Diatu laman Sarawak Report ulih mantaika baka ni empat iku kepala apek bayat, ti udah ditangkap polis udah bekau raban polis mujur tetemuka setor senyata api ti besai ba kem kayu batang enggau kem kebun sawit di Melikin, Sarawak ti benung dituntung penyarut diatu, udah dilepaska polis ari asuh bala Menteri!

Udah bekau bala apek bayat nya dilepaska, dia beberapa kes nyerang bala orang bansa asal di menua nya bisi nyadi baru, dikereja dua buak kompeni ti diberi lisin ngeruga tanah NCR di menua nya.

Kompeni-kompeni nya, United Teamtrade Sdn Bhd enggau Memaju Jaya Sdn Bhd, sama bisi kaul ti rat enggau bala orang politik BN di menua Sarawak. Sida tu nyengkaum Sapit Menteri Langgur Pengawa Sarawak, Awang Tengah Ali Hassan; Menteri Pemansang Pengawa Dagang Sarawak, Naroden Majais, enggau siku YB BN ti dulu suba ari menua nya, Frederick Bayoi Manggi.

Penerang ti ngasuh ati tekenyit nya pasal pemutus runding dikena ngelepaska bala apek bayat ti besenyata nya udah dikirumka ngagai Sarawak Report udah bekau penusah ti bedau lama tu nuntung beberapa iku orang ti bempu tanah NCR di menua nya, nyengkaum siku Tuai Rumah Sujau ti dipasukka berubat di sepital udah bekau motosikal iya dilanggar bala apek bayat ti udah nya lalu nyamah iya ngena batang besi enggau kayu.

Ba penyarut ti sebaka nyadi kena 15hb Oktober nyin kemari, sebuah kerita ti ditepan beberapa iku orang kampung udah direpotka kena timbak tiga kali.

Bebalutka politik udah ngujungka tangkap nya dipelalaika lalu udah nya bala saspek dilepaska

Nitihka sekeda penerang ari pun ti bisi kaul politik enggau kami, empat iku apek bayat ti bepalan di Melikin nya udah ditangkap kena 30hb September nyin kemari, udah bekau seraban polis ngerampas senyata ti mayuh bendar ari dua iti kem konsesyen di Melikin.

Setor senyata nya nyengkaum senyata api ti digaga diri empu, bom, duku enggau lungga enggau perengka dikena nyaga diri empu, nitihka penerang ari opis polis di endur nya.

Sarawak Report bisi diterangka ti endur bala polis udah nuduhka penemu awakka bala apek bayat ti ditangkap nya patut ditanka chara reman nganti sida ti dipecharaka.

Opis Lawyer menua udah besetuju awakka peminta reman polis nya patut dibai ngagai kot.

Tang pekara ti ngasuh ati tekenyit nya, Menteri Pekara Dalam Menua ba ikas Perintah Besai udah madamka peminta reman enggau pechara nya!

Mayuh bengkah repot diatu datai ari kandang menua ti suah kena keduan lalu gaya penanggul nya nyau majak balat lalu enda ulih ditagang agi, lalu bisi raban apek bayat ditemu berebutka kampung ti deka ditebang.

Bala orang bansa asal mega bisi madahka bala apek bayat bebelika kayu batang ari kandang pulau galau enggi orang raban bansa asal, lalu pengawa apek bayat nya disukung sekeda Tuai Rumah, ti ditemu kala bebakih enggau kompeni-kompeni kayu batang nya dulu ari nya.

Empas ari nebang kayu enggau chara belalai nya udah ngujungka pengerusak ke rampa menua enggau kampung endur orang bansa asal nya ngasu-beburu sereta begigaka sayur babas, lalu mega ngujungka ai sungai di endur nya kamah sereta enda manah ke guna orang besehari-sehari.

Pengari PKR sitak Kuching, See Chee How, bisi udah ngeluarka siti penerang ti madahka kes orang bansa asal ti diarika nya dikena ngelaban lisin kebun sawit ti ditumbuhka ba atas tanah pesaka sida.

Pungkang raban polis

Enggau kes bebadi ti betambah ba orang bansa asal ti kena serang bala apek bayat ti ngeruga kampung sida, bala orang bansa asal alit ati laban raban polis ari pelihih menua Serian endang nadai ngambi sebarang tindak.

