Kompeni ti ngaga tekat ai di Sarawak diatu baru nemu pemar deka nutup peniris sebengkah-sebengkah berita pasal pengawa sida.
Pemendar enggau pengamat pasal pengerusak ari perambu Taib Mahmud ti deka ngaga tekat-tekat ai diatu udah diayanka nengah program Last Frontier ba stesyen TV Dateline di menua Australia.
Udah filem nya dikeluarka ba minggu-minggu nyin kemari, kompeni ti dikenang dalam program nya lalu nguji ‘ngukum’ kompeni pengeluar program, SBS nya. Sida mega udah ngansak filem nya dikeluarka ari internet.
Kompeni pengaga tekat ai ari menua Australia, Hydro-Tasmania, ti nyadika penyanding penemu ba semua projek ngaga tekat ai di Sarawak nya udah ngasuh kompeni TV SBS minta ampun enggau chara formal!

Enggau pengawa sida SBS ti udah ngalahka diri nya, kompeni ti bekaul enggau ngaga tekat ai dipeda baka ti ngukum orang di menua Sarawak ti seruran deka angkat ngelaban pengawa ngerusak rampa menua ti mega lalu deka ngampuhka tanah-tanah di Sarawak.

Kompeni TV Al Jazeera ti bepalan di Doha, ti tebilang naburka berita 24 jam, udah lama beratika perintah Taib Mahmud di Sarawak bekaul enggau pasal rampa menua.

Dalam program sida taun 2009 dia TV 101 East udah betanyaka kaul Taib dalam pengawa dagang sida sebilik. Kompeni TV nya udah numpuka repot sida ngagai penyampau duit ti mayuh bendar dikena kompeni CMS enggi sida Taib sebilik nguasa dagang simin dikena nyukung projek ngaga tekat ai di menua Sarawak.
Tekat Bakun nya sebuah dagang tunggal ti disukung kompeni CMS baka ti udah direpotka pengarang berita, Howard Davies, tang kelimpah ari nya kompeni nya mega bulih untung beratus-juta dollar ari kontrak ke bukai ti diberi Taib Mahmud ngagai iya empu ba pengawa salah ti dikumbai bebalutka pengawa menteri enggau pengawa dagang diri empu.
“Ari sebuah dagang ngeluarka simin ti mit, diatu kompeni CMS udah nyadi kompeni pemadu besai di menua Sarawak. Kompeni CMS dikaitka enggau projek ngaga Rumah Dewan Undangan Negeri ke baru, Palan Aum Besai Borneo, jalai alun, tekat ai, stesyen kuasa elektrik, sepital, padang penerebai bilun, jematan enggau pengawa miki jalai alun pan-Borneo, lalu semua pengawa nya beungkus beratus ribu dollar US” [Fight for power, Al Jazeera]
Al Jazeera mega ngayanka siku pengari ti mantu nusui pasal pengawa ngaga tekat ai di Sarawak, iya nya siku ari kaban belayan Taib Mahmud empu, ipar iya empu ti dulu suba nyadi Pengarah Urusan, Abdul Aziz Husain.
Bedau lama tu udah, SBS dikutuk laban sida ngeluarka sebengkah repot pasal pengawa kamah dikereja bala tuai-tuai perintah BN di Sarawak, lalu diatu stesyen Al Jazeera mega patut besedia nganti penatai surat ari raban lawyer ti dikena ngemba sida. Kompeni Hydro-Tasmania (enggau mega kompeni Ta Ann) udah kala ringat ketegal pengawa sida di menua Sarawak udah ditusui lebih ari patut lalu sida enggai dikumbai mai pengerusak ke rampa menua enggau pemerinsa raban orang asal ketegal projek ngaga tekat ai ari perambu Taib Mahmud nya.
Sally Begbie ari stesyen TV SBS udah nyurutka diri lalu sanggup nerima jaku kutuk ari kompeni Hydro-Tasmania enggau Ta Ann dalam beberapa jam aja. Tang, ni pemayuh kereja pansik udah dipejalaika iya sebedau tu?
Gerempung International Rivers nemu bendar pasal semua undang-undang bekaul enggau pengawa ngaga tekat ai lalu gerempung nya udah nuliska timbal sida ngagai Sally Begbie ti nurutka peneka Hydro-Tasmania.

Tambah mega, kompeni Hydro-Tasmania udah enda tau enda ngaku kaul sida enggau pengawa ngaga tekat ai di Sarawak nya endang beguna bendar.
Dalam pengawa sida ti nyaut tanya ari MP Kim Booth ari parti Green di Tasmania, dia Hydro-Tasmania bisi madahka sida bisi nyediaka surat enggau kontrak sida enggau perintah Sarawak, taja pan sida madahka diri enda bekaul rapit enggau Sarawak.
Kontrak sida nya nusui enggau silik pengawa meri sanding penemu ba pengawa ngaga tekat ai Murum, enggau 12 buah tekat ke bukai.
Kelimpah ari nya, Hydro-Tasmania mega bisi bekaul enggau ngaga pansik ba pengawa ngaga tekat ai Belaga enggau Metjawah.

Enggau nya, nyengkaum penerang ti madahka kaul sida ba pengawa ngaga tekat ai di Sarawak, baka ni Hydro-Tasmania madahka kaul sida nya dikemesaika enggau lebih ari patut?

Lalu pia mega, enti sida endang amat bisi ngaga mayuh bansa pansik ti dikumbai ngereja pengawa ti manah, nama kebuah pekara nya enda tau enda dipelalaika?
Ba sangkal penemu sida, Hydro-Tasmania ulih nerima pengamat ti madahka surat-surat sida bisi guna ke orang mayuh, tang sida mega madahka pekara nya tau ngeruga pengawa dagang sida. Nama kebuah penguntung ke menua Australia dikira beguna agi ari pengidup enggau pengelantang raban orang bansa asal di Borneo?
Sekali ke Hydro-Tasmania endang majak ngaku standard sida nya pemadu tinggi ba pengawa nyaga pengelantang mensia lalu udah nya pansik sida nya enda tau enda dipelalaika?
Kepala PKR ti mega ADUN Ba Kelalan, Baru Bian ti ngarika raban orang bansa asal ngenanka tanah enggau menua sida di Sarawak bisi udah nulis surat ngagai SBS ketegal sida SBS udah ngaku diri udah saru ngeluarka program TV nya. Ba pala surat iya, Baru Bian nuliska sebaris leka jaku ari Bup Kudus: “awakka pengelurus enggau pemetul selalu meruan baka sungai ti enda nemu langkang” [Amos 5:24]
Kompeni Hydro-Tasmania tau nganjung bala lawyer sida baru. Tang cherita tu deka dipansutka baru nyadika sebengkah peniris, baka jaku banding, jaku sangkal sida tetap deka dibasu ngena pemetul!