Pengerembai penemu mensia mayuh di serata dunya pasal stail perintah Taib ti dibalut penyalah makai suap udah ditusui sebengkah suratberita ti tebilang di menua Australia, Canberra Times.

Artikel ti ditulis nya udah ngutuk “pengawa ngerusak kampung ujan tropik di Borneo” enggau “Singkang Pemansang Besai Ke Mua” Taib ba perambu iya ngaga 12 buah tekat ai ti besai-besai.

Pengeluar semua komen dalam media ti tebilang di Australia nya dipeda nyadika kelai mensia mayuh di serata dunya diatu udah nemu pengerangka Abdul Taib Mahmud ti bejalaika atur ngerusak rampa menua ti nyelai di Sarawak lalu pia mega ngerumpak reta pesaka rakyat iya empu.

Ba minggu nyin kemari, sebengkah kompeni ti meri sanding penemu dalam pengawa ngaga tekat ai “gila” iya, Hydro Tasmania, udah madahka diri matak diri ari semua projek ti diperambuka nya sepengudah sida ti napi mayuh jaku bantah orang. Tekan ti baka tu dipelabaka deka majak nambah, lalu gerempung dagang ti tebilang nama, baka International Hydropower Association (IHA) ti disadang deka ngatur aum besai di Kuching dalam taun 2013 tu ila, patut berunding panjai ke artikel ti ditulis dalam suratberita di Australia nya.

Sebengkah Kertas Burak pasal kaul menua Australia dalam Asian Century madahka, ti endur kitai deka nukar penyai enggau “mayuh peluang ti semak kitai”. Tang tuju iya terang bendar – ngulihka penguntung-penguntung ti semak enggau kitai.

Kertas burak nya nyadika katalog ti meruan pasal nama utai ti diulihka bala orang Australia ari ubah ti nyadi di Asia. Semua tu dipeda enggau chara eksklusif ari sukut ekonomi lalu tiap iti nya udah ditemu mai penguntung.

Sapa-sapa orang tentu deka napi pemar ngiga sebengkah-sebengkah penerang ti bekaul enggau pengerusak rampa menua di Borneo; nunu kampung, betebangka kayu batang enggau beempangka batang sungai; mejal nembiak mit bekereja tauka penyalah makai suap.

Sekumbang aku ti macha sebengkah artikel, aku bisi betanya ngagai opis ti diberi tanggungpengawa – iya nya Opis Menteri Besai – ngambika ulih mantu aku. Semua jaku tanya aku nya lalu dianjung ngagai opis menteri Craig Emerson. Dini endur aku ulih tetemuka jaku randau pasal:

1. Rampa isu ti besai agi bekaul enggau chara perintah di menua-menua Asia bejalaika atur sida?

2. Atur perintah enggau prosiding dalam court ti terang?

3. Nama bansa atur tauka undang-undang ti patut dititihka kompeni-kompeni ari menua Australia ti deka beranakka puku di menua-menua Asia, bekaul enggau standard bebasaka rampa menua enggau atur ngambi pengereja pengawa?

4. Menua Australia nerima peluang beranakka puku begulai enggau bala orang dagang ari Asia ti ngereja penyalah makai suap?

5. Sebagi ari kuasa-kuasa pengelantang enggau pengelikun mensia, ti nyengkaum kuasa-kuasa orang bansa asal ba tanah pesaka sida empu?

Aku mega patut betanya pasal pengawa nyeliahka chukai, pemindah tauka ubah rega barang enggau atur ti enda setipak.

Tang aku nemu bala penulis keretas burak nya enda tentu deka ibuhka pekara ti ditanya nya. Bala orang ti merinsa tentu enda meli barang kitai. Lalu utai ti deka diperatika bala penulis nya iya nya bala orang ti bedagang ti kaya-kaya deka terus betapat dalam dunya dagang kitai.

Sapa ti deka kiruhka baka ni chara sida bulih pengeraja, amat meh kitai ulih ngenchuri ari sida?

Aku beratika pengerembai ekonomi enggau pemansang nya utai ti manah. Bala rakyat enda tau ditejuka idup dalam pemerinsa. Diatu menua Singapura udah nyadi sebengkah menua ti nyamai agi endur rakyat iya diau enti dibandingka enggau dalam taun-taun 1970 suba.

Tang menua-menua ti benung mansang patut beratika bansa pemansang lalu baka ni deka ngulihka iya. Melakangka rakyat awakka meri peluang ngagai sekeda orang nyadi kaya raya nya ukai chara ti nengkeman.

Ambi ke chunto, perambu perintah Sarawak ti deka ngaga kandang industri ti besai bendar rampa (SCORE), ti deka dibekalka enggau kuasa elektrik hidro. Iya dipeda nunda sereta nandu chara pemansang ti udah kala dikereja perintah Soviet Union dalam taun-taun 1930 menya, tauka nunda chara menua China Nyingkang Jauh Ke Mua, perintah Sarawak udah nimpai pengerembai GDP lima kali lipat datai ba taun 2030, enggau chara nyendiaka 1.6 juta pengawa lalu mega penambah ba pemayuh tubuh dua kali lipat lalu manggai 4.6 juta iku.

