Beberapa bulan ti udah tu Taib mahud udah didinga nyambut pengerami hari jadi ke 50 iya udah mangku pengawa menteri lalu enda kala dituntung sebarang penanggul. Dalam pengelama tiga puluh tiga taun ari maya nya iya mangku pengawa nyadi Kepala Menteri.
Taib udah milih peluang ti besimbolik nya dikena mansutka mayuh macham penerang bekaul enggau pengurang ‘pengawa pemansang’ datai ba bansa Dayak datai ke diatu. Tang iya udah enggau jaku ti sumbung madahka semina iya aja ulih mutarka semua penanggul ti nagang pemansang, ti endang datai ari iya empu ngagai raban bansa Dayak sekumbang 50 taun nya.
Rampas tanah
Taib enggau bala menteri iya dalam BN ngumbai raban bansa Dayak deka ngetu ragak pasal kuasa ba tanah asal sida lalu besetuju nyual kandang asal menua ti lalu deka nentuka ‘pemansang’ ke raban bansa nya deka diberi enggau mudah.
Sekeda bala tuai dalam BN udah mansutka penerang pasal kebuah tu, lalu ngutuk Kuasa-Kuasa Tanah Adat, baka ti diarika pemutus kot ti dipeda nyadika penanggul.
Bala tuai BN tu udah ngeluluka diri mansutka pengirau ati sida ba raban bansa Dayak ti sepeneka ati sida bejualka tanah temuda (ti patut diturunka sida ngagai raban anak uchu sida) ngagai bala tauke kayu batang enggau kebun dandang besai ti rangka, ti deka ngeruga bala orang bansa asal ti seranta.
Ke bendar iya penumbuh tanah NCR nya nyadika sebengkah chara ngelindung pengawa ngeruga tanah temuda rimba raban bansa asal nya. Lalu taja pan mayuh entara orang dalam raban bansa asal nya udah enda bulih peluang dalam pelajar ti meruan, mayuh ari sida nya udah ngelala ‘pengawa pemansang’ udah bekau tanah asal sida diserahka ngagai kompeni-kompeni dagang kunsi ti besai-besai.
Taib enggau bala kroni dagang iya udah ngena mayuh macham chara berampaska tanah lalu siti ari chara nya iya udah madahka ikas tanah nya ditukar nyadika ‘Kampung Galau’ dikena iya madamka kuasa raban bansa orang ba atas tanah nya, lalu udah nya nukar ikas tanah nya nyadika kandang menua ti tau dipedagangka!
Bantah berani ti diayanka raban bansa asal di menua Long Teran Kanan dikena sida ngelaban pemutus Kot Perintah Besai ti enggai mansik baru pemutus Kot Tinggi ti ngarika sida udah nyadika pansik kes ti kamah tu.
Kandang menua di Dulit (di sitak Tinjar/Baram) udah lama bendar dijali raban bansa Berawan ngagai raban bansa Kayan enggau Kenyau. Udah nya, enggau pemanah gaya rampa menua, kampung bungas kandang menua nya udah ditukar ikas nyadika Kampung Galau Perintah dalam taun-taun 1960 suba.
Ba maya nya suba sebengkah sempekat udah sejaku ti madahka raban bansa ti mit-mit nya tau neruska pengidup sida ba pelilih menua nya begulai enggau kampung. Perintah menua udah ngelala ikas genturung pengentap pendiau nya, enggau abis nadai pan nirika beberapa buah sekula primary di endur-endur nya.
Dalam taun-taun 1990 Taib Mahmud udah mutuska runding ngerampas kandang menua nya ke guna iya empu. Kandang menua kampung galau nya udah ditukar iya ikas nyadi kebun dandang besai sawit nengah sebengkah gerempung ti enda dikelala, LCDA, ti ditumbuhka Taib lalu dikuasa iya kediri.
Dikena iya bejalaika pengawa nya, LCDA enggi Taib udah numbuhka sebengkah pengawa ‘dagang kunsi’ ti benama Rinwood/Pelita, enggi seraban kroni dagang ti bekaul bendar enggau iya, nyengkaum sida Hii sebilik ti udu rangka nya.
Raban bansa ti mit-mit nya endang enda diterangka dulu bekaul enggau pemutus ba atas kandang menua sida, tang enda lama udah nya sida tekenyit bendar meda penatai bala tukang tumbang enggau bala orang kebun dandang besai enggi Taib, enggau raban apek bayat.
Kerita lipan enggau subur ti tama lalu ngerusak kandang kampung dia nyengkaun tanah asal ti udah dikereja raban bansa asal di endur nya nyengkaum kebun-kebun getah ti mit-mit.
Ba sebengkah kes ti kala nyadi ti endang udah teleba diasaika raban bansa Dayak di Sarawak,dia sida udah ngeripotka kes ngagai raban polis ti udah nya madahka sida enda ulih mutarka penanggul nya laban pekara nya endang datai ari Pelita/LCDA ti dikuasa Taib.
Kuasa sida ukai semina enda dikibuhka tang sida mega nadai diberi sebarang pampas.
Pekara ti enda dikibuhka Kepala Menteri enggau bala penyukung iya nya proses ngulihka penguntung ari pengawa ngerusak rampa kampung di Dulit enggau mayuh agi kandang menua enggi bala orang bansa asal, nya beengkerambaka nama ‘pemansang’ ke orang bansa asal.
