Taib Mahmud udah dipeda enda bemunyi ninga orang ti ringat ketegal pemayuh reta ti ditugungka iya enggau chara ti salah sereta kamah di menua tasik.
Tang ba taun nyin kemari, iya udah mansutka jaku dalam DUN Sarawak dikena iya besangkal berita pasal Presiden menua Switzerland ti madahka diri besetuju deka bejalaika pansik atas semua reta Taib di Switzerland. Taib bebulaka jaku tuduh nya. Bedau lama tu udah opis Komisyen Perintah Besai Switzerland udah ngeluarka jaku dikena sida nyaut semua jaku tanya MP Carlo Sommaruga:
Tanya: “Dalam bulan Empat 2011 suba, Kaunselor Perintah Besai ti dulu suba Micheline Calmy-Rey untuk mansutka jaku tanya ari gerempung Bruno Manser Fund bekaul enggau semua reta bala orang ti dibantaika (PEP) ti enggi sida Taib sebilik ngagai opis FINMA. Nama tindak opis FINMA udah nya? Sekali ke opis Komisyen Perintah Besai udah besedia mekuka semua reta Taib di Switzerland?” [MP Sommuraha, Carlo, 03/05/2012]
Jaku saut betulis ti udah dikarang enggau naka penyimat ti begunaka jam ti lama sebedau dipansutka. Tang jaku saut nya enda ulih mantu Taib nyakal semua jaku tuduh enggau petenah ngagai iya:
Saut: “Ba atur resia rasmi, penerang enda ulih dipansutka bekaul enggau kes ti engkeman. Reta Taib nyangka ulih dibekuka opis Komisyen Perintah Besai, uji peda Saut 4.”
Uji peratikan tusun leka jaku tu. Sida dipelabaka deka nyebut pasal ‘reta ti dipelabaka’ tauka ‘sebarang reta’, tang sida udah ngena leka jaku ‘reta Taib’!
“naka ke diatu pekara nya nadai udah dikereja tauka nyadi di Malaysia”.
Musa Aman enggau Taib Mahmud tau ngumbai diri agi bidik! Bala kaban seduai dalam BN endang enggai ngarika rakyat mayuh di Sarawak enggau Sabah, ti endur pengeraja asal menua sida sama bela udah dirampas sereta dicuri, lalu minta perintah Switzerland mekuka reta dua iku PEP tu.
Agi mega, sari tu, Menteri Besai Malaysia, Najib Razak, udah ngelindung Taib lalu madahka ngagai orang mayuh enda ngasuh sida irau sereta kiruhka isu bekaul enggau berita Taib ti udah begela orang pemadu kaya di Malaysia!
Najib diatu baru nemu, kejang pengawa bepilihbesai nyau semak deka diatur, mayuh bendar orang Malaysia deka nemu isu tu.
Tang bala tuai-tuai BN ti endang kaya enda tau enda nerima pengamat ti endur pengawa makai suat ti dikereja bala menteri sida nya endang nyadika sebengkah perengka ti besai guna dikena sida nentuka penegap parti sida ngambika tan bekuasa.
Saut ari Switzerland enda ulih ngulihka pechaya bala orang mayuh di Sarawak pasal beratus-ribu juta dollar ti udah dilalaika Taib ba menua nya enda tegap sereta selamat.
Nya alai, ulih tauka enda Taib minta perintah Switzerland meresi nama iya lalu mansutka jaku bebula petenah lalu ngumbai iya nadai ngembuan sebarang bup akaun duit simpan tauka reta di menua Switzerland?
Enti Taib endang amat nadai penyalah ba pekara tu, iya patut minta perintah Switzerland mansutka jaku penerang nya!
Beserimbai enggau nya, di nengeri London ba ujung minggu tu tadi Kepala PKR Anwar Ibrahim udah mansutka jaku penerang ari penemu iya empu bekaul enggau penyalah makai suap bala tuai perintah di Malaysia ba licha iya di Universiti Westminster.