Dua belas buah tekat hidro dipeda ulih dikena bejalaika pengawa nya. Sebuah ari tekat nya, Bakun, diatu benung dikena, lalu kedua, tekat Murum, ti nyau deka tembu gaga. Tang, datai ke sehari tu perintah menua Sarawak lalu bedau bulih menua tauka sapa-sapa ti deka meli kuasa elektrik di dikeluarka ari tekat Bakun.

Tang, enggau bantu ari orang ari menua Australia, perambu ngaga tekat Baram dipajakka, ti deka dikena muru 20,000 iku orang bansa asal di pelilih menua nya. Nya udah nyadika sebengkah pengawa orang ti bisi penyakit untak. Baka ti suah disadaka bala orang ti mantah iya, orang ti nyadi pemekal pemadu besai ngagai pengawa ngaga tekat nya – nyengkaum mekalka simin – iya nya kompeni-kompeni ti bisi kaul terus enggau sida kepala menteri nya sebilik. Lalu dikena nimbal pemanah budi ketegal diberi peluang bedagang nya, sida sebilik dikangauka beranakka puku di menua Australia.

Dalam jam ke diatu perintah Australia enggau raban penyakal di menua nya nadai agi utai ti tau nyadika isu ke dipetalatka entara sida empu, lalu kitai tentu enda alit ati enti sida enda ibuhka utai ti benung nyadi di luar menua sida empu. Tang, sekali ke menua-menua China, India, Malaysia, Indonesia tauka menua bukai nya rindu tauka enda, atur ti bechiping nya patut diapuska. Pia mega penyalah makai suap.

Digempungka, sida udah mangkitka jaku-jaku tanya ngagai menua Australia. Sekali ke kitai tau bepuas ati enggau chara sida bedagang enggau bala orang dagang ti seruran ngiga chara bedagang makai suap?

Ukai semua orang di menua Australia nya bejalaika pengawa dagang enggi perintah enggau chara ti beresi, baka ti diterangka nengah perintah Labour NSW bekaul enggau pengawa ngeluarka lisin ngulihka arang batu, lalu pia mega jaku-jaku tuduh dalam penyalah makai suap ti nyadi dalam Securency. Ulih kitai meri sebengkah-sebengkah utai ti tau pulai ke pemansang atur perintah ti manah agi enggau chara ngatur jaku randau dikena ngemunaska penanggul-penanggul tu?

Menua-menua jiran kitai dalam pelilih menua Asia tentu bisi ati deka nemu baka ni chara kitai ngatur pengawa tu.

Kitai tau ngelakuka pemanah pendiau ti tampak lebuh mansik jaku tuduh lalu narit perati raban pengarang berita enggau utai ti ke guna dikena kitai nyaga pengelikun bala penyepu wisel ti deka meri penerang pasal penyalah makai suap.

Juluk ati ti bendar nuliska keretas burak nya enda jauh bebida ari keretas burak ti digaga kitai adap ke utara. Siku penulis dalam suratberita Jakarta Post meri jaku komen iya keretas burak nya lebih agi Austro-sentrik ti endur mayuh isi dalam artikel nya ditulis meragamka menua Australia deka bulih untung ari ngaga kaul dagang enggau menua-menua di Asia, enggau enda ibuh meri pulai sepemayuh ni ti diulihka.

Enggau meri chunto ti jauh agi, penulis udah mangkit jaku tanya pasal kaul menua Australia enggau universiti-universiti menua Asia ngambika ulih dikena narit bala nembiak enggau bala pengereja pengawa ti landik-landik.

Lalu buah penemu penulis nya bisi bendar pengamat. Kitai tau bulih penguntung lebuh kitai ngambi pengereja pengawa ti manah-manah – bala lutur ari menua Asia ti agi biak, bala engineer enggau bala saintis. Menua-menua Asia ti benung mansang deka napi pengerugi ti besai ari chara ti lenyau bala orang ti landik-landik nya. Tang datai ke diatu mengkang nadai jaku randau ba chara mutarka penanggul ti nuntung menua-menua Asia tu.

Keretas burak nya udah ngaku tebal agi orang di menua Australia udah salah sangka ba menua-menua Asia. Iya madahka bisi sebengkah pol undi udah dipejalaika ba taun nyin kemari bisi tetemuka mayuh orang Australia endang ngumbai menua Indonesia dipegai perintah soldadu, taja pan menua nya ngumbai diri diperintah ngena atur demokrasi.

Menua Indonesia endang amat bebendar ngereja mayuh macham pekara dikena sida ngemansangka diri lalu sida mega bisi ngatur pengawa bepilihbesai. Tang perening bala orang Australia agi enda nengkeman. Raban soldadu Indonesia ngena kuasa sida lalu, ba sekeda pelilih menua, baka tunga ke barat Papua, pengawa ngayanka bantah ti chelap endang dipadamka enggau chara kasar ngena kuasa soldadu.

Perintah seruran merambuka chara ngemanahka nama nyadika induopis ba pelilih menua tu dikena ngemataka bala pengurus ti besedia deka ngatur pengerembai pengaya ba siti-siti pelilih menua. Pengawa tu dikereja enggau enda melakangka peninggi integriti ba sistem merintah menua.

Aku arapka pengawa tu enda bekaul enggau penyalah ngelanggar atur enggau undang-undang ti tau bendar meri peluang ngagai bala penyamun bekereja, lalu ba maya ke udah-udah sida nya udah mai penanggul ba pengidup, penatai pemisi enggau belanja bala rakyat.