Pangan dagang ke Kepala Menteri Taib Mahmud iya nya menyadi iya empu, Onn Mahmud, udah dipelabaka ngelarika diri lalu belalai sereta enggai nyaut sekeda tanya di nengeri Sydney, ti endur iya enggau sida sebilik diau ba sebuah rumah ti pemadu pintar di nengeri nya.
Sekeda surat penerang ti mujur ditemu Sarawak Report nya nunjukka Onn Mahmud bisi udah meri penerang ti enda senutuk ngagai opis-opis pekara dagang ba perintah di Australia ba pengawa iya ti minta visa bedagang lalu udah nya dikena iya mai pansut asil ari pengawa dagang reta-tengkira iya ti manggai beratus juta dollar dalam mata duit Australia.
Penerang-penerang ti enda betul nya diberi iya ngagai opis-opis perintah di Australia nyengkaum penerang ti ngumbai kompeni iya nya kompeni ari menua luar, Ryan Park Limited, ti dikena iya melanja peminta ke visa iya nya ke bendar “Kompeni Ngatika Diri Australia” ti berejista di Australia.
Kami udah mujur ngayanka Onn Mahmud udah meli lalu udah nya nyual puku ti diperanakka iya ti manggai beratus juta dollar di nengeri Sydney, nengah sebengkah jarin kompeni-kompeni menua luar, ti bepalan di gerempung pulau Cayman lalu dikemataka sebengkah bank menua Amerika ti tebilang, Merril Lynch, ari opis sida di menua Isle of Man.
Peminta ke visa nya, ti dianjung menyadi Kepala Menteri Sarawak nya ngagai opis-opis perintah di Australia, terang bendar nunjukka kompeni Ryan Park Limited enggau bala pangan dagang sida (ti semua nya dikuasa penuh Onn empu) ngembuan reta-tengkira di Australia ti lebih ari A$50 juta.
Peminta nya terang bendar ngayanka Onn mangku pengawa “Pengurus Am – Australia” ke semua kompeni nya, ti endur iya mega nyadi “pengereja pengawa tunggal”, lalu ngerepot diri terus ngagai raban Pengarah”. Tang, Onn nya nyadika pengempu nengali semua kompeni nya.
Tang kami ulih ngamatka penerang ti madahka Onn udah meri penerang ti enda betul dikena iya ngulihka Lumur Dagang Australia (ABN) ke guna siti ari kompeni iya, Ryan Park Limited, taja pan kompeni nya nadai dipasukka dalam lis regista kompeni menua Australia (ASIC).
Sebengkah agi kompeni iya, Ferncroft Limited, udah direjsita nyadi “entiti bukai ti ukai korporat”. Ba atur dagang menua Australia, leka jaku tu patut dikena ba sebarang gerempung ti ngempuruka “seraban orang ti ngembuan tuju ti sebaka lalu raban sida nya sebaka reti enggau sebuah kelab, ambi ke banding, kelab lumba enggau main, kelab ngelantangka ati tauka gerempung pengereja pengawa”.
Gerempung ti baka nya enda tau enda “baka sebuah kelab” ti bisi “kaban” lalu “bisi atur baum ke bala kaban sida” lalu “nagaka pengawa ti dipangku bala kaban”. Enggau nya, Sarawak Report deka betanya sekali ke pengawa ngerejista kompeni nya senutuk enggau chara ngerejista sebengkah kompeni reta tengkira ti ngemansangka lalu udah nya nyual rumah opis ba Elizabeth Street, ba tengah-tengah nengeri Sydney dikena sida ngulihka untung ti besai.
Dua bengkah agi kompeni ti dikemataka Onn (iya nya Golden Arrow enggau Cherry Blossom) ukai direjista ngena lumur ABN ke guna opis chukai, taja pan peminta iya ke visa iya nya terang bendar nunjukka kompeni-kompeni nya bisi reta bejuta-juta dollar ba dua buah hotel.