Dia bala orang bansa asal nyadang tuai-tuai raban polis endang bisi bekempit enggau kompeni-kompeni kayu batang sereta kompeni-kompeni kebun sawit dikena nyaga dagang sida kelimpah ari ti neritka adat enggau undang-undang menua.

Bala tuai politik ti bisi di belakang kompeni-kompeni nya endang meri sukung penuh sida ngagai kelikuh penemu nya.

Sekumbang bala orang bansa asal dia kena keduan nya udah ngujungka sida dipasukka ngagai wad sepital, lalu semina siti tangkap dikereja ba bala orang bansa asal ti ditekanka chara pelesu ngereja penyalah ti direpotka kompeni-kompeni kayu batang, tang udah nya sida semenua nya ditemu nadai bepenyalah.

“Udah lepas pukul 7 lemai raban polis pan lalu beabis-abis ninggalka menua kami”, kenu ku repot ari siku pemeri penerang kami. “Udah nya kami meda mayuh lori ngundan kayu batang pansut ari menua kami tu nengah pemetang malam”.

Jaku tanya ngagai Opis Menteri Pekara Dalam Menua di Malaysia

Enggau pengerembai penanggul nya ti enda ulih tagang bala penerit adat menua di Sarawak, lalu pengelurus mega nadai ngarika kuasa pengelantang bansa Daya, jaku-jaku tanya ti dipansutka, baka ni raban polis diasuh ngemataka adat enggau undang-undang menua.

Nama kebuah kenaya raban polis nadai dipeda di Melikin ngambika ngelaban bala apek bayat, tang di pelilih Sungai Sebatu di Suai, Miri, bisi raban polis datai beraban mayuh lalu nangkap bala orang ti bempu menua ketegal ditekanka enchuri ngetau ba kebun sawit ti ditumbuhka ba tanah pesaka sida empu?

Udah bekau kena kelingi polis kena 1hb November tu tadi, dia lapan iku orang bansa asal, nyengkaum dua iku nembiak mit, siku sembilan taun lalu siku 11 taun udah dipasukka dalam lokap polis di Miri ketegal sida ditekanka enchuri ngetau buah sawit ti ditanam ba atas tanah pesaka sida empu, iya nya tanah NCR ti udah disirap perintah enggau chara belalai.

Sekali agi dalam kes tu raban polis dikena ngambi bagi sida ngarika kompeni-kompeni kebun sawit ti dipecharaka dalam kot ngena atur undang-undang.

Bala polis ti ngambi tindak ti baka nya, taja pan perintah menua enggau kompeni-kompeni kebun sawit udah suah bendar alah bechara ketegal pengawa ngemendarka atur nyirap tanah pesaka ari orang bansa asal lalu udah nya ditemu ngelanggar adat enggau undang-undang menua.

Enggau nya, nama kebuah raban polis majak beduan orang bansa asal dalam kes-kes tu, lalu sida ukai nagang kompeni-kompeni kayu batang enggau kompeni kebun sawit tama lalu ngeruga menua orang bansa asal enggau chara nganjung raban apek bayat ti udah nya nya ditemu dikena bejalaika lisin ti diberi Kepala Menteri ngagai bala kroni iya?

Pia mega, nama kebuah raan polis udah diasuh napi seraban bansa Penan ti nadai besenyata, nyengkau bala indu enggau nembiak ti nirika empang jalai di Murum, lalu endur sida nimbakka senapang ke langit, lalu ukai diasuh ke Melikin di pelilih Serian dikena napi raban apek bayat ti ngeruga sereta beduan orang di menua nya seraya ngenchuri kayu batang ari menua nya?

Nama kebuah Perintah Besai diatu udah besabi penemu enggau Taib Mahmud lalu kerusi BN ti udah menang enggau chara tipu nya terus bekuasa, ti endur sida diatu nyau nadai daya ngemunaska keruga bala apek bayat ba pengawa ngintu adat enggau undang-undang menua?

Sinu bendar meda, baka nya meh gaya kes-kes beduan orang bansa asal ti nyadi di Sarawak

Raban polis semina dikena nyaga pengawa dagang bala kroni Taib ti ngelanggar adat enggau undang-undang menua enggau chara ngena keduan ari bala apek bayat ba orang bansa asal.