Enggau betambah berita pasal pengawa bebelika undi di menua Sarawak, kami ulih mantaika mayuh agi penerang asil pansik komisyen kuasa mensia Malaysia, Suhakam.
Pengawa jai ti dilancarka Taib enggau bala kroni iya dikena ngambi tanah raban bansa asal di Sarawak.
Chara-chara tu nyengkaum pengawa kasar, emba, pejal enggau meri duit suap.
Repot Suhakam nya ngayanka guna raban apek bayat; ngejil bala orang ti bempu tanah asal ti enda besalah enggau meri duit suap ngagai bala tuai raban bansa.
Repot nya mega nunjukka kali keterubah iya tuju orang ti angkat ringat laban bala orang ti bekaul enggau perintah nya meh orang ti bulih penguntung ari pengawa berampaska tanah.
Repot nya meh ti teguh bendar dipelalaika BN ba musim bepilihbesai tu, lalu enggau nya nama agi utai dikarapka rakyat ti endur perintah deka mutarka penanggul udah tembu bepilihbesai ila baka ti diansak dalam repot nya.
“Bala orang politik enggau orang ti bepengaruh”
Sama bisi dibantaika dalam Sarawak Report sehari tu nya nama sekeda orang politik enggau orang ti bepengaruh bekaul enggau projek ti besai-besai, mayuh agi ari bala sida nya udah muru orang bansa asal ari tanah sida empu.
Sida nya nyengkaum bala menteri BN baka ti udah direpotka kami: Naroden Majais, Awang Tengah Ali Hassan, James Jemut Masing, Alfred Jabu Numpang, Wilson Ugak Kumbong, Tiong Thai King, Mohd Leo Michael Toyad enggau sida Alexander Nanta Linggi sebilik ti bempu kompeni Keresa Plantation ti nyadi penerima lisin ba tanah 14,883 ekar di menua Bintulu kenyau ari 1995 enggau rega semina RM44,640. Nitihka rega diatu (baka ti dikangauka petunggal Taib iya nya Fatimah Abdul Rahman) tanah Keresa Plantation nya dipelabaka manggai RM60 juta.
Nama bala orang di atas nya tadi nya sekeda ari raban orang politik enggau orang ti bepengaruh di menua Sarawak.
Tang kami arap bendar sekeda ari sida tu dipilih nyadi pengari ngena tiket BN bedau ngulihka penguntung ari pengawa ngeruga tanah-tanah NCR nya.
Baka ke ngelama tu tanah-tanah nya endang diempu bala pengundi sida, ti diatu semina diberi beberapa ringgit ke siti undi lalu dikarapka tau nirika sida ba penuduk wakil rakyat sida ngambi ulih terus ngulihka pengeraja di Sarawak.
Bala kroni politik tu mega nerima lisin nebang kayu batang lalu mega enggau kontrak ari perintah menua ti nyadika upah sida ulih ngansak raban bansa ti diarika sida meri pechaya ke Taib enggau BN.
Kelimpah ari sida Taib sebilik enggau bala kroni dagang iya, ti udah ngerumpak mayuh agi tanah orang bansa asal, tang diatu udah ngubah kandang kampung nyadi kebun dandang besai sawit ti bedebu lalu endur nugungka bala orang Indonesia bekereja.
Kompeni-kompeni nya udah diasuh nyuap duit ngagai bala pengundi baka ti dikereja di pelilih menua Baram. Tang bala pengundi ti nyambut duit suap nya patut meretika utai ti dijual sida udah sida bulih duit nyampau nya – ke bendar iya sida nyual tanah enggau menua diri ba rega ti mimit bendar.
Chara-chara kamah Taib ngerampas tanah
Repot Suhakam (Bagi 7) nerangka enggau silik baka ni Taib udah ngaga sebengkah sistem dikena ngerampas tanah-tanah NCR, iya nya numbuhka pengawa “Dagang Kunsi” ti ngasuh orang bansa asal saru laban pengawa dagang baka nya patut meri untung ngagai semua piak orang ti enggau masuk pengawa nya.
Repot nya madahka endang nadai sebarang penampak lebuh ti numbuhka dagang kunsi nya lalu nadai sempekat entara kompeni-kompeni ti ngereja kampung enggau bala orang ti bempu tanah nya.
Tang Taib udah maduka PELITA (LCDA) ti betuaika iya empu nyadi “Pengibun Reta” ke bala orang ti bempu tanah lebuh iya bejalaika jurai enggau kompeni ti udah bulih lisin enggau konsesyen ari iya ti nyadi menteri nya.
Nudukka Taib ti rangka enggau mega PELITA ngatur pejalai tanah ke bala orang bansa asal nya enda salah-salah baka reti kitai ti ngengkahka siku baya ngemata tauka ngibun bala anak kitai! Munyi ku sempama jaku Melayu “harapkan pagai, pagar makan padi”
Kompeni-kompeni pemegai konsesyen bulih kuasa penuh
Pansik nya mega bisi tetemuka sempekat ti diulih Taib ti ngarika orang bansa asal ti “udah meri kuasa ngatur pengawa ngagai kompeni-kompeni ti nentuka sida nya enda dikachau bala orang bansa asal dalam pengelama 60 taun”.
