Pengeringat enggau pemedis ati bala pengundi iya ti kena keruga orang tanah-tanah sida ti ngujungka jematan sida dirumpang. Sereta meda utai baka nya udah nyadi dia ADUN ke sitak Balai Ringin, Snowdan Lawan, mutuska runding diri nemuai ke Balai Ringin kemari.
Tang iya udah belalai dalam balai polis lalu enggai betemu, berandau betunga mua enggau bala orang-orang Melikin ti ringat ti benung nganti di luar!
Pun pekara ti tau bendar ngasuh iya malu, enda tentu mar diperatika. Pengawa ngerampas tanah enggi orang di menua nya ditambahka enggau bala orang ti megai share dalam kompeni United Teamtrade nya dua iku ari bakih menteri senior ari iya dalam BN iya nya Naroden Majais enggau Awang Tengah Ali Hassan! Baka ni alai dua iku menteri nya tau bulih lisin dikena kompeni seduai ngulihka kayu batang? Tu sebengkah ari penyalah makai suap ti terang bendar dikereja ba atas tanah orang di menua Melikin ti patut diputarka YB Snowdan Lawan enggau manah.
Uji kitai sama beratika utai ti udah dikereja bala apek bayat ti diupah kompeni United Teamtrade ba bala orang bansa asal di Melikin ujung minggu nyin kemari. Sida apek bayat nya udah ngerumpang jematan ba mua orang bansa asal menua nya enggau ba mua bala polis ti datai semina bejaga aja!
Ketegal-ketegal ti enda ulih diterima runding!
Lebuh ke ditanya nama kebuah sida berumpangka jematan ke lama udah meruan dia, sida iya madahka perengka pengangkut sida udah tekelinchir ari jematan nya lalu ngujungka jematan nya rusak!
Pengawa ngerusak jematan nya dikemataka bala orang bansa asal di menua nya empu enggau bala polis ti enda mujur ngerara pengawa bala apek bayat kompeni United Teamtrade nya.
Tang Snowdan Lawan lalu nadai ngayanka penyinu ati iya ngagai bala orang bansa asal ti udah kena keduan bala apek bayat nya.
Iya udah minta betemu enggau bala orang ari kompeni United Teamtrade berandau ba balai polis sama enggau kepala Opis Tanah enggau Penyukat enggau 5 iku pengari ari 19 buah genturung pendiau (kampung enggau rumah panjai) ti kena keruga orang.
Bala orang bukai nganti di luar bepanas taja pan sida udah datai tumu pagi nya ari menua ti jauh, ketegal ti deka betemu enggau YB ti ngarika sida.
Ba luar balai polis seraban bala polis pengerara penyarut diatur bejaga laban nangika bala orang bansa asal nyerang tama ke balai tang bala orang bansa asal endang nadai ngayanka diri deka ngena pengasar, taja pan sebedau nya sida suah bendar udah kena keduan bala apek bayat ti bekereja ke United Teamtrade.
Taja pan lawyer sida, ADUN penyakal See Chee How, bisi datai ari Kuching deka mantu sida tang iya mega enda dikangauka tama berandau enggau YB Snowdan Lawan ti anak siku ari kroni dagang ti kaya raya ke Taib Mahmud. Enda lama udah nya 5 iku pengari ke bala orang bansa asal ti dibai berandau dalam balai polis pansut ari balai nya ngayanka mua diri ti agi mantah pemutus randau dalam balai din tadi.
Enda lama udah nya YB Snowdan Lawan dipeda pansut ari balai polis lalu bekejang ari endur nya ngena kerita lumba iya, tang enda ngetu betemu enggau bala orang bansa asal ti benung nganti di luar.
Sekali agi, Sarawak report deka nemu, nama kebuah pekara menua Sarawak dikeruga baka nya?
Kami deka nemu nama kebuah orang di Balai Ringin idup dalam penyuntuk taja pan kampung enggau temuda rimba beribu juta ringgit sida ditebang orang bukai lalu dikena ngaga kebun dandang besai sawit?
Kami mega deka nemu nama kebuah YB Snowdan Lawan ti agi biak sereta regas nya dipaduka mangku pengawa nyadi siku menteri dalam ADUN Sarawak, taja pan iya ditemu rindu agi ke pengawa lumba kerita berega mar enggau kerita besai-besai sereta laju?
Lalu kami mega deka nemu nama kebuah nadai siku orang sanggup ngelaban sereta mantah penyalah makai suap enggau salah guna kuasa ngena lisin ngulihka kayu batang lalu udah nya beduan orang bansa asal menua nya ngena apek bayat enti sida enggai nyambut pampas RM350 ke sehektar tanah sida ti kena ambi?
Jematan ke baru tembu digaga bala tukang tumbang, ambi ke banding, udah dirumpang dikena nagang perengka pengangkut kayu batang ngerenchah kandang menua orang bansa asal menua nya. Penyalah nya diperatika polis, tang jematan ti disediaka perintah Sarawak ke ditengah orang besari-sari nya dirumpang bala apek bayat enda dikibuhka polis.
Ba ujung minggu tu tadi sebengkah penusah angus ba log pond enggi United Teamtrade udah direpotka. Tang nama kuasa ti ngemendarka sida ngena lisin nguan sementara kandang menua nya taja pan sida udah mai kes nya ngagai court dikena sida ngambi pulai tanah sida nya?
Nasib bala orang di Melikin nyau nyadika sebengkah penguji ke menua Sarawak. Ulih tauka enda sida nyelamatka tanah sida ari kena rampas perintah amu ti betuaika Taib Mahmud, tauka penusah kena rampas tanah deka majak nyadi ke dudi hari ila?
Kes sida deka dipendingka dalam court ba minggu baru.