Nick Wright, Sapit Presiden dalam kompeni besai Sarawak Energy Berhad (SEB) ti bebansa Australia ti ngatur Program Pengentap Pendiau Baru, Tanggungpengawa Sosial enggau Korporat dan Jurai Penemu ke Raban Bansa, udah ngasuh orang tekenyit ati berebak enggau aum ba Gerempung Bansa (UN) di Geneva ba minggu nyin kemari.
Batang pengawa iya nya mantaika sebengkah repot ti beresi ngagai Gerempung Bansa, muji-muji pengawa manah kompeni endur iya bekereja (SEB) ngagai raban bansa asal ti dituntung penanggul ketegal projek tekat besai di menua Sarawak.
Surat penerang nya nyimpulka pasal pengawa pengentap pendiau baru, ti dikumbai SEB nya nyadika pengawa ti udah dipesetujuka enggau penuh begulai enggau raban bansa asal Penan enggau Kenyah di Murum.
Jaku nya udah nyadika kelese bala orang ti datai ngulu aum dalam UN, laban menua Sarawak endang napi bantah enggau pengawa raban bansa asal ti nirika empang jalai ba palan pengentap pendiau enggau mega ba tapak projek ngaga tekat kuasa hidro.
Bisi beberapa buah ruang bilik orang diri sebilik ti dientapka pendiau baru SEB tetemuka rumah baru sida endang bedau tembu digaga.
Enggau Nick Wright ti begaji besai ngatur Pengentap Pendiau Baru ngarika SEB, mayuh orang deka nemu nama kebuah iya ngiruh diri bejaku durah-durah ba panggau entarabansa nya, lalu ukai mantu bala orang diri sebilik ti udah lenyau ruang bilik di Sarawak?
Pengasai ati orang mayuh nadai betambah manah lebuh bos SEB ti begaji besai nya udah enda mujur ngena peluang ti diberi ngagai iya dikena berandau enggau raban NGO ti udah diatur ba hari ti nangkanka nya.
Udah bekau ti besetuju deka datai ngulu jaku randau enggau raban NGO nya, enda mukai-mukai iya ngubah runding diri lalu ngendaka diri datai enggau berandau.
Bida entara penyamai pendiau dalam bilik hotel, enggau palan pengentap pendiau ti diatur SEB ke raban bansa asal nya mega bisi dikerandauka.
Ba palan pengenatap pendiau baru SEB di pelilih Tegulang, ambi ke banding, bisi dua tiga bengkah ruang bilik orang diri sebilik diasuh diau bepadat dalam sepintu bilik ti mit sereta sekut, ketegal ti enda chukup rumah baru ke bala orang ti datai ari ulu Tekat Murum.
Enggau palan pengentap pendiau ti jauh di tengah kebun dandang sawit ti enda dikereja agi, bebatu-batu penyauh, semina bisi mimit bendar peluang ke raban-raban bansa asal nya ngereja pengawa ngasu-beburu tauka maku-nubu tauka meli pemakai ngena duit pampas RM800 sebulan ke sebuah ruang bilik sida.
Nambahka nya, SEB udah ngagihka bekal beras dalam kambut enggau minyak makai chukup ke dempa sebulan ba mua pintu ruang bilik ba rumah-rumah panjai lalu madahka sida patut beridup ba kengka utai ti dibekalka nya!
Jaku tanya ti ditujuka nya, nama kebuah Nick Wright enggau bala bakih iya dalam SEB mutuska runding sida ngisi tekat lalu nunu sereta ngerusak rumah enggi orang bansa asal sebedau genturung pendiau sida tembu digagaka sida?
Lalu dini endur sekula, klinik enggau palan pematih baka ti diterangka dalam repot Nick Wright ti dikarang ngambika dibantaika iya dalam Gerempung Bansa?
Sekali agi kami deka betanya ngagai iya, sanggup tauka enda iya meda sida sebilik diberi sekambut beras lalu diasuh makai ba endur ti diasaika orang bansa asal nya?
