Pengeringat Hydro-Tasmania ke filem dokumentesyen ti dikeluarka TV Dateline ari Australia ‘Last Frontier’ dulu ari tu tau bendar ngasuh saru.
Sebuah repot ari Sarawak Energy Berhad (SEB) udah nerangka enggau silik baka ni kompeni Hydro-Tasmania endang diambi sida ngambika ngemataka atur pengawa ngemansangka program SCORE Taib Mahmud ti deka ngerusak rampa menua ti besai bendar di Sarawak.
Tu nyengkaum pengawa ngaga 12 iti tekat ai ti balat dibantah laban deka ngampuhka rampa kampung Borneo ti besai bendar lalu mai penanggul ba pengidup bepuluh ribu iku orang bansa asal enggau daya idup sida.
Utai ti ngasuh Hydro-Tasmania ringat iya nya program dokumentasi ti dikeluarka SBS nya dikumbai sida “ditempa sengapa” pasal kaul sida enggau SCORE, taja pan sida Hydro-Tasmania seruran madahka diri semina nyadi penyanding penemu ari pinta kompeni SEB.
Jaku bantah sida Hydro-Tasmania udah ngujungka pengeluar program ari SBS berasai kesal ti lalu ngujungka iya dipejal minta ampun lalu ngaku program ti dikeluarka ba TV nya “enda engkeman sereta berat sepiak”.

Tang diatu kami ulih nerangka enggau silik agi baka ni ke bendar sida Hydro-Tasmania udah ngelamun pasal batang pengawa sida di menua Sarawak, baka ti dichelak dalam Repot Taun kompeni SEB ke taun 2010. Nitihka repot nya, SEB udah ngangauka Hydro-Tasmania ngambika bekerejasama ngaga tekat ai di menua Sarawak laban kompeni nya ngembuan pengelandik dikena nyukung program SCORE.
Repot nya bisi nerangka baka ni projek SCORE deka nyadi nyata ari SEB ti enda tau enda ngisi 12 pengawa puang ke bala pengurus lalu enggau nya SEB udah milih kompeni pengaga tekat ai ari menua Australia, laban nadai raban orang ti landik ari menua Sarawak empu.
Nambahka nya, repot nya bisi madahka bisi sempekat ke Hydro-Tasmania ngagihka enda kurang ari 120 pengawa puang ke bala pengurus ti enda tau enda diisi datai ngagai taun 2011. Tujuh iti pengawa nya udah diisi lebuh maya repot nya dituliska lalu agi bisi entara 20-30 pengawa puang ke bala staf bantu ti deka diisi.
Terang bendar Hydro-Tasmania endang bisi batang pengawa dalam projek SCORE lalu mega projek ngaga 12 buah tekat ke SEB. Ke bendar iya bala staf sida udah ngambi alih pengawa ari SEB ba kesemua pengawa ngaga tekat di Sarawak.

Sarawak Report ulih nukuka beberapa iku staf ti bepangkat besai ari menua Tasmania ti dijali ngagai kompeni SEB kenyau ari taun 2010. Sapit Presiden enggau Kepala Strategi enggau Perambu ari SEB nya Miles Smith, ti mangku pengawa ti sama ba Hydro-Tasmania.

Lalu bala staf nya ukai semina diinjau ari kompeni enggi perintah menua Tasmania, tang sekeda ari sida nya mega datai ari Opis Kuasa Elektrik dalam perintah menua Tasmania empu!

Siku agi Sapit Presiden SEB, Nick Wright, ti nyadi Penyanding Penemu ke Menteri Kuasa Elektrik enggau Pengeraja Asal ari Tasmania ti dulu suba, iya nya Sapit Menteri Besai Tasmania, Bryan Green.
Bryan Green bisi kala udah direpotka laban bisi kaul lalu mega meri sukung iya ngagai kompeni Ta Ann ari menua Sarawak, ti udah balat nebang teda kampung bungas di menua Tasmania ti balat bendar dibantah orang mayuh, lalu iya mega ngumbai semua asil kayu batang sida nya “baik enggau rampa menua”.
Sebuah ari gudang kayu Ta Ann udah digaga ba sitak bepilihbesai Bryan Green empu di menua Tasmania.
Ari pemayuh repot tu ti ulih dikena ngulihka saut ke jauh agi pasal kaul entara Hydro-Tasmania, bala orang politik Tasmania enggau kaul dagang ti dikemataka Kepala Menteri Sarawak Taib Mahmud?
Kompeni SEB enggau Ta Ann ti sama betuaika Hamed Sepawi, petunggal ti mega pengari ke Taib Mahmud, ti ngena chengkam kukut besi iya ba atas menua Sarawak ti korup nya.

Nick Wright diatur gawa ngemataka portfolio Tanggungpengawa Korporat enggau Sosial dalam kompeni SEB, ti endur batang pengawa iya ‘Ngatur Pengentap Pendiau’ dikena nyukung ‘program pemansang ngulihka kuasa elektrik ti besai’ baka ti diaku iya nya.

