Sarawak Energy Berhad (SEB) udah mantaika penerang dalam aum Gerempung Bansa (UN) di Geneva ba bulan nyin kemari, seraya sida nempik dada diri empu becheritaka pasal atur pengentap pendiau baru ke raban bansa Penan, udah bekau sida mejal raban bansa asal nya pansut ari menua asal sida ketegal meri awak ngagai pengawa ngaga tekat ti bekontroversyel nya.
Raban bansa nya diatu udah diseraraka ari pun penatai sida (endang amat, lebih agi ba Taib Mahmud ti udah ngerampas menua enggau kampung asal sida) lalu mindahka sida ngagai sebengkah kandang menua baru ti, kenu ku sida SEB, bisi sekula, klinik, palan pematih, tanah, rumah ti nyamai endur diau enggau pakej pampas ti manah bendar!
Baka penerang SEB ti bisi dibantaika dalam aum Gerempung Bansa di Geneva:
“Atur tu nyereminka pemansang ba singkang ti jampat enggau besai rampa ngagai jalai pengidup [raban bansa Penan]}
Atur nya lebih nyadika sebengkah penerang ti mar bendar dikarapka, kenu ku SEB, orang ti deka bulih penguntung ari tekat nya endang raban bansa Kenyah enggau Penan ti kena keruga nya.
Mantu bansa asal nya endang nyadika pun juluk ati CEO Torstein Sjotveit, lebuh maya iya ngelancharka langgur ngaga tekat di Sarawak. Ngenataika penguntung ngagai raban bansa ‘ti jauh tinggal’ tu mih ti nyadika peransang iya, munyi ti disebut iya enda badu-badu.
Gaji taun iya ti bejuta-juta ringgit enggau kontrak besai-besai diberi iya ngagai Taib nya nadai bekaul enggau semua utai tu.
Tang semina, dalam repot filem ke terubah ti deka dikeluarka ari kandang menua bansa Penan diatu madahka utai ti endang amat nyadi dalam pengidup sida ti majak baruh-sebaruh taja pan sida udah datai ba palan pengentap pendiau ti baru nya, ti dikumbai sida menua neraka lalu sida ngembuan dalih ti manah.
Jaku semaya ti murah – nama kebuah Torstein enda ngaga nya nyadika sebengkah sempekat ti lurus ba adat menua dipesetujuka enggau raban bansa Penan
Langgur enggau jaku semaya nya manah dipeda sereta manah mega didinga, tang agi kabur datai ke atur nya ulih dikena mujuk sekeda ari bansa Penan ngambika besetuju pindah ngagai menua baru ba bulan nyin kemari (lebih agi lebuh maya SEB belabuh ngisi tekat nya lalu ngampuhka kandang menua asal sida).
Raban sida ti bukai mengkang betan ngibun empang jalai laban agi minta pampas ti tetap sereta bejamin sebedau sida deka besetuju pindah ngagai palan pengentap pendiau baru, laban sida nyau udah enda pechayaka jaku semaya ari Taib Mahmud.
Palan pengentap pendiau ti bedau tentu tembu digaga
Tang utai ti bendar sereta nyata nya jauh bebida, taja pan mayuh repot udah dituliska bala pengarang berita ti dibai SEB nemuai ngagai tekat nya enggau ngagai palan pengentap pendiau ba minggu nyin kemari ti nyadika sebagi ari atur penemuai ti dipelanja penuh dikena ngemanahka cherita Murum ari tinjau enggau perening kompeni nya.
Bala pengarang berita ti dibai nemuai nya udah mega meranika diri nuliska kenang sida pasal bekal ai enggau kuasa elektrik ti seruran tanggul ba palan nya.
Tang diatu pemerinsa sida ti udah dipindahka ngagai palan pengentap pendiau baru di Tegulang nya udah diterangka nengah sebuah filem ti baru dikeluarka raban orang ti ngaga filem People’s Documentary, ti udah mujur betemu enggau raban bansa ti jauh pendiau ari raban bansa bukai nya.
