Ketegal ti udah ringatka repot ari kami Sean (Hisham) Murray, iya nya laki Jamilah, udah enchabar kami. Repot nya udah diayanka sebedau gerempung Bruno Manser Foundation ngeluarka rintai nama kompeni sida Taib sebilik, lalu diatu rintai nama semua kompeni sida nya mengkang ulih dibacha ba internet.
Dalam repot “Ketuka Penyalah Makai Suap ari Pengawa Ngulihka Kayu Kampung” ari gerempung BMF, repot nya bisi ngayanka penerang ti silik sereta nyengala atas semua kompeni sida Taib sebilik di Sarawak, Malaysia enggau di endur bukai. BMF madahka Taib enggau sida sebilik bela bisi ungkup share dalam enda kurang ari 330 buah kompeni di Malaysia aja. Sida Taib sebilik bisi lebih ari 80 kompeni di 25 buah menua serata dunya tu nyengkaum Australia, UK, US, Kanada, New Zealand, Jersey, Hong Kong, British Virgin Islands, Fiji, Cayman Islands, Indonesia, India, Saudi Arabia, Labuan, Cambodia, Brunei, China, Philippines, Singapore, Sri Lanka, Thailand, United Arab Emirates enggau Vietnam!
BMF semina ngaku pansik nya belalauka penerang ti diambi ari Opis Pengerejista Kompeni-kompeni Malaysia enggau opis pengerejista kompeni ti bukai.
Asil Ari Pengawa Makai Suap
Endang terang bendar tebal agi kompeni sida Taib sebilik tu ngulihka penguntung ari kontrak enggau pala-pala tanah ari Perintah Menua Sarawak, mar bendar deka bebulaka pengeraja Taib nya asil ari pengawa makai suap, sekumbang iya mangku pengawa nyadi Kepala Menteri, Menteri Pekara Belanja, Menteri Perambu Pengawa enggau Pengeraja Asal Sarawak!
Pengeraja sida Taib sebilik endang datai ari pengeraja asal menua Sarawak ti endang enggi orang Sarawak, ti udah dikelakar Kepala Menteri sida empu. Pemayuh simpan minyak Sarawak mega tetap nyadika resia parti BN di Malaysia!
Opis Penagang Penyalah Makai Suap Malaysia (MACC) deka majak enda mujur nekanka Taib Mahmud. Opis nya endang diperintah mansik lalu becharaka Taib, tang ditagang ngeruga BN ti endang 100% ngemataka undi perintah besai di Sarawak.
Diatu BN baru tembu ngaga undang-undang ti nagang orang begempuru lebih ari 3 iku enti nadai pemendar! Tu udah meri pemalu ke Malaysia udah bekau perintah dikeruga gempuru besai Bersih 2 ti udah diatur.
Dani, rayat Sarawak! Udah datai ba maya iya Taib Mahmud tu nyadika tanggungpengawa kita, lalu anang nejuka parti BN ari semenanjung ngaga kita baka anak mit agi.
Tangkap iya ulih kita!