Diatu Sarawak Report udah ulih ngayanka kaul belalai entara pengawa industri kayu kampung ari Tasmania enggau petunggal Kepala Menteri Sarawak, iya nya Hamed Sepawi. Kaul nya ukai semina ngeruga pemanah rampa kampung di Tasmania tang mega benung ngeruga sereta mai pengerusak ngagai rampa menua di Borneo ti endur mayuh tekat hidro-elektrik deka terus digaga. Kami ulih ngayanka penerang-penerang pasal sempekat ti ditanggam ti endur kontrak ngaga tekat-tekat hidro nya dikereja Hydro-Tasmania, lalu berebak enggau nya ngulihka kayu kampung ti deka ampuh laban tekat-tekat nya.
Hamed Sepawi nya pemegai pemadu mayuh share lalu mega nyadi Pengerusi Eksekutif ke kompeni iya empu ti ngulihka kayu kampung, Ta Ann, udah dibai tama ke Tasmania dalam taun 2005 ngena sabsidi ti mayuh, dipelanja perintah Australia. Tang Ta Ann nadai meri penguntung ke Australia, semina pengerugi ti besai iya nya pengerusak ke rampa menua Tasmania.
Taja pan penanggul udah ditemu nyadi ba rampa menua sida empu, tang bala menteri di Tasmania agi bisi mega ditemu nyukung pengawa ngulihka kayu kampung menua sida, bebalut enggau penyalah makai suap, lalu enggai kiruhka sebana orang bukai ke lebih agi pekara bekaul enggau penusah pengerusak rampa menua di Sarawak ti dikeruga orang diri sebilik ti amu pengeraja.
Sapa bala samseng rampa menua ti bendar?
Sarawak Report deka nemu leka jaku ti betul dikena meri nama ke orang ti nyadi samseng rampa menua.
Enti nama nya dikena nerangka gaya sebengkah raban orang ti rinduka rampa menua, ti ngemba mensia mayuh ngena bemacham senyata, tu tentu nyelai ga didinga.
Tang enti nama nya dikena nerangka kuasa kasar dikena ngeruga rampa menua ti besai amat lalu meri untung ke mimit aja raban orang, tentu nama tu betul agi.
Diatu Ta Ann udah nyata amat bisi bekaul enggau pengerusak rampa menua, ti semina meri penguntung ke industri pengeluar kuasa elektrik ti betuaika David Crean ti kala udah nyadi menteri Tasmania. Ba taun nyin kemari anak kompeni Hydro-Tasmania, Entura, udah nanggam sempekat ngaga tiga buah tekat hidro-elektrik di Sarawak, ti endang sekeda ari atur dalam perambu Kepala Menteri deka ngaga 12 buah tekat ti berega tinggi di serata menua Sarawak dalam beberapa taun ti ka datai tu ila!
Tekat Bakun ti baru tembu, ti kedua pengabis tinggi di dunya tu, bedau tentu meri penguntung ti nyengala besai ke menua Sarawak taja iya udah digaga bebelanjaka duit turu orang ti pechen bebilion-bilion dollar. Pekara ti nyata amat dipeda iya deka semina meri penguntung ke sida Taib sebilik laban perambu tu endang udah digaga sekumbang 30 taun iya bekuasa. Kompeni sida sebilik, CMS, nya sebuah kompeni ti nguasa dagang simen di menua Sarawak, lalu semua bansa lesen endang dikeluarka mansa iya magang.
Diatu Sarawak Report ulih ngayanka penerang ba kaul entara projek ngaga tekat hidro ke Taib enggau Hydro-Tasmania. Pengarah ke projek ba Murum nya, Andrew Pattle, endang datai ari kompeni Hydro-Tasmania nya dalam bulan Lima 2010. Iya ke bendar, tekat Murum nya udah dikereja enggau chara belalai sebengkah kompeni ari menua China, iya nya Sino-Hydro dalam pengelama dua taun, nyentuk ke ngagai maya iya saru disebut ba sebengkah seminar ti diatur kompeni nya. Diatu projek nya dipejalaika nyadika sebagi ari projek SCORE ti kurang ba sebarang penyanding penemu ti meruan. EIA ti dipejalaika ba projek nya pan dipejuraika dalam sebengkah komiti ti betuaika Kepala Menteri empu!
Sarawak Report ngasaika endang patut rakyat menua Sarawak nemu enggau silik pasal pekara ti bekaul enggau ngaga tekat hidro-elektrik tu, taja iya endang ditemu ngeruga pendiau enggau pengidup mayuh bengkah raban bansa.
Kami minta penerang ti meruan sereta betul, laban enti projek tekat tu endang enda selamat digaga lalu diguna, tu mih ti deka nyadika projek nya dipejalaika bala samseng rampa menua!