun resia di Pulau Cayman lalu bepengujung di Singapura (ti dituduh diengkahka ba pampang bank BSI ti sama enggau endur akaun bank enggi Jho Low – udah nya siku staf pampang bank nya lalu ‘ngambi pemisi panjai’ udah bekau penanggul 1MDB nya nyadi dalam bulan Mac).

Tang 1MDB mengkang nadai bulih akses ‘duit tunai’ tu, taja pan dikena ngelepaska kompeni nya ari mayuh agi lenyau duit, ti tau bendar ngasuh malu, ketegal enda tebayarka utang ti udah kelalu mayuh nya.

Lalu bala penerint undang-undang di Singapura diatu udah terang bendar madahka nadai sebarang duit dalam sebarang akaun munyi ti dituduhka nya.

Kada enda semua duit nya udah dicuri dulu agi?

Abdul Gani Patail, Kepala Lawyer bansa udah enggau terang madahka ‘Nadai sebarang tindak udah tu’.

Abdul Gani Patail, Kepala Lawyer bansa udah enggau terang madahka ‘Nadai sebarang tindak udah tu’.

Najib enggau bala penyukung iya udah ngaga simpul ke chara sida ulih pansut ari tanggam penanggul 1MDB iya nya terus ngelekaka lalu bebula ke semua utai ti enda ulih dilalaika, kelimpah ari ti kuang-kuit, kul-kili, kin-kitu bejaku rauh-rauh, durah-durah, ngayanka pengering diri dalam pengawa politik (ti begunaka mayuh agi duit menua).

Ke bendar iya, Menteri Dalam Menua udah madahka nya raban polis udah nembuka pansik sida ba bulan Mac suba lalu nganjung repot asil pansik sida nya, Diatu pansik ba 1MDB nya udah ditutup. Nadai agi kes.

Nyerumba nya mega Lawyer Bansa udah tepejal nerima fail ke baru-baru ditambahka ngagai dunjung fail repot penyalah ti lama udah dia lalu nadai siku orang deka nanya saspek dalam penyalah nya, iya nya bakih dagang ke Menteri Besai, Jho Low.

Najib udah ngeluarka perintah ngambika bayar ba penyampau lebih satu billion dollar dipasukka ngagai akaun Good Star ti endur kompeni nya sebagi ari dagang kunsi 1MDB nya lalu udah nya iya madahka Good Star nya enda ulih ditetapka nyadi sebagi ari dagang kunsi nya.

“Tusah bendar deka ditukuka” Good Star nya dikemataka Jho Low, taja pan lebih setengah ari duit nya udah mujur ditemu raban penerit undang-undang Singapura, dipasukka dalam akaun enggi Jho Low dalam bank BSI di menua nya.

Repot ari menua Singapura nunjukka lebih setengah billion USD$ udah dipasukka ngagai bup akaun Good Star Limited lalu udah nya dipindahka ngagai akaun bank BSI enggi Jho Low

Repot ari menua Singapura nunjukka lebih setengah billion USD$ udah dipasukka ngagai bup akaun Good Star Limited lalu udah nya dipindahka ngagai akaun bank BSI enggi Jho Low

Pekara pemadu beguna ba Najib diatu nya ngambika tumpu perening orang mayuh diseliahka ari penanggul nya, laban iya mengkang enggai nyurutka diri enggau penuh basa ari penuduk iya ti pemadu tinggi dalam menua tu.

Iya deka ngaga ‘aku’ politik ti besai, awakka iya tau nempik dada iya empu lalu nyebut “Peda kita! Nadai siku orang deka kiruh, taja pan aku nyadi pengerusi wang turu ti lenyau duit ti mayuh, laban tu mih politik ke selama tu di menua Malaysia lalu bala pengundi aku mengkang rinduka aku ketegal aku ti udah ngangkatka pemanah pengidup sida”.

Tu mih kebuah Najib nyau gian nemuai-nemuai ngagai endur bukai (ngambika iya turs dipeda baka siku tuai menua ti pemadu tebilang di serata dunya) lalu nemuai ngagai menua Malaysia Timur ti seranta ti nyadika “simpan tetap” BN ti endur bala penyukung iya ti kaya-kaya di endur gaga bendar betemu enggau orang mayuh ti diupah datai ngulu pengawa nya.

Bedau lama tu udah, udah beka menua Sabah dituntung penusah tanah berenyang Najib ditemu nemuai ke menua Arab Saudi ngayan-ngayanka diri din. Iya dipeda baka ti enda ibuh ke penusah bala orang di menua diri empu.

Tang menua Sarawak mengkang dipilih ati iya laban lantang agi endur iya ngayan-ngayan ke diri, kelimpah ari iya ti nemuai lalu bejaku ba mua orang mayuh di menua-menua di Malaya din.

Ba minggu nyin kemari Najib udah nemuai ke Kuching, lalu ba minggu tu kena hari satu, iya sekali agi nemuai ke Sarawak ngena atur ti ngenyit – ke sekali tu iya nemuai ngenyit ke nengeri Sibu, Sarawak.