Kelimpah ari nya kami udah mujur ngiga empat bengkah kompeni ngagai gerempung pulau-pulau Cayman, ti endur semua kompeni nya dikorporatka nyadika kompeni “ukai asal” lebuh maya visa nya dipinta (taja pan 3 buah ari sida nya nyengkaum Ryan Park Limited, ti diatu udah dikeluarka ari lis rejista).
Pekara ti nyelai ba pengawa ngerejista kompeni-kompeni enggi Onn Mahmud nya udah narit ati opis pengumpul chukai menua Australia, ti endang ngarapka semua kompeni nya direjista enggau chara ti betul.
Onn Mahmud udah nusui cherita ti bebida bekaul enggau Ryan Park Limited, udah bekau kompeni nya mujur bulih untung ari nyual sebuah blok rumah tinggi, Oakford Apartment, di sebengkah endur di Sydney, Wylde Street, di Potts Point.
Ba maya iya ti minta visa Onn Mahmud udah ngerekodka Ryan Park Limited nya sebengkah kompeni ngatika diri menua Australia lalu nyeretaka pelan dagang ti silik dikena ngemansang Oakford, lalu iya mega bisi madahka deka nyediaka pengawa ti mayuh.
Iya nambah, blok rumah nyadika sebagi ari portfolio hotel, opis, rumah tinggi enggau kedai makai ti dirintaika nyadika sebagi ari dagang iya ti besai agi di Sydney, nyengkaum blok opis ba Lumur 287 Elizabeth Street, The Boundary Hotel enggau The Valentine Hotel ba George Street.
Tang, 5 taun udah nya Onn Mahmud udah nyual baru reta tengkira nya ba rega A$15.5 juta enggau untung A$11 juta ari rega asal iya ti semina A$4.5 juta aja. Dia bank Merril Lynch di gerempung pulau-pulau Cayman udah nyain sebengkah SD di Isle of Man, ti madahka Ryan Park Limited nya kompeni menua luar ti enda berejista, ti nadai bedagang di Australia lalu nadai mega ngembuan ARBN.
Kami minta Onn Mahmud ngemetulka semua rekod ti bekaul enggau semua kompeni iya ti bisi ba opis perintah ti bisi kaul nya.Dikena kami nambahka rekod ti bisi ba kami, Onn Mahmud udah ngetu nyadi Pengarah ba Valentine Hotel ba George Street dalam taun 2004 lalu nyerahka pengawa nya ngagai bini iya, Halimantan Abdul Ghani, ti ngemataka dagang sida sebilik nengah kompeni Donmastry.
Nyerumba nya Sarawak Report alit bendar ati ke pemansang anak puku dagang Onn Mahmud ti nyelai bendar pemayuh di menua Australia, lalu kami deka betanyaka baka ni siku ari menyadi Kepala Menteri tau ngembuan bejuta-juta dollar dipedagangka?
Enggau penuduk Onn ti nyadika siku ari Orang Politik Ti Diayanka (PEP) ari menua Malaysia, jaku-jaku tanya tu enda tau enda dipansik dulu ulih semua bank ti deka mantu iya bedagang laban tukuh pengawa dagang iya nya sebengkah penyalah ngubah duit.
Sekali ke jaku tanya nya deka ngayanka Onn Mahmud nya siku orang dagang ti bejalaika pengawa iya ari sukung perintah menua ti udu makai suap ti diperintah menyadi iya empu?
Dulu ari tu Sarawak report kala udah ngayanka sekeda surat penerang, lalu dalam kandang beberapa taun tu Onn Mahmud udah nyadika pangan dagang ti terang bendar ke menyadi iya empu, Abdul Taib Mahmud ti nyadi Kepala Menteri Sarawak.
