Sarawak Report bisi bulih penerang pasal FBC Media, sebengkah kompeni pemerita diayanka udah kala ngambi bayar pampas bejuta-juta ringgit dikena ngelakuka Najib Razak, Taib Mahmud enggau sekeda kaban politik BN enggau tuai-tuai dalam kompeni kebun dandang besai sawit, dituduh muai semua bala pengereja pengawa iya enggau enda betimpuh.

Siku ari pengereja pengawa FBC Media ti kena ketuka ari kereja, bisi nulis surat ngagai Sarawak Report, madahka diri berasai pedis ati laban udah dikeduan Pengerusi FBC Media, Alan Friedman ti udah begela jutawan diatu.

Pengereja pengawa nya mega madahka bala sida nemu diri nadai agi kereja maya sida datai ba mua opis sida kena hari Satu lalu meda bala tukang kunchi nukar semua kunchi opis sida. Alan Friedman udah nutup pegawa dagang iya enggau enda bepadah lalu nadai mega mayar gaji bala pengereja pengawa iya, lalu bisi sekeda ari sida nya benung bebayarka utang sida ninting bulan.

Alan Friedman, ti diau di nengeri Rome atas penatai pemisi ti ulih iya bepuluh taun bejalaika dagang nengah FBC Media, diatu ditemu berunding deka pindah ari menua Itali, reti nya bank-bank di UK tentu enda ulih nagih utang iya.

Nitihka cherita ti ditusui orang dalam iya, Friedman didinga seruran bebula semua tuduh ngelaban iya ti madahka iya udah ngelanggar undang-undang kompeni penabur berita bekaul enggau orang ti mayar servis iya nya.

Beserimbai enggau nya kompeni pengeluar ti ngena servis iya baka CNBC enggau BBC World udah bela badu ngeluarka program ti digaga Friedman, lalu opis pemansik pengeluar berita UK, Ofcom diatu benung mansik penyalah ngelanggar undang-undang penabur berita nya.

Cherita penuh Sarawak Report pasal skandal FBC Media enggau kaul iya enggau Taib Mahmud bisi diengkahka kami ba sukut “Dirty Tricks” laman web tu. Kami ngenataika penyinu ati kami ngagai bala pengereja pengawa FBC Media ti udah dikeduan ketuai sida, taja pan sebedau tu sida udah bebendar amat bekereja dia.