Nick Wright udah enggai ngulu pengawa ti endur iya patut nyaut sekeda tanya bekaul enggau isu ti nadai disebut iya dalam repot iya ba Komisyen Kuasa Pengelantang Mensia dalam Gerempung Bansa, taja pan ke bendar isu-isu nya suah kala dibangkitka bala NGO ti seruran beratika rekod Perintah Menua Sarawak.
Repot kuasa pengelantang mensia enggau raban bansa asal Sarawak ti beresi
Penerang ti disebut ngena jaku ari Sarawak ke Komisyen Kuasa Pengelantang Mensia, ti dikereja dikena meresa pekara nya, udah dibantaika Sekretari Menua ke dulu suba, Y B Fong, siku pemesai ti dikerinduka Taib dikena iya mutarka sekeda penanggul.
Tang Nick Wright terang bendar bempu tanggungpengawa nya udah ngarang repot ngena jaku ti berambai-rambai ti endur iya dipeda ngepit fail repot nya. Repot nya ngundan mayuh jaku semaya, tang nadai nyebut pasal penguntung ke raban bansa asal Sarawak nya.
Repot nya nerangka, ambi ke banding, Sarawak endang “ngena atur pemadu manah” ari ti ‘begulaika model projek pemansang” Gerempung Kuasa Hidro Entarabansa (IHA).
Pekara nya ngayanka menua Sarawak bejalaika atur pemadu manah lebuh sida ngaga tekat kuasa hidro.
Tang raban-raban NGO nya udah nunjukka atur IHA nya enda lebih ari sebengkah perengka dikena nyukat ikas pemanah atur pengawa, ti endur ikas enggi menua Sarawak jauh bendar baruh.
Ke bendar iya, repot nya udah puntan madahka Tekat Murum nya udah digaga lalu ditembuka sebedau raban bansa asal nya dibai bejurai tauka sebedau sebarang setuju diulihka bekaul pampas.
Repot nya endang nadai nyebut pasal pansik empas projek ngagai rampa menua ti enda dikeluarka awakka bisi dibacha mensia mayuh tauka disaraka sepengudah tembu ngaga tekat nya. Kelimpah ari ti enda ditemu tuju tauka tuku, pekara nya dikuasa sebengkah agensi perintah, iya nya Lembaga Sumber Asli dan Alam Sekitar Sarawak, ti betuaika Menteri Perambu Pengawa enggau Pengeraja Asal Sarawak, Abdul Taib Mahmud empu.
Pia mega, bekaul enggau isu kuasa ba tanah pesaka, Nick Wright udah bebendar amat madahka Perintah Menua Sarawak nyadika penyaga kuasa tanah enggi orang bansa asal, tang mensia mayuh di serata dunya diatu udah nemu pekara nya enda munyi ti ditusui Nick nya.
Repot Nick Wright di Gerempung Bansa nya udah ngambarka pakej pampas ti manah bendar ke bala orang raban bansa asal Murum ti dituntung penanggul nya.
Iya madahka raban bansa Penan udah diasuh”masuk” ngagai kandang ‘kampung galau’ ba pemesai 19,500 hektar di Danum Linau nya.
Tang ke bendar iya sebagi ti besai kandang menua nya udah kusi ditebang kompeni Shin Yang lalu laluh nya kelalu jauh lalu kualiti tanah di endur nya udah balat bendar kusut endur ngereja pengawa betanam-betupi.
“Atur pengawa ngangkatka pemanah ti dikereja enggau jampat” baka ti disemaya nya nyengkaum ngaga penaik ke ruang bilik orang diri sebilik ba rumah panjai; bekal ai beresi enggau kuasa elektrik ti disabsidi; rumah sembiang (ti nadai disebut enggau nyengala); perengka perubat; sekula; palan pematih ke raban bansa enggau bantu perintah ngena mata duit tauka iya ke sebaka.
Tang ke bendar iya, tapak rumah ti bedau tembu digaga nya endang nadai ngembuan perengka digunaka, enggau ruang ti endur diau pan enda chukup.
Repot ari Nick Wright ba Gerempung Bansa nya udah puntan nerangka enggau silik ti madahka “semaya perintah ngena mata duit” nya ke bendar iya baruh ari gaji pemadu mit lalu deka diketuka sepengudah empat taun (ke raban bansa ti diau jauh lalu sida ti nadai sebarang bansa perengka pengangkut dikena ngenataika diri ba sebarang kedai ti pemadu semak enggau sida).
