Chara menua Malaysia ti ngujika diri ngelalaika penyalah salah guna duit asil ari kena suap bekaul ba pengawa ngulihka kayu batang ti dikereja Kepala Menteri Sabah, Musa Aman, diatu nyau tebantai.
Sepengudah kami ti mantaika sekeda ari surat-surat penerang ti ulih dikena kami nuduh bekaul penyalah nya dia sekeda gerempung entarabansa lalu berengkah bejalaika pansik sida.
Penerang-penerang bekaul enggau penyalah nya udah diseliahka Lawyer Bansa ari Malaysia, Abdul Gani Patail.
Diatu tinjau udah ditumpuka ngagai pengawa bank di menua Switzerland ti pemadu besai sereta tebilang, UBS, ti benung ngemataka duit simpan Musa Aman enggau bakih ti sama bisi ngereja penyalah ti sebaka enggau iya, Taib Mahmud.
Semina kurang ari seratus juta dollar udah dipasukka nengah akaun-akaun UBS nuju akaun ti penudi, iya nya sebengkah akaun dalam bank Zurich ngena nama Musa Aman. Sama bela begunaka duit kamah nya mega iya nya bala anak lelaki iya ti benung belajar di Australia maya nya.
Jaku-jaku tanya ti ngemba bank UBS
UBS udah bejalaika pengawa sida ke Musa Aman ari ti mantu bala bakih politik iya dalam parti BN ngelamun penyalah nya.
Sehari tu MP Carlo Sommaruga ari parlimen Switzerland udah didinga mansutka sekeda jaku tanya, sepengudah iya ti madahka pengirau ati diri ba penyalah ngelalaika duit kamah ti pemadu besai di menua nya.
Nitihka gerempung duit turu Bruno Manser Fund (BMF), MP Carlo udah minta diterangka isi pansik ti bekaul enggau penyalah nya sepengudah iya tetemuka penerang ari Opis Lawyer Bansa menua Swiss ti udah bejalaika pansik begulai enggau opis pemansik pengawa makai suap di menua Hong Kong ti udah minta penerang ti silik bekaul enggau kes Musa Aman nya.
MP Carlo mega nanya sekali ke perintah menua Swiss kala ditemuai bala pemansik ari menua Malaysia lalu sekali ke menua Swiss besedia nyaup Malaysia ngena penemu undang-undang.
Bekuka semua reta simpan Taib
Nambah ke nya, nitihka BMF, MP Carlo mega ngansak perintah menua Swiss mekuka semua reta simpan enggi Musa Aman enggau enggi Taib Mahmud enggau enggi sida sebilik.
Iya mega minta diterangka nama bansa lindung ti tau disadang dalam Sempekat Dagang entara Gerempung Dagang Eropa, enggau menua Malaysia ti deka nagang asil makai suap Malaysia tama ngagai Switzerland.
Bala orang ti landik ba pekara undang-undang diatu benung mansik pekara tu lalu Musa Aman ti kala ngumbai Sarawak Report betenahka iya, lalu bank UBS enda tau enda berasai irau baka ni chara sida deka nerangka pasal duit bejuta-juta dollar tama ke Zurich, nyengkaum ngagai menua Amerika Syarikat.