Sekumbang Taib enggau sida Hii sebilik enggau bala tauke ti kaya-kaya di Sarawak ti bukai majak nyadi kaya-sekaya, bala orang raban bansa asal nadai bulih sebarang utai.
Raban bansa Dayak ti enda mayuh nya udah majak lenyau tanak pesaka sida, tang sida nadai diberi peluang ngambi bagi dalam pengawa dagang baru baka ti kala udah disemayaka ngagai sida.
Gaya rumah panjai sida majak jai-sejai sereta ngasuh ati tussah, ti dulu suba dikelingi kayu kampung ti besai-besai, tang diatu dikelingi kebun dandang besai sawit. Tang raban bansa mengkang enda chukup perengka ti diguna baka kuasa elektrik, ai beresi, jalai ti meruan sereta nyamai ditengah tauka pelajar sekula ti manah ke bala anak sida.
Nama reti pemansang ba sida? Nadai reti, baka ti kala diaku Taib empu.
Udah bekau 50 taun dalam perintah, tangki plastic biru 1Malaysia dikena nimbunka ai ujan udah nyadika tanda ‘pemansang’ Taib Mahmud ti nyadika terima kasih iya udah begenselanka pengidup raban orang di Dulit enggau di endur bukai.
Orang bansa asal suba ngena pengeraja asal kampung enggau ai sungai dikena sida ngidupka diri, tang diatu semua nya udah rusak sereta kamah lalu penuh laban lutak.
Enggau nya, lebuh Taib beserebanaka penusah ati iya meda raban bansa Dayak ti lalu enda mujur dalam pengidup, iya empu ti patut dikutuk. Iya semina inginka tanah temuda sida.
Udah nya, raban kompeni Rinwood enggi bala kroni Taib ti bejalaika pengawa ba kebun dandang besai di Dulit udah nyual kandang menua nya ngagai kompeni besai IOI Corporation ba rega ti tinggi bendar.
Lebuh maya nya IOI Corporation udah diterangka bala bakih Taib nya sida enda deka napi sebarang penanggul bekaul enggau kes pechara dalam kot baka ti kala udah difailka bala orang bansa asal ti udah ringat kena keduan.
Kompeni IOI Corporation nya sebengkah ari kaban Jurai Mija Segala Sawit Meruan ti udah ngerusak rampa menua ti bendar di Sarawak sebedau sida meresi nama diri. Nama tanggungpengawa social sida ke raban bansa asal ti mangkang kebun dandang besai sida? Raban NGO udah nuduh IOI Corporation nya semina ngambi mimit aja bala orang bansa asal bekereja ba kebun sida bebanding enggau sida ti rindu agi ngambi orang ari menua bukai bekereja ke sida ngena upah ti mit.
Lalu bisi mega serebana ti madahka bala pemesai IOI Corporation ti nguji ngambi orang bansa asal bekereja enggau sida lalu mejal sida nyerahka laluh kandang menua sida ti agi tinggal.
Lalu lebuh bala lawyer pengelantang mensia ari PKR mai kes tu ngagai kot sepengudah kes nya diatur terunda-runda datai ke 16 taun (dikena meri ruang ke Taib enggau bala kroni iya bebukaka kebun) tang mimit bendar pengelurus bisi nyerupa ba kot tinggi di Kuching ngelaban IOI/LCDA lalu ngarika orang bansa asal di Long Teran.
Reti nya bala orang bansa asal udah dikelala beduduk ba pemendar lalu bisi kuasa minta dipampas, lalu kompeni IOI nya nyadika kompeni ti terubah besedia mampas sida, nitih ke penerang ari dalam kompeni nya.
Tang beduduk ari nya Taib Mahmud nya siku orang ti endang bempu tanggungpengawa nagang pemansang ke raban bansa Dayak dalam pengelama 50 taun ti udah.
LCDA ti betuaika Taib udah enggau ngaku diri alah ba pechara nya lalu agi majak ngapil ngambika dipecharaka baru, enggau ngirit pangan dagang kunsi sida, IOI ngelaban orang bansa asal.
Ke penudi iya, raban bansa asal Sarawak ti seranta nya udah diirit ngagai kot apil awakka nukar ikas kuasa sia ba tanah adat asal sida nyadi ke Kampung Galau!
Kampung galau? Tu mih kandang menua ti dikelingi kebun dandang besai sawit.
Ba kes nya, nama kebuh Taib enda dibantah ngena undang-undang ketegal ti udah ngerusak rampa menua kampung galau? Kebuah pia, laban BN udah ngeruga system undang-undang enggau pekara bukai dalam 50 taun ti udah.
Tang diatu Kot Perintah Besai udah mansutka penerang ti madahka sida enggau meresa lalu becharaka baru kes nya.
Tang bala orang bansa asal udah nemu lebuh pengelurus enda dikereja atas sida, ti udah ngujungka sida enggai nerima pemutus nya lalu nama kebuah sida majak ngelaban lalu nulak penatai IOI/Pelita Plantation ngagai kandang menua di Dulit.
Dalam perintah Taib Mahmud, raban apek bayat dikena ngeruga raban bansa Dayak, raban polis ti enda lurus udah enda mujur nyaga raban bansa Dayak tu lalu kot udah enda beluruska penyarut. Tang seagi-agi nadai pengelurus, raban bansa Dayak tentu enggai badu ngelaban.
Lalu Taib Mahmud tetap deka nyadika penanggul ti besai ba pemansang raban bansa nya.