Dikena nirika tolerance enggau bechampurka adat asal di menua Malaysia, iya minta semua orang jalai pengarap enda tau enda bebasaka jalai pengarap pangan diri lalu nirika pengelantang mensia enggau mega bebasaka jalai pengarap ti deka dipilih sida.
Iya madahka diri berasai nyima meda sebengkah raban orang ti deka melakangka hak orang Kristian di Malaysia ngena nama Allah nyadika kangau sida ngagai Tuhan, taja pan nama nya udah lama bendar dikena di Malaysia.
Anwar udah nangkan bala peninga licha iya ti madahka “pengarap Islam ngajar raban iya pasal enda nyiping pangan diri, pengelurus enggau peninggi adat mensia” lalu iya madahka enti orang Islam ringat ketegal nabi sida dikeleseka, sida mega patut ringat enti ulah enggau pendiau orang nya enda sejalai enggau ajar pengarap sida baka “enda lurus enggau orang bukai, nyiping orang bukai, makai suap enggau nawa sebarang orang ketegal bebida penemu politik”.
Nama jaku ti manah agi dikena nangkan bala tuai BN ba pengawa enggau ulah ti patut dikereja sida dikena sida ngajar rayat sida empu lalu ngemunaskan semua penyalah ti belaban enggau jalai pengarap baka ti dikereja Taib Mahmud enggau Musa Aman ba rayat sida empu di Sarawak enggau Sabah?
“Anang kitai kiruhka nya?” ukai nyadika sebengkah jaku timbal ti betul. Uji peratika jaku tanya enggau saut ke MP Carlo Sommaruga:
12.3395 – Jaku tanya dalam rumah dewan parlimen

Dipansutka: MP Sommaruga Carlo. Haribulan: 03/05/2012, dipansutka ba opis Komsiyen Menua (Switzerland)

Jaku tanya
Nitihka sebengkah repot dalam suratberita “Sonntagzetung” kena 22/04/2012, siku orang politik Malaysia benama Musa Aman udah ditemu nerima duit USD90 juta dollar duit suap ari pengawa ngulihka kayu batang ba kampung pulau Borneo. Duit suap nya udah ditabanka lari lalu disimpan nengah akaun di Hong Kong enggau di Switzerland. Nitihka penerang ari opis Lawyer bansa di Switzerland, menua Switzerland udah meri bantu undang-undang sida.
Musa Aman nya siku tuai perintah nengeri Sabah di Malaysia lalu menyadi iya nyadi Menteri Luar menua Malaysia. Senutuk enggau nya, Abdul Taib Mahmud, siku tuai menua Sarawak di Malaysia mega, dituduh nyimpan mayuh bendar duit kamah iya di menua Switzerland.
1. Ulih tauka enda opis Komisyen Perintah Besai ngamatka menua Switzerland udah meri bantu undang-undang ngagai Hong Kong ba kes Musa Aman enggau bala pengari iya? Nama bansa opis perintah di Hong Kong ti udah minta bantu undang-undang ari menua Switzerland? Nama bansa penyalah ti disebut sida nya?
2. Kala tauka bedau Switzerland dipinta bantu undang-undang ari menua Malaysia? Udah tauka enda Switzerland besedia meri bantu undang-undang ngagai Malaysia?
3. Sekali ke bantu undang-undang dalam kes Musa Aman nya diaduka ba bank bukai kelimpah ari bank UBS menua Swiss?
4. Udah tauka enda opis Komisyen Perintah Besai besedia mekuka semua reta ti dipelabaka kena pegai Musa Aman di Switzerland?
5. Ba bulan Empat 2011, Kaunselor Perintah Besai ti dulu suba, Micheline Calmy-Rey udah mantaika sebengkah peminta mansik ari gerempung Bruno Manser bekaul enggau reta bala PEP ti dipega sida Taib sebilik ngagai opis FINMA. Nama bansa tindak ti udah diambi FINMA? Sekali ke opis Komisyen Perintah Besai udah besedia mekuka semua reta Taib di menua Switzerland?