Ambi ke banding, Onn Mahmud udah nyadika Pengarah ke terubah dalam kompeni Sakto enggi sida Taib Mahmud sebilik di Kanada, ti kenu ku Taib, udah ditubuhka ngena duit Taib empu dalam taun 1983. Onn mega kala nyadi pengarah ke terubah dalam kompeni Sakti di menua US. Bala pengarah ti bukai dalam kompeni Sakti nya bala anak Taib, siku agi menyadi iya, Arip Mahmud lalu ba kes Sakti, Taib Mahmud empu!
Iya ke nyengala agi, Onn udah nyadika Pengarah Urusan enggau orang ti megai mayuh agi share dalam kompeni Taib di Sarawak, CMS, ketungkah sida Taib sebilik ngambi kuasa ba kompeni nya dalam taun 1989 nyentuk ngagai maya iya diserahka ngagai bala anak Taib empu ti nyadi raban pengarah dia dalam taun 2004.
Nyerimbai nya, Onn Mahmud (enggau bini iya) mega nyadi pemegai share ti pemadu mayuh lalu nyadi pengarah ba kompeni iya empu, Achi Jaya Sdn Bhd, ti ngemataka pejalai kompeni Achipeligo enggi Taib Mahmud ti udah diberi monopoli dagang (i.e. dagang nengali) ngeluarka lisin ngangkut kayu batang pansut ari menua Sarawak.
Nitihka penerang ti tiris ti bisi diberika ngagai Sarawak Report, dagang nengali nya US$2 billion setaun dalam pengelama 30 taun ti udah, dalam duit suap. Dalam taun 2007 raban ari opis pengumpul chukai Jepun bisi tetemuka pemayuh duit chukai beberapa juta dollar udah dibayar seraban kompeni kapal ngagai kompeni Regent Star enggi Onn Mahmud di menua Hong Kong.
Sarawak Report udah mujur bulih penerang ti madahka duit dikena meli reta tengkira di Sydney ke kompeni-kompeni Onn Mahmud udah dikirumka bank Meeril Lynch ari Hong Kong nengah pampang opis sida di Singapura.
Kami mega dipadahka ke semua portfolio tu dikemataka indu bank US tu (tang diatu udah dipejalaika Bank of America) ti ditubuhka di menua Isle of Man, ti ngemataka semua kompeni di gerempung pulau Cayman. Sepengudah kompeni-kompeni bukai nya diketuka pejalai sida, reta tengkira sida lalu dikemataka nengah sebengkah kompeni ti agi bejalaika pengawa, Golden Arrow Limited.
Tu nyadika sebagi ari reta tengkira enggi Taib Mahmud ti bisi disimpan tauka dipejalaika di menua tasik, ti ditemu kami ti dijaga iya ngena servis bala nomini iya ti dikemataka seraban bank tebilang ba ikas entarabansa.
Tu udah nyadika sebengkah atur pengawa dikena balalaika identiti Onn Mahmud ti nyadi orang ti ngemataka semua duit enggau reta tengkira sida nengah menua Australia sepengudah tembu pengawa bejual-beli reta tengkira ti mujur dikereja sereta meri penguntung ti mayuh bendar.
Pemuntan menua Malaysia ngemunaska penyalah makai suap, enda ulih ngelepaska bank-bank entarabansa baka sida Merril Lynch tu ari kena tekan atur sida empu lalu mega undang-undang menua Amerika ba pengawa kamah mantu penyalah ngubah duit, baka ti kala dikereja bank UBS ti diatu benung dipansik ketegal mantu penyalah ngubah duit ngarika Kepala Menteri Sabah, Musa Bin Aman.
Ditu, kami deka enchabar pengelurus Bank of Amerika ngambika meri kami penerang nama bansa atur pengawa ti dikereja bank Merril Lynch dikena sida nentuka beratus-ratus juta dollar ti dilalaika Onn ti dikemataka sida di menua Isle of Man nya ukai penguntung ari duit ti diubah enggau chara kamah asil ari pengawa betebangka kayu batang di menua Sarawak?