Ulih kita pechaya ke bala orang ti bempu tanah-tanah NCR nya deka besetuju enggau Taib, enti sida dikemendarka nyain ngarika sida empu?
Lalu baka ni enti orang bansa asal ba sekeda endur ngaga pemutus runding enda besetuju enggau semua langgur ti digaga Taib ngarika sida?
Ba Undang-undang Tanah Sarawak (ti diatu udah ditemu enda senutuk enggau Konstitusyen) bala orang bansa asal ti seranta nya ulih dialahka ngena undang-undang lalu tanah sida ulih diambi ari sida!
Penyarut
Ngena sistem ti baka nya lalu diumbaka perengka pemadah enggau pemindah mensia ti enda manah lalu pengurang kerejasama ari bala orang enggau kompeni ti bekaul enggau repot Suhakam nya madahka penyarut enggau pengawa nirika empang jalai bisi diatur ba sekeda endur di Sarawak.
Sarawak Report udah ngerekod mayuh kes nyerang enggau ngemba ti sengaja diatur dikena beduan bala orang bansa asal ngambika ninggalka tanah sida empu.
Nitihka penerang ari siku saksi dalam pansik Suhakam nya “sebarang sapa ti betanyaka pengawa pemansang deka dikumbai ngelaban pemansang. Semua tanah di Sarawak nya tanah enggi perintah menua, lalu repot polis ari raban bansa asal enda dikibuhka”.
Semina kaban-kaban politik enggau bala kroni sida aja ti bulih untung – ofisyel!
Dagang kunsi tu endang nadai meri sebarang penguntung ngagai bala orang bansa asal. Orang ti bulih untung ari pengawa nya semina bala orang politik, baka sida Naroden Majais enggau Awang Tengah, ti diatu benung napi pengeringat bala orang bansa asal di Melikin.
Di menua Melikin, sebengkah kompeni ti benama United Teamtrade udah mai pengerusak ngagai tanah NCR lalu nibarka jaku tuduh ti bula dikena ngelaban orang ti bempu tanah ti madahka sida udah ngerusak perengka kompeni lalu ngachau pejalai pengawa kompeni nya ti ngujungka sida semenua nya ditangkap polis.
Sebengkah empang jalai didirika enggau chara ti manah udah ngujungka kerita bala tuai raban bansa di menua nya ditunu bala apek bayat lalu nembiak redak di menua nya diemba.
Beberapa hari tu udah siku ari orang bansa asal di menua nya udah diserang apek bayat ti besenyataka duku ba tugung mensia mayuh. Penyerang nya siku tuai apek bayat ti bekereja ke kompeni United Teamtrade.
Sapa meh orang ti bempu kompeni United Teamtrade? Endang tentu dua iku menteri dalam perintah Taib, iya nya Naroden Majais enggau Awang Tengah, iya nya siku menteri ti disadang numbangka Taib lalu nganti penuduk iya nyadi tuai dalam PBB udah tembu bepilihbesai tu ila!
Tu meh ti dikumbai Suhakam nya “orang siku-siku ti bekaul enggau perintah” lalu sida tu sebaka enggau penyakit riman ti ngerusak menua Sarawak ngena pengawa makai suap ti diuluka Taib Mahmud.
Lalu lebuh kompeni-kompeni baka United Teamtrade nya ngerampas tanah-tanah enggi orang bansa asal, pansik nya udah ngamatka penguntung dalam ‘dagang kunsi’ nya enda diagihka enggau sama rata. Ba mayuh endur bukai udah bekau sempekat ti deka bebagika dividen ari dagang kunsi nya, sida nadai bulih ari pengawa ‘pemansang’ Taib.
SALCRA ti dipejalaikan Sapit Kepala Menteri Sarawak, Alfed Jabu, enggau sida sebilik nyadi kaya ari pengawa ngerampas tanah enggi orang bansa asal, enda dikelaungka ari pansik Suhakam tu lebuh ngenang pasal pengawa ngagihka penguntung.
Sebengkah agi chara kamah Taib dalam pengawa ngerampas tanah nya iya ngena dalih deka ngaga tanah nya nyadika kampung galau … lalu udah nya nukar tanah nya baru nyadi kebun dandang besai sawit ti diberika iya ngagai sida sebilik baka menyadi iya Raziah Mahmud!
Repot ari Suhakam nya udah mantaika penerang ti silik pasal atur pengawa ti enda manah, pengurang ba atur ngelindung enggau nyukung orang bansa asal, lalu tu mai reti bala orang bansa asal udah tebuka ngagai keruga baya ganas baka Taib Mahmud.
Rakyat Sarawak patut nulak sereta mechat iya ari umai sida lalu anang “arapka pagar” laban “pagar deka ngalahka padi”.