saham-saham ‘ANTU’ KEPALA MENTERI!
Siku orang ti agi mengkang megai saham ti pemadu besai dalam kompeni tunggal pemadu besai di menua Sarawak nya Laila Taib, baka ti bisi ayan dalam Ripot Taun kompeni ti endang dirintaika nyadi sebengkah kompeni awam.
Niang Laila Taib, iya nya bini keterubah Kepala Menteri Abdul Taib Mahmud, udah mati dua taun tu udah, ti udah nya ngujungka Kepala Menteri nya bebini kali kedua. Taja pan niang Laila Taib udah nadai agi, tang nama iya agi mengkang nyadi siku orang ti megai enda kurang ari 13 juta iti saham, iya nya disadang bulih 11.32% ari semua saham dalam kompeni nya.
Kitai patut meri ruang enggau awak ti chukup ngagai sida sebilik nanggam basa niang nya, tang Ripot Taun ti udah manggai dua taun nya kelalu lama endur bala sida ngerintaika nama niang Laila Taib nya nyadika siku ari bala orang ti megai saham ba kompeni nya.
Baka ni mih chara niang nya bulih saham ngemayuh nya?
Rakyat menua Sarawak bisi hak nemu baka ni niang Laila Taib bulih semua saham iya ti ngemayuh nya. Sida iya enda patut betegalka kompeni CMS nya udah kala diswasta ari sebengkah reta tengkira perintah Menua tu suba. Nambahka nya, semua duit bala pemayar chukai ti udah beturu dia bulih 8.19% ti nyadika sebagi ari semua saham dalam kompeni CMS nya. Semua nya bepanggai bendar ba pemutus penemu enggau runding laki Laila suba, iya nya Abdul Taib Mahmud, ti mangku pengawa nyadi Menteri Pekara Belanja. Enggau nya, tu mih maya ti patut endur nyerungkai sereta ngayanka pekara ti dilamun ngelama tu. Sapa ti bendar iya nyadi pemegai saham pemadu mayuh dalam kompeni CMS? Sekalika Kepala Menteri nya diatu benung nyadi siku orang ti penyambut semua saham baka ti kala di-will-ka niang bini iya nya? Tauka, sekalika Abdul Taib nya diatu nyadi siku orang ti ngatur pejalai saham-saham niang bini iya nya? Ngena kuasa politik iya nya, patut bendar iya nerangka semua pekara ti bekaul enggau tu.
Bebalutka pengawa ti berupai bendar
Nyau ka selampur kompeni CMS nya bebalut pengawa ti berupai bendar, ti endur Pengarah Urusan iya, siku rakyat UK ti benama Richard Curtis, mega nemu semua pekara dalam kompeni nya.
Curtis nya siku orang ti udah bulih pangkat “Dato”, tang, udah tauka bedau iya bulih basa ari pengawa ti dipangku iya dalam kompeni nya?
Niang Laila Taib nya ukai siku aja orang ti megai saham pemadu mayuh dalam kompeni CMS, tang sebengkah agi kompeni ti mega nyadi pemegai saham pemadu besai dia, iya nya Majaharta Sdn Bhd, ti diempu dua iku anak indu Kepala Menteri/Menteri Pekara Belanja/Menteri Pengeraja Asal enggau Perambu, iya nya Jamilah Taib enggau Hanifah Taib.
Anak lelaki iya dua iku ke bukai iya nya Abu Bekir enggau Sulaiman Abdul Rahman mega pemegai saham ti pemadu mayuh dalam kompeni CMS nya! Rega pasaran ke kompeni nya diatu manggai RM 300 juta, ti seruran bulih kontrak ti besai-besai ari perintah Menua tu ninting taun (terima kasih ke pemanah pemutus runding enggau penemu Abdul Taib Mahmud)
Enggau semua penerang baka ti diripotka di atas nya, kitai deka nemu enggau silik ari ni penatai semua saham ti bisi dalam kompeni CMS nya? Kitai enda tau enda ingat, Abdul Taib Mahmud ditemu kitai siku graduan ti ukai datai ari ruang bilik orang ti kaya-raja lebuh iya nembuka pelajar iya ba University of Adelaide di menua Australia. Sepemulai iya ari menua Australia menya, iya lalu bekerja ba Upis Pendakwaraya Menua Sarawak dalam pengelama dua taun, sebedau iya ngambi bagi dalam pengawa bepolitik. Laila mega datai ke menua Sarawak tu nyadi siku ari Raban Peace Corp Amerika lalu ditemu kitai mega ukai datai ari ruang bilik ti kaya-raja. Bala anak Taib enggau Laila endang benung besekula lebuh maya sida nerima saham-saham dalam kompeni nya, ti endur semua saham dia datai ari reta-tengkira Menua Sarawak tu.