Nyerumba nya, “bantu ti sebaka” ti udah diberi SEB tauka perintah Sarawak nya semina bekal beras dalam kambut enggau minyak makai, ti diengkah-engkahka SEB ba mua pintu penaik sida.
Ba perengka dikena beridup besehari-sehari ti disabsidi mega, raban bansa asal Sarawak endang lama bendar udah ngarapka semaya perintah dikamatka perintah menua sida empu.
Raban bansa asal di serata Sarawak udah enda ulih maya rega barang ti besabsidi ke perengka-perengka ti diguna sida idup besehari-sehari ti diulihka ari sungai ti agi beresi kelia.
Diatu, taja pan udah disemayaka ngagai sida, sida lalu nadai meda kenaya bala pengajar tauka orang ti bekereja ba klinik, taja pan repot Nick Wright nya nyebut pasal semaya dikena nambahka pemanah perengka diguna.
Lalu, enggau semaya pemansang ti suah disebut-sebut Taib lebuh iya nebang kampung enggau muka kebun dandang besai sawit, bala orang bansa asal diatu udah bisi kuasa enda agi arapka iya.
Tekat-tekat bukai ti deka digaga bedau ditentuka?
Repot Menua Sarawak ke Gerempung Bansa (ti dikarang Nick Wright) nya mega tau nyadika kelulu ti ngasuh orang ketawa lebuh iya madahka projek Tekat Baram bedau belabuh dipejuraika sereta diputuska. Tang iya ke bendar nya, udah mayuh perengka, enjin enggau bala pengereja pengawa dianjung ke pelilih Baram ngagai tapak ti deka endur ngaga tekat nya, enggau papan tanda projek lalu pengawa mega udah belabuh dikereja.
Lalu beduduk ari tu, cherita pasal pengawa orang bansa asal ti ngempang jalai ti muru bala pengereja pengawa ba tapak tekat nya minggu nyin kemari nadai mai sebarang empas di menua Geneva.
Sekumbang bala orang bansa asal Sarawak angkat lalu ngayanka bantah sida, SEB udah bebendar amat nusui ensera enggau cherita kelulu sida di Geneva ti kenu ku sida nya penuh enggau atur, pansik, peminta ari raban bansa asal ti udah lama dipejalaika sebedau belabuh ngaga projek nya.
Raban NGO nya udah mai Nick Wright berandau udah bekau SEB mantaika repot sida di Geneva. Tang udah tembu iya bejaku mantaika repot iya, iya udah nyeliahka diri ari ti betemu enggau sida NGO nya.
Iya dipeda baka ti enda lantang” ku siku raban delegesyen NGO, “berupai bendar SEB semina datai laban deka bejaku lalu enda besedia deka mending”
Sepenembu SEB mantaika repot sida, dia bala delegesyen dalam Gerempung Bansa udah mansutka tuduh penemu sida dikena sida nimbal ensera ti dikarang Nick Wright nya:
Norway nuduhka kuasa pengelantang orang bansa asal ti bepanggai pengidup ba kampung patut dipasukka dalam undang-undang Malaysia;
New Zealand nuduhka Malaysia patut ngelala sebengkah gerempung dikena mansik penyarut tanah enggau pengeraja tanah enggi orang bansa asal;
Denmark madahka pengirau ati sida ba Malaysia ti kurang bejuraika sekeda pekara sebedau ngulihka tanah ari orang bansa asal;
Bolivia enggau Venezuela nuduhka menua Malaysia patut chakah agi ba pengawa munaska penyeranta orang bansa asal ke lebih ba orang di Sabah enggau Sarawak;
Australia minta menua Malaysia ngerejista semua anak mit orang bansa asal ti baru ada enggau jampat tauka nembiak mit orang ti tepawah;
Sweden enggau Switzerland sama-sama nuduhka undang-undang Malaysia patut besabi enggau penetap-penetap dalam UNDRIP (Penetap Kuasa Orang Bansa Asal dalam Gerempung Bansa).