Ba minggu nyin kemari, Tuai PRS James Masing udah enggau naka ulih dipeda nadai ngembuan penyinu enggau penyiru ke siku orang ti timpang pendiau, lalu kami mega bisi mansutka repot pasal pengawa dagang bepelasarka penyalah makai suap ti dikereja iya enggau siku menteri PRS iya.
Diatu kami agi nganti iya empu nimbal repot kami tu, ti nunjukka iya bisi bekaul enggau konsesyen ngulihka kayu belian, kontrak-kontrak pengawa ti besai-besai, lesen muka kebun dandang besai atas tanah-tanah NCR, pengawa dagang kunsi enggau sebengkah kompeni minyak entarabansa enggau lesen bejual kerita.
Pansik kami, nunjukka James Masing bisi bulih penguntung ari pengeraja asal Sarawak ti manggai bebilion-bilion ringgit ari pengasih Kepala Menteri Abdul Taib Mahmud.
Berebak enggau pengawa bepilihbesai taun nyin kemari James Masing bisi ditemu nerima konsesyen kayu kampung ti diberi ngagai siku kaban iya, ngemendarka kaban iya nya ngeruga 40,000 hektar tanah NCR bala orang di Meluan-Entabai enggau di Julau/Pitoh Jiet.
Kami deka nemu saut, sekali lesen nya ti dikeluarka dalam bulan Satu 2011, udah ngujungka James Masing enggau 8 iku pengari PRS iya mengkang nyukung Abdul Taib Mahmud enggau perintah BN?
Surat penerang ti tiris ari Opis Kampung bekaul enggau konsesyen kayu kampung dalam menua Baram nunjukka pemendar ngulihka kayu belian di Baram nya endang dikereja semua kaban politik ke Abdul Taib Mahmud.
Diatu kami ulih ngayanka bini James Masing ti benama Corrine (Connie) Bua Nyipa nya mega siku ari orang ti nyadika kaban politik Abdul Taib Mahmud, ti bulih konsesyen ngulihka kayu belian belumur 3333, ti mungkur kandang endur ti besai bendar ti menua nya.
Pansik kami nunjukka Connie Bua Nyipa-Masing mega nyadi pemegai share ba beberapa iti kompeni ti bulih penguntung ari kontrak perintah. Bala pemacha Sarawak Report madahka kompeni Untang Jaya Sdn Bhd, ti udah bulih kontrak-kontrak perintah beratus-juta ringgit, semua sida nya bekereja dalam pelilih menua ti diarika James Masing!
Kontrak di Kapit nya beungkus RM102 juta. Pangan dagang kunsi Connie dalam kompeni nya nyengkaum bakih James Masing, Kristoffer Nyuak Bajok enggau kaban PBB, Minda Mandau, iya nya menyadi indu Robert Mandau ti kala udah nyadi tuai gerempung Peladang di Pantu.
Kaul James Masing enggau kompeni dagang minyak mega ngujungka orang minta saut pasal konflik kepentingan, ti endur kompeni minyak Petronas endang nguasa semua kontrak minyak Malaysia, lalu mayuh agi telaga minyak nya bejalaika pengawa nebing menua Sarawak!
Nya alai, kala kitai ninga James Masing ngeluarka penerang pasal pengawa dagang kunsi iya, lalu baka ni iya bulih 67,700 iti share dalam kompeni besai nya?
Kompeni Busria Jaya Plantation Sdn Bhd nya sebengkah agi kompeni ti ditemu bekaul enggau penyarut rampas tanah. Orang ti beempu tanah NCR nya benung ngulihka sukung lawyer ngarika sida ngelaban pengawa ngulihka kayu kampung enggau pengawa muka kebun dandang besai ba tanah NCR sida di Sri Aman. Kes tu bisi ngayanka bini James Masing, Connie, bisi mega bekaul dalam penyarut tanah nya.
Kompeni Busria Jaya udah diberi konsesyen 6,000 hektar tanah NCR di menua (Sri Aman) nya ba rega ti murah bendar, lalu orang ti bempu tanah NCR ti kena keruga dia nadai dipampas.
Pengawa ngeruga tanah NCR di endur nya endang ari pemendar ti dikeluarka Menteri Pemansang Tanah Sarawak, James Jemut Masing empu.
Uji kitai beperagamka pengeringat bala orang asal ari 3 buah rumah panjai ti ngujungka sida ngambi tuai PKR Baru Bian ti mega siku lawyer pechara tanah, ngarika sida ti tetemuka nama Connie nya siku ari pemegai share ti bisi kaul dia!
Ba pun taun tu James Masing bisi didinga mansutka jaku madahka iya deka majak magi tanah-tanah NCR datai ke 1 juta hektar ngagai 2 juta hektar dalam kandang empat-lima taun tu.
Iya ti mansutka jaku nya taja pan jaku bantah udah didinga ngerembai di serata menua Sarawak lalu taja pan mayuh kes mahkamah pasal penyalah ngeruga tanah-tanah NCR udah menang ngelaban Perintah Menua Sarawak ti betuaika Abdul Taib Mahmud.
Bala orang asal ba menua nya udah disemayaka penguntung udah sida ngelepaska tanah-tanah NCR sida ngambika dikereja. Tang diatu terang bendar James Masing enggau sapit iya Mong Dagang benung ngulihka penguntung ti manggai RM70 juta ari kompeni-kompeni kebun dandang besai dibayar masuk ngagai akaun kompeni sida kaban enggau bakih seduai iya.
Bini James Masing nya mega bisi pemendar (Approved Permit) nyual kerita di nengeri Kuching, Sarawak! Kompeni Bahterangkut Sdn Bhd nya nyual kerita enggau perengka ganti kerita. Bala pengarah dalam kompeni nya siku ari bakih James Masing, Kristoffer Nyuak Bajok, enggau orang bukai ti bisi kaul enggau James Masing.
Pemegai share ti bendar dalam kompeni nya dua iku pengarah indu, Doris James Bangga enggau Sadiah Binti Taha.
Nya alai, diatu kami minta diterangka pengawa dagang ti bekaul enggau James Masing nya nadai bekaul enggau penaluk iya ke Taib Mahmud ba pengawa bepilihbesai nyin kemari.