Enggau nya, diatu terang bendar mih Abdul Taib Mahmud udah mujur ngatur runding ngarika Menua Sarawak ngereja program penswastaan atas semua reta-tengkira nya nyadika reta iya empu enggau sida sebilik!
Sapa mih ti endang pemegai mayuh agi saham nya diatu?
Ari iya ti enda mujur ngerejaka “will” Laila Taib, lalu ngagihka saham-saham dalam CMS nya, tau bendar ngujungka bala pemerati ngaga simpul penemu ti ngumbai pekara nya ulih ngemalu Kepala Menteri nya empu dudi hari ila.
Ngelama tu mayuh agi saham dalam CMS nya dipegai Laila enggau bala anak iya ngambika, ba penemu iya, ulih dikena iya nyeliahka diri ari ti ditemu opis SPRM, iya nya sebengkah opis Perintah Besai ti bejalaika penerit atur ba pengawa ngelaban penyalah makai-suap. Tang, udah tu ila kini penunga Abdul Taib nya deka ngengkahka semua saham nya. Tambah mega, diatu iya udah bisi bini baru, tang iya enda tau enda berundingka pekara-pekara bukai mega.
Taib nujuka timbak pistol emas iya ke langit udah iya ti ringat meda Ragat ti seruran pansut ari rumah!
Ulah enggau pendiau bala orang indu endang mar bendar diperagam. Anak Abdul Taib empu, iya nya Abu Bekir diatu benung mutarka sarak entara iya enggau bini dulu iya ba penyampau RM400 juta.
Sebengkah penerang ari dalam ruang bilik Abdul Taib empu endang nyebut Abdul Taib ngatur pengerami nikah iya enggau bini ke dua iya nya beguai-guai, lalu diatu udah iya jadi begulai enggau Ragat Al-Kurdi (ti mega siku ari kaban belayan Robert Geneid, ti ipar iya empu) endang udah nyadika indai dua iku anak! Tu sekeda ari cherita-cherita ti pansut sepengudah pengerami nikah siku Tuai Perintah Menua Sarawak ti ngena ungkus belanja ti besai bendar!
Dua iku melaki bini tu ukai semina jauh bebida ba umur seduai iya, tang mega bebida ba pengerindu enggau peneka. Bedau tentu lama tu udah, baka ti bisi ditemu Sarawak Report, Taib udah ngenyitka ati sida sebilik di Demak Jaya, ketegal iya ti nimbakka pistol emasnya ke langit, laban iya ti udah ringat meda Ragat pansut ari rumah enggau nadai minta pemendar ari iya dulu!
Enggau tu, kitai tau nyangka Abdul Taib tentu enggai nyerahka semua saham niang Laila nya ngagai Ragat. Tang, semua saham nya ila tentu deka diengkahka iya ba endur bukai!
Udah chukup maya semua nya dipulaika ngagai Menua Sarawak?
Abdul Taib Mahmud enda tau enda ingat jemah ila iya tentu deka ninggal ke dunya tu nitihka pejalai niang Laila ti udah dulu ari iya, lalu, semua saham iya nya enda ulih dibai iya. Baka ni mih menua Sarawak deka berasai sinu ngenang pengawa manah ti dikereja iya sekumbang iya ti agi idup tu enti sema iya udah milih ngereja pengawa enggau pengelurus lalu beterima kasih ke semua utai ti dikena iya, nyengkaum gaji enggau pencen menteri iya nya?
Dalam pengelama tiga puluh taun enggau nadai ngira ngulihka penguntung diri empu lalu mangku pengawa enggau ati ti lurus, perintah menua patut ulih meri penguntung ti beguna ke bala rakyat, tang baka ti dipeda diatu, tebal agi rakyat nya agi ditanggam pemerinsa dalam pengidup sida ketegal pengerangka iya. Ari ke diperatika orang diatu, Abdul Taib nyau baka ti enda ulih berunding enggau meruan agi ke nama utai ti patut dikereja iya enggau semua duit enggau saham ti ulih iya ngelama tu. Nya alai, nama kebuah mar bendar iya mulaika semua utai nya ngagai rakyat iya ngambi ke ari nya ulih dikena iya ngambi pulai basa ari rakyat sebedau semua utai tu nyau laun?