Enggau tu kami deka nanya nama kebuah SEB enda ngerepotka ngena atur transparensi semua surat penerang ti bekaul enggau sanding penemu enggau pengawa ngentapka pendiau ba sebarang projek ngaga tekat ai sida?
Tu nyengkaum Tekat Murum, ti endur lebih seribu iku orang ari raban bansa Penan udah diburu pansut ari endur ti diwan sida kenyau ari kelia ti deka ampuh laban ai ari tekat nya belabuh ari ujung taun tu?
Agi mega, Hydro-Tasmania kala madahka diri bejalaika tanggungpengawa korporat ngena sukat ti pemadu tinggi, lalu diatu Penyanding Penemu Kuasa Elektrik ke dulu suba ari Tasmania ti mangku pengawa nya!
Staf ti besai pangkat ti bukai nyengkaum James Hannon, ti baru diinjau SEB, mangku pengawa Pengurus Kanan ti ngemataka semua macham kontrak enggau Graeme Maher, siku Pengurus Kanan dalam Hydropower Development. Maher diatur ngemataka pengawa mansik fisibiliti ba semua tekat ai ti bukai digaga di Lawas, Limbang, Baram1, Baram3, Pelagus enggau Baleh. Nama ke tiap iti pelilih menua nya ngarika raban bansa asal ti deka napi pangka program ampuh laban tekat-tekat nya.
Siku agi staf luar ti dijali ngagai SEB nya Andrew Pattle ari Hydro-Tasmania, ti udah ngambi alih ngemataka projek Tekat Murum, ti mega nyadi pengurus kanan ke projek tekat Baleh enggau Baram.

Repot SEB udah ngaku semua staf Hydro-Tasmania nya beguna bendar ba program ngaga semua tekat ti diperambuka nya.
Nya alai nama kebuah siku pemesai ari Hydro-Tasmania ngumbai program TV Dateline nya udah mansutka berita ‘ti ditempa sengapa’ pasal pengawa kompeni iya di Sarawak?

Ba hari ti nangkan ke nya, Roy Adair, siku CEO ari Hydro-Tasmania, udah ditemu berumban niki studio Radio ABC, laban ti deka mansutka jaku penerang pasal batang pengawa sida di menua Sarawak nya semina nyadi penyanding penemu ba projek aja.
Enggau penerang ari bala bakih iya lalu bala pengereja pengawa sida ngayanka pekara ti enda sejalai, Roy Adair patut niki studio nya baru nyangka dikena iya minta ampun ngagai bala orang ti ngaga filem dokumentesyen Last Frontier enggau semua orang di Sarawak, ti udah dikeduan sida jauh baruh ari sukat pemadu tinggi ba tanggungpengawa korporat enggau sosial sida!
Roy Adair enda tau enda nyaut sekeda tanya kami tu enti sema iya dipinta datai baru ngagai studio radio ABC nya endur iya meri penerang ti baru nya:
– Sekali ke nuan tau dikumbai betanggungpengawa ba projek ngaga tekat nya, tauka ulih tauka enda bala pengurus kita nya diberi tanggungpengawa nya mega?
– Ulih nuan nyaut baru tanya ti bedau disaut nuan lebuh Leon Compton ari studio radio ABC betanya pasal nama bansa pengawa audit ti udah dikereja kita ti ngujungka nuan tau ngumbai perintah autokratik enggau kleptokratik betuaika Abdul Taib Mahmud enggau bala pangan dagang kunsi ti tau bedagang enggau nuan?
– Nama bansa “pansik pra-bida” ti ko nuan ti udah dipejalaika nuan sebedau kompeni kita bekaul penuh dalam projek besai tu? Nuan udah madahka SEB udah nyadi kaban dalam gerempung IHA. Tang kami pan tau ngumbai Leon Compton ulih nyadi kaban IHA enggau semina mayar $1,000, lalu ke bendar iya, rekod-rekod udah nunjukka SEB endang BEDAU kala nyadi kaban dalam IHA lebuh maya anak kompeni kita belabuh ngereja pengawa sida dalam taun 2008 suba.
– Nama kebuah nuan seruran ngumbai projek SCORE nya sebengkah projek ti ‘enda putus-putus’ lalu ‘nelap-karbon’, taja pan projek nya deka ngampuhka rampa menua ti besai bendar ti diwan jelu mayas enggau raban orang ari bansa Penan? Tekat-tekat ai nya semina tan dalam berapa puluh taun aja, lalu penyampau mensia ti nguan menua Sarawak nya mimit bendar lalu enda beguna kuasa elektrik ti mayuh.
– Nama kebuah nuan mengkang enggai ngeluarka surat-surat penerang ti dikumbai nuan endang bisi udah ti dipinta ngena atur Macha Penerang Enggau Bebas ari bala menteri di Tasmania? Sekali ke nuan ngira diri bulih untung bedagang nya lebih agi ari nuan ngira pengelantang orang mayuh di menua Sarawak?
– Sekali ke surat-surat penerang nya semina dikena ngamatka semua penerang ti udah diberi kita ngagai SEB ngayanka Hydro-Tasmania nya ngulihka untung bejuta-juta dollar nyadika pampas ngamatka juluk ati gila Taib Mahmud?
Alai, Roy! Tama ngagai studio nya baru, lalu terima mih jaku chabar kami tu!