6. Udah tauka bedau opis MLRO ngambi tindak sida? Belalauka nama, sapa lalu nama asil pansik ti ulih sida nya?
7. Nama bansa atur bejaga-jaga dikena opis Komisyen Perintah Besai nagang pengawa nyimpan reta PEP ti bepenyalah ari menua Malaysia ke menua Switzerland?
Baka ni cara opis Komisyen Perintah Besai ngambi tindak ba bank UBS enggau bank bukai lebuh sida ngatur simpan reta enggi bala PEP ari Malaysia?
9. Sekali ke opis Komisyen Perintah Besai bisi ngembuan angka kira-kira ke semua reta bala PEP ari Malaysia di Switzerland? Enti bisi, baka ni penyampau semua reta nya?
10. Baka ni opis Komisyen Perintah Besai deka nyaut jaku tanya pasal reta bala PEP belalauka sempekat dagang bebas entara menua EFTA enggau menua Malaysia?
Saut ari opis Komisyen Perintah Besai kena 22/08/2012

Saut 1: Menua Switzerland udah kala meri bantu undang-undang ba kes Musa Aman enggau bala pengari iya ngagai raban pemansik menua Hong Kong bekaul enggau penyalah makai suap.
Saut 2: Ba pekara tu, opis-opis ti bekuasa di menua Malaysia lalu apin kala minta bantu undang-undang ari menua Switzerland. Enti bisi pan, opis Perintah Besai deka beratika peminta nya dulu.
Saut 3: Kes ti bekaul enggau Musa Aman enggau bala pengari iya enda nanggul bank ti bukai.
Saut 4: Artikel 184(3) Undang-undang Perintah Besai Switzerland udah meri kuasa ngagai opis Komisyen Perintah Besai mutarka kes ti nyelai dikena sida mekuka reta bala PEP di menua Switzerland. Pengawa mekuka reta nya dikereja nitihka peminta ari menua asal bala PEP ti ditemu nyimpan reta di Switzerland. Naka ke diatu, pekara baka nya apin nyadi.
Saut 5: Endang udah nyadika pengawa opis FINMA mansik semua penyalah ngelanggar atur dalam semua institusi wang menua nya. Enggau resia rasmi ti tegap, mar bendar deka ngeluarka penerang ari pansik ba kes ti engkeman nya. Bekaul enggau pengawa mekuka reta Taib nyangka deka diteritka opis Komisyen Perintah Besai, uji sidi ba Saut 4.
Saut 6: Bekaul enggau pengawa meroses data, opis MLRO deka belalauka resia rasmi. Enggau nya, sebarang penerang enda tau dikeluarka ba kes ti engkeman.
Saut 7 enggau 8: Pengawa munaska penyalah makai suap lalu mulaika semua reta ti dilalaika bala PEP ngagai menua sida empu nya endang tanggungpengawa opis Komisyen Perintah Besai. Switzerland bisi agih undang-undang bekaul enggau penyalah makai suap ti bisi kaul enggau bank endur bala PEP ngelalaika reta sida.

Saut 9: Data ti begempuru nadai ditemu besangkut paut enggau pengawa kamah bala PEP enggau bank di Switzerland. Bank-bank nya bempu tanggungpengawa ngemataka kaul dagang ti nadai begunaka pengawa mindahka data tu ngagai opis FINMA.
Saut 10: Belalauka penetap dagang kunsi 20/07/2010, menua Switzerland enggau menua EFTA benung ngatur jaku randau enggau menua Malaysia. Penetap dagang kunsi nya beguna dikena mansik sebarang pengawa ti deka numbuhka dagang kunsi entara dua bengkah menua. Dalam konteks tu, menua EFTA enggau Malaysia udah ngaga atur bejaga-jaga ba pengawa nyediaka jaku randau dikena ngemanahka kaul dagang kunsi bebas. Jaku tanya ti dipansutka ditu enda senutuk enggau polisi nagang penyalah dagang di menua Switzerland.