Pengerami ti diatur ngenyit di Sibu, ditambah enggau agenda Sarawak

Pengerami ti diatur ngenyit di Sibu, ditambah enggau agenda Sarawak

Sarawak Report bulih penerang ti madahka opis Najib udah merambu pengawa enggau atur ti besak ngatur tunga pejalai nyerumba Ulangtaun Merdeka ke-59 beberapa hari ke udah tu. Runding penemuai iya ke Sibu nya diatur enggau ngenyit minggu nyin kemari.

Bustari Yusuf (tengah) – rapat bendar enggau Taib, Najib enggau mega Adenan

Bustari Yusuf (tengah) – rapat bendar enggau Taib, Najib enggau mega Adenan

Pengerami nya dipromosika beberapa hari ke udah, bepanggai bendar ba sukung tulang enggau belanja ari Bustari Yusuf, siku orang dagang ari menua Sibu ti mega siku kaban politik veteran dalam parti PBB, ti endang rapat bendar kaul enggau Najib seduai Rosmah, ti mega nyadika pemelanja pejalai enggau penemuai seduai iya ke menua-menua tasik.

Bustari Yusuf mega nyadika siku penerima kontrak pemadu besai di menua tu, kelimpah ari menyadi iya empu, Fadillah Yusuf, ti udah disabung iya masuk politik lalu nyadi menteri kereja raya, ti mega nyadi bakih politik ke Adenan Satem empu.

Enggau nya, belanja dikena menteri besai nya ngenataika diri nya endang ditanggung Bustari – dikena iya malas budi iya ti udah mujur bulih kontrak ke projek Jalai Besai Pan Borneo. Iya mega nerima kontrak pemadu besai ba pengawa mekalka ubat di menua nya.

Annuar Rapaee

Annuar Rapaee

Bustari ti kaya-raja nya nyadika orang kuat Taib kenyau ari suba, ti mega nyadika Tukang Wang parti PBB, nyadika orang beguna ke Najib dikena ngayanka imej politik iya di menua Sarawak lalu dikena ngulihka jaku puji ke pemujur BN ba bepilihbesai ti deka diatur tu ila, ti endur iya mega siku orang ti ngansak Adena ngambika ngatur bepilihbesai enggau lengkas.

Orang dagang nya suah bendar dipeda nyempulang Najib lalu iya mega bisi nyempulang penemuai Najib ke Sarawak bedau lama tu udah, nemuai sereta betemu enggau Adenan beberapa jam sebedau Najib datai di Kuching ngambika iya bisi madahka Adenan pasal agenda penemuai Menteri Besai nya.

Tang Bustari nya ukai orang ti di[ilih rayat tauka bepegaika sebarang pengawa dalam perintah. Iya semina orang dagang.

Kerita enggi B Y lebuh penemuai iya ke Kuching bedau lama tu udah.

Kerita enggi B Y lebuh penemuai iya ke Kuching bedau lama tu udah.

Pengawa Najib ti deka ngansak Adenan ngasuh ngatur bepilihbesai tumu nya enda mar dipelaba.

Tambah mega semua parti penyakal di Malaysia Timur diatu dipeda lemi sereta tendu ba kaul enggau pangan diri. Parti di menua tu empu suah bendar ditagang lalu pun penatai belanja sida nyadika penekul ke sapa-sapa ti enda meri kerjasama enggau BN.

Udah bekau tuai penyakal, Anwar Ibrahim kena tutup dalam rumah jil ari atur Najib, raban penyakal nadai agi tuai ti ngempung sida nempuh kubu-kubu tegap enggi BN.

Lalu semua perengka perintah udah dikena ba tiap bepilihbesai dikena nentuka rayat di menua pesisir mengkang ngundi BN.
Adenan empu udah ngemas diri sekumbang ti nyadi kepala menteri lalu diatu iya deka dipeda orang ngenyauhka diri ari Taib, ba pengawa iya ti ngapuska penyalah makai suap.

Enggau chara numpuka perati iya ba bepilihbesai ti deka diatur sebarang maya ari diatu, Adenan majak merang penyalah makai suap dikena iya ngelumpuhka jaku serebana raban penyakal ngagai perintah menua.

Enggau nya, kita nyadang deka ngematakaka ‘Projek Sarawak’ dipejalaika.

Sebuah agi penemuai ngena bilun buah engkabang Najib nemuai ngagai pelilih menua ti dikerinduka iya di Sarawak

Sebuah agi penemuai ngena bilun buah engkabang Najib nemuai ngagai pelilih menua ti dikerinduka iya di Sarawak

Adenan deka ditekan ngatur bepilihbesai ti ngenyit nyerumba BN ngatur serang sida numbangka raban penyakal ti majak lemi sereta suntuk belanja, enggau chara ngulurka duit suap lalu ngemba-ngemba bala pengundi di menua pesisir baka ti ngelama tu.

Udah nya baru Najib deka ngumbai diri siku tuai ti pemadu dikerindu ke semua orang di Malaysia lalu iya mega deka enchabar sebarang sapa orang ti berani nyebut-nyebit iya kala enchuri duit ari wang turu menua.

Chara tu mih dikumbai orang mutar ke penanggul ti praktikal ngena chara politik.

Sekali ke Adenan besedia nitihka atur ari asuh Najib ti udah suntuk runding nya, deka ditemu kitai enda lama agi.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments