Kerita bansa SUV Hummer 2 ti digaga di menua Amerika nya entara kerita ti pemadu mar rega di dunya, berega setengah juta ringgit ba pasar menua Malaysia.
Dalam pengelama setaun kerita nya, ti direjista ngena lumur WNX9776 udah suah dipejalaika di sebelah nengeri Kuala Lumpur ulih Mohd Nedim, iya nya anak siku menteri ba Opis Menteri Besai, Mohd Nazri Abdul Aziz.
Kerita nya dikena sereta dipejalaika bala penyaga Mohd Nedim, ti suah dipeda ngiring nembiak playboy nya ti bejalaika mayuh bengkah kerita lumba ti berega mar ti dikerinduka iya ti bukai.
Tang kerita Hummer 2 nya ukai direjista atas nama Mohd Nedim tauka nama apai iya, Mohd Nazri, tang atas nama pengempu asal iya, Michael Chia Tien Foh, siku peranak menua Sabah ti nyadi kroni ke Kepala Menteri Musa Aman ti kala diuji ‘diperesi’ nama ketegal bisi dikaitka enggau kes iya ti kena tangkap laban udah nguji deka mai duit RM40 juta pansut ari menua Hong Kong tama ke Sabah dalam taun 2008 suba!
Sarawak Report diatu bisi nyimpan mayuh gambar kerita Hummer 2 ti belumur WNX9776 nya ti diengkahka ba rumah penthouse enggi Mohd Nedim ba bangunan Clearwater di Damansara Heights, Kuala Lumpur. Nembiak nya, ti udah bisi kes ngereja pengawa kasar diatu suah dipeda bejalai-jalai sama enggau penyaga iya.
Tang surat saman ti diayanka dalam blog ba jaku English tu nya tau bendar nyadika penerang madahka kerita Hummer 2 nya agi enggi Chia, ti udah manah ati meri kerita nya ngagai Mohd Nedim ti lalu dikena sereta dipejalaika Nedim enggau laju lalu ngelanggar atur jalai alun ti lalu ngujungka surat saman nya dikeluarka!
Kerita Hummer 2 nya diatu ditemu raban pemansik SPRM nyadika sebengkah ari mayuh bengkah reta-tengkira enggi Chia ti benung dipansik ketegal bekaul ba penyalah ngubah duit di Sabah. Lalu diatu kerita nya udah ba jari Nedim anak Mohd Nazri Aziz ti nyadi menteri ti betanggung pengawa atas opis SPRM.
Ari ketegal Mohd Nazri Abdul Aziz nya ti nyadi menteri betanggung pengawa atas opis SPRM, enggau nya Chia ngena peluang ngaga kaul ti manah enggau sida sebilik, sepengudah iya ti kena tangkap di Hong Kong dalam taun 2008.
Enggau nya kami udah nanyaka nama kebuah Menteri Nazri Aziz (tauka anak iya, Nedim) patut nerima pemeri ari siku orang ti udah ditemu bisi penyalah lalu benung dipansik opis ti dikemataka iya empu, tauka meransang ngemanahka kaul enggau siku orang ti benung dikaitka dalam sebengkah kes penyalah beprofil tinggi nya?
Repot kami tu dituliska sepengudah kami ninga jaku penerang ari Nazri Aziz ti madahka iya semina nyadika ‘pangan’ ke Michael Chia, sepengudah anak iya, Mohd Nedim, ditemu kala nerima mayuh kerita ari Chia nya.
Pengerembai berita tu deka mai empas lalu nanggul politik ke lebih agi ngagai UMNO-BN, udah Nazri mansutka penerang ti madahka dawa ba Chia nya udah dibatak lalu nadai agi bekaul enggau penyalah ngubah duit tauka bekaul enggau Kepala Menteri Sabah, Musa Aman.
Bala pemerati tentu deka nemu nama kebuah Nazri enda mansutka penerang ti madahka iya empu bisi bulih penguntung ari pengawa anak iya ti ngembuan kerita nya lebuh maya iya mansutka penerang kena 10 haribulan Sepuluh suba ti endur Chia dalam pengelama empat taun tau dikumbai enda salah, laban duit RM40 juta ti deka dibai pansut ari Hong Kong ngagai menua Sabah nya endang duit ke parti UMNO Sabah, lalu ukai deka diberi ke Musa Aman!
Menteri nya madahka kaul iya enggau Chia nya semina bakih aja, tang iya madahka diri enda nemu Chia nya bisi meri kerita ngagai anak iya. Baka ni munyi saut ari Nazri ba pasal pengawa anak iya ti ngelumuka mayuh macham kerita berega mar. Nemu tauka enda Nazri pasal anak iya ti suah dipeda ngereja pengasar ba orang bukai sepeneka ati iya?
Tu meh chara bala kaban UMNO/BN bedalih tauka besilat lebuh udah kena tuduh, lalu sida rindu bendar meri penerang ti suah beubah-ubah.
Mensia mayuh diatu udah diberi saut ti mar deka dikarapka lalu enda tetap tiap kali sida dituntung penerang-penerang ti baru bekaul enggau kes di Sabah nya.
Ke terubah iya suba, udah Chia ditangkap bala pemansik ICAC di Hong Kong lalu udah nya dipansik raban pemansik SPRM dalam taun 2008, bala orang BN mayuh didinga nguji bebulaka berita nya.
Lawyer Bansa, Abdul Ghani Patail (iya nya siku ari kaban belayan Musa Aman empu) udah ditemu enggai meri kereja sama enggau raban pemansik ICAC, ti ngujungka 3 taun udah nya, sida ICAC lalu ngetu bejalaika dawa sida dalam taun 2011. Ghani Patail mega udah enggai bedawaka 40 iti tuduh ari SPRM.
Beserimbai enggau nya Chia udah bebulaka penerang ti madahka iya kala kena tangkap, tauka bisi kaul enggau duit RM40 juta, tauka bisi kaul dagang enggau orang ti benama Musa Aman. Baka nya mega Musa Aman udah bebulaka penerang ti madahka iya bisi kaul enggau Chia.
Tang ba beberapa bengkah repot kami dulu ari tu ti digembarka kami enggau mayuh penerang ngagai raban SPRM, Chia endang ditemu bejalaikan mayuh akaun dalam bank Switzerland dikena iya mindahka duit beratus-juta ringgit masuk ngagai akaun bank Musa Aman ti bepalan di Switzerland.
Kami mega kala mansutka repot ti madahka sekeda akaun ti dikemataka Chia dikena iya mayar belanja sekula bala anak Musa Aman sekumbang sida ti belajar di menua Australia. Bayar nya udah dibantu bank UBS ba sebengkah kes ti bukai ti benung dipecharaka di Singapura.
Penerang-penerang kami nya dientudika enggau jaku penerang ari opis Lawyer Bansa ke menua Switzerland ti madahka sida udah bejalaika pansik atas penyalah ngubah duit ti dikereja bank UBS di menua sida ti bisi bekaul enggau kes Musa Aman-Chia nya.
Diatu penanggul tu udah mai empas ti enda manah ke BN ti endur cherita-cherita sida seruran ditemu beubah-ubah. Ba bulan Enam taun tu tadi, Menteri Besai Najib Razak udah madahka raban SPRM udah nyerahka repot sida ngagai Lawyer Bansa Ghani Patail lalu madahka Musa Aman nya endang bisi kaul dalam kes Chia nya. Lama bendar Musa Aman enda engkeretik udah nya.
Tang, enggau enda mukai-mukai dalam tengan bulan sigi nyin kemari, Mohd Nazri Aziz udah nyadi tuai raban orang ngaga serang balas ke semua tuduh nya. Ba sebengkah cherita, BN madahka Chia ditangkap laban nguji deka mai duit RM40 juta ngagai Musa Aman, tang ba cherita ke bukai, BN madahka nama Chia enggau bala bakih iya udah ‘diperesi’ ari sebarang tuduh.
Ba aum parlimen kena 10 haribulan Sepuluh dia Nazri udah mansutka penerang ti madahka Chia kala udah ditangkap ketegal deka nguji mai duit RM40 juta ngagai Kepala Menteri Sabah, tang enda lama udah nya seduai iya udah dipadaka mindahka duit nya ngagai tabung parti UMNO Sabah, lalu ukai ke guna Musa Aman empu!
Bala pemerati diatu benung dikelakar enggau penemu ti madahka sebarang pemeri politik ti datai ari pengawa makai suap bekaul enggau lisin kayu batang nya ukai penyalah makai suap ti berat enti dibandingka enggau pemeri ke guna orang siku-siku. Bala pemerati mega udah ditejuka nganti penembu asil pansik enggau pengawa Musa Aman enggau Chia ti seruran bebulaka sebarang berita tauka cherita ti bisi bekaul enggau seduai. Enti ‘pemeri politik’ nya ukai dikumbai sebengkah penyalah, nama kebuah semua tuduh nya disakal ngelama nya?
Tang menteri Nazri Aziz nya enda tembu naka nya. Enda lama udah nya sida lalu nempa cherita ke baru agi madahka opis ICAC di Hong Kong udah ‘madamka’ kes Chia nya, taja pan ke bendar, opis nya udah nangguhka pansik sida ketegal enda mujur ngulihka kereja sama ari opis Lawyer Bansa Malaysia.
Ari ketegal opis ICAC ti lalu nadai mansutka sebarang penerang, menteri Nazri Aziz enggau bala bakih iya enda ulih ngamatka sekali ke Chia nya amat udah ‘beresi’ ari penyalah iya ti kena tuduh di Hong Kong.
Ke penudi iya, sida ngaku duit RM40 juta nya endang diuji dibai enggau chara belalai tama ke menua Sabah, lalu Chia udah ditangkap ti udah nya ngujungka duit nya dibeku lalu dipansik, Nazri Aziz lalu bisi didinga besilat penemu ti udah nya endur iya madahka Chia enda kala ditangkap ketegal penyalah nya!
Nya alai, nama kebuah pansik nya dipejalaika dalam pengelama 4 taun?
Terang bendar diatu kerita Hummer 2 nya ulih dikena meli sukung ba penuduk ti tinggi. Kerita bansa nya udah dikira sebuah ‘injin macho’ udah iya dikena bala bintang filem Hollywood baka sida Arnold Schwarzeneggar ti berengkah bejalaika kerita nya dalam mayuh filem dalam taun-taun 1900-an suba.
Terang bendar mega nembiak ti benama Mohd Nedim nya mudah dilembutka ati ngena pemeri kerita ti berega mar nya lalu iya mega nemu rega penuduk ti tinggi nya.
Tang, enggau chara ti nerima pemeri nya udah ngujungka apai iya napi mayuh macham jaku tanya nama agi pemeri bukai ti diterima iya dikena iya ngelindung Chia? Agi mega mayuh bendar repot pasal pemindah duit beratus-juta ringgit dikereja lalu menteri Mohd Nazri Abdul Aziz diatu nyau semakin chakah agi ngelindung Chia!
Diatu, Mohd Nazri Abdul Aziz patut mansutka penerang ti meruan lalu kitai enda tau enda nganti iya mansutka sekeda cherita baru ti nyelai-nyelai enggau mega sekeda chara iya ti deka bebula cherita enggau tuduh ti udah pansut dulu ari tu.