Sida ti datai dia tetemuka sebengkah palan ti puang digaga ba tengah-tengah menua ti lapang sereta kusi, nadai rumah sekula, klinik tauka gerija tauka tanah endur betanam-betupi.
Atur bayar pampas agi mengkang kabur lalu enda nyengala, nitihka sida ti udah ngentapka pendiau ba palan ti baru nya.
Sida mengkang enda nemu nama agi utai ti disadang sida, enti sema bisi.
Baka ba atur ke bala orang ti dipindahka ari projek tekat ti dulu agi di Sarawak, raban bansa Penan tu semina tau ngarapka serepik penguntung aja. Bala orang di Batang Ai enggau Bakun udah ngasaika mayuh utai ti disemayaka deka diberi pechuma baka rumah baru, bekal ai ti beresi enggau kuasa elektrik udah diberika ngagai sida tang bekelapungka tanda rega ti enda ulih tapi sida.
Kandang menua Tegulang nya petang lalu ngasuh ati tusah lalu bala orang diri sebilik ti tama kia diatu nyau lenyau pengarap. Nadai palan pematih ngereja pengawa betanam-betupi baka ti disemayaka ba bala pengarang berita ti nemuai kia bulan nyin kemari.
Bala orang bansa asal ari pelilih Long Wat ti tama ngagai palan Tegulang nya berasai tusah ati meda gaya rumah ti enda meruan enggau ruang endur bala orang diri sebilik ti mit sereta sekut. Bekal ai enggau kuasa elektrik mega suah tanggul. Nadai tapak endur betanam-betupi, lalu mayuh agi sida nya nadai perengka pengangkut.
Jelu tupi kami ditinggalka lalu mati lemas
Pekara ti ngenyinuka ati, SEB udah enda nitihka jaku semaya sida ngemendarka tiap ruang bilik ngena perengka pengangkut ti chukup dikena sida ngangkut semua barang sida nengah jalai dalam pengelama 4 jam ngejangka menua lama ti diampuhka ai. Jelu tupi sida baka ukui enggau barang bukai ti patut diangkut kedua kali nya nadai dikereja ke sida.
Lebuh sida nyau nikal baru ngagai Long Wat, sida meda rumah sida udah abis angus ditunu SEB, nyengkaum barang ti diguna sida besehari-sehari ti berega enggau jelu tupi sida nya disadang udah mati lemas magang.
Berebak enggau raban SEB mantaika ensera sida baa um Gerempung Bansa pasal “tinjau sida ke menua Sarawak” dikena, kenu ku sida, ngangkatka pemanah pengidup raban bansa Penan, sida mega bisi ditemu bejalaika sebengkah pengawa ari Long Wong. Tu utai ti bendar iya dikereja SEB nitihka bala orang bansa asal ti sangkai tasah di Tegulang.
“Sida (perintah)udah besemaya deka nyali 2 buah kerita dikena berangkutka barang ke tiap iti ruang bilik orang diri sebilik lebuh pindah nya. Tang ba hari nya, semina sebuah kerita aja dijali sida tumu pagi nya urung pukul 8 pagi. Sebuah agi datau nyau lemai urung pukul 4 lemai lalu bekejang baru ninggalka menua nya urung pukul 7 malam. Agi mayuh barang ti diguna kami tinggal ba rumah panjai lama kami lalu datai ke sehari tu kami enda ulih ngambi nya, lalu semua nya udah dalam ai din. Nyengkaum tinso, enjin perau enggau sebuah enjin api, semua nya udah dalam ai sekumbang tekat nya diisi ai”
“Kami udah minta jali mayuh agi kerita dikena kami berangkutka barang tang sida majak madahka sida nadai agi kerita ke dijali ngagai kami. Mayuh jelu tupi kami mati, disadang mati lemas magang.
Torstein Dale Sjotveit udah suah bendar ngasuh dunya arapka jaku iya ti madahka kompeni iya kala bulih tanda puji ke pengawa pemadu manah ti dikena sida ngatur palan pengentap pendiau ti baru. Diatu kami minta bala pemacha kami meresa pengamat utai ti disebut iya nya.