Kena 19hb Duabelas tu tadi empat buah kerita pachu empat roda udah ditepan bala pemesai ari Sarawak Energy lalu mega mai duit tunai bepuluh ribu ringgit (duit keretas tunai RM50).
Endur-endur ti dituju sida nya 33 buah genturung pendiau orang bansa asal di pelilih Baram, sebengkah endur ti benung ditanggam penyarut bekaul enggau program ngaga tekat enggau kompeni SEB nya.
Sereta sida datai di endur nya, nitihka penerang ti diberi sida ngagai opis polis, bala pemesai kompeni SEB lalu betemu enggau tuai rumah, laban nyerahka ‘pemeri rambau Hari Krismas’ dalam mata duit (peda gambar).
“Sida madahka sida deka meri duit pemeri nya dikena orang bansa asal nya nyambut pengerami”, pia ku Peter Kallang, siku pengari NGO Save Rivers ti nyadika penyakal projek Tekat Baram ti dibalut penyarut nya.
“Duit nya ukai ke dipedua ngagai tiap iku tuai bilik, tang patut dikena meli pemakai enggau bir ke diempa semua orang ba genturung nya”.
Tang bala orang bansa asal dia enda tekait ati enggau chara keduan nya. Seraban orang bansa asal ari Long Mekaba udah ngaga repot polis di Miri kena hari Lima nyin kemari, serebana ke pengawa SEB ti nguji deka nyuap sida. Sida mega nyerahka duit suap SEB RM3,0000 ti diterima sida nya ngagai raban polis. Kenu ku sida, sida enggai nerima sereta melanjaka duit nya.
Sarawak Report udah diterangka bisi sebuah agi genturung pendiau orang bansa asal di pelilih Marudi deka ngaga repot polis sebaka enggau ti dikereja sida ari Long Mekaba nya, lalu disadang mega mayuh agi repot polis deka digaga ba maya-maya ti dudi agi ila.
Pengirau ati orang bansa asal endang udah disadang. Nitihka adat sida, enti sida nyambut duit orang, sida patut malas enggau budi. Pengawa besadungka duit baka tu endang suah dikereja bala orang politik ti kaya-kaya dikena sida nundukka tauka meli undi maya bepilihbesai di serata menua Sarawak.
Tang bala orang bansa asal ti seranta nya udah enggai nerima duit nya ti endang ke guna sida dikena sida ngenyauhka diri ari kena tanggam budi nya.
Cherita ti nyelai tu udah nyungkak jaku tanya ngagai kompeni Sarawak Energy enggau CEO sida ti ragak, Torstein Dale Sjotveit ari menua Norway, ti suah didinga begendangka jaku ba surat-suratberita di serata dunya madahka kompeni iya endang ‘nitihka atur entarabansa pemadu tinggi’ lebuh ngaga sebarang tekat ai di Sarawak.
Beduduk ba repot polis nya iya patut nerangka nama kebuah kompeni iya meri duit tunai ngagai orang siku-siku di pelilih Baram. Pia mega, nama bansa notis ngagai orang mayuh udah dikeluarka iya, nama atur pengawa enggau justifikasyen ti diberi sida?
Agi mega, orang di serata menua Sarawak tentu deka berasai gaga ati enti sida diberi rebet bayar ari kompeni kuasa elektrik, lalu berindik ba nama ketegal genturung di pelilih Baram aja ti diberi duit pemeri nya?
‘Datuk Torstein’ patut meri saut ti nengkeman sereta nyemetak, laban tuduh meri duit suap nya kelalu berupai lebuh orang bejaku ke genturung pendiau raban bansa asal ti nyadika palan pemun bantah ngagai program ngaga tekat ti dikereja kompeni iya.
Terang bendar, sekeda orang di Baram enda ngumbai tu jurai, tang suap, lalu orang putih ti dikumbai landik nya patut datai ke mua ngambika nyilat penemu logik sida.
Penyarut ti ngasuh mayuh orang tusah ati ke Murum udah nyadika SEB majak mar agi bejalaika atur bemain-main kedua kali nya, baka ti dipeda orang bansa asal di pelilih Baram.
Raban-raban bansa asal tu udah nentuka sida deka enda mudah dikeduan enggau chara-chara ti sama (baka di Murum).
Berindik ba penyampau RM3,000 ti diberika nyadika pemeri ari pemesai SEB Augustine Supen Taja ngagai bala orang bansa asal di Long mekaba, bala orang di Baram udah belabaka konvoi pejalai kerita SEB nya mai enda kurang ari seratus ribu ringgit ngambika diberika ngagai 33 itu genturung nyengkaum penemuai raban ‘Santa Klaus Krismas’ nya.
Tang bala orang bansa asal nya tentu nemu penyampau ke bendar, laban penyampau ti diberi nya enda direkod dalam pom ti disain sida nyadika resit tanda udah nerima duit nya.
Bala orang bansa asal nya udah nyerahka salin resit ti disain sida nyadika pengamat sida nerima duit suap nya disempulang repot polis. Tu nunjukka kompeni nya endang nuju bala Tuai Rumah tauka sapit-sapit sida enggau Tuai-tuai Gerija dalam raban bansa nya.
Nama sida, sain chap jari enggau lumur kad pengelala sida endang dipeguna lalu udah nya disain pemesai SEB Augustine Supen Taja.
Taja pan baka nya, penyampau duit ti disain sida nya endang ditejuka puang. Sekali ke SEB endang enggai nyebut enggau chara betulis chara bayar nya dikeluarka? Enti ya, enda ke sistem nya tau disalahguna?
Ari ti nyadika kompeni awam, SEB patut nerangka ni pemayuh agih duit dikena ba atur meri pemeri tu, ngambika semua 33 buah genturung di Baram nya (enggau genturung ti bukai di serata Sarawak) ulih mandingka enggau penyampau ti diterima sida ke bendar!
Peter Kallang madahka iya selalu nemuai ngusung genturung-genturung orang bansa asal ti dituntung penanggul laban projek tekat nya lalu bisi tetemuka tugung-tugung tin bir puang di sebelah tanah.
Tu, kenu ku iya, udah nyadika penerang ti endur SEB sebedau tu endang kala nyadung ai bisa enggau pemakai: “tu endang chara tipikal dikereja sida, nyadung bir awakka orang bansa asal mabuk lalu enda ingatka pengirau ati sida”, ku iya madah ngagai Sarawak Report.
Tang, 20,000 iku orang bansa asal di pelilih Baram, ti deka lenyau tanah pesaka asal sida enti sema tekat nya nyadi didirika ila, deka ngenataika chakap sida ngagai SEB enggau tuai sida, Kepala Menteri Abdul Taib Mahmud, ti endur kompeni-kompeni sida sebilik tentu deka bulih untung ari kontrak bebilion-bilion ringgit ari pengawa ngaga tekat nya ngambika nyukung projek ‘SCORE’ ti datai ari runding iya empu nya.
Siti ari chara sida SEB nya, ngena anak orang bansa asal ari pelilih menua nya empu, baka Augustine Supen Taja, mujuk lalu ngambi ati bala tuai-tuai raban bansa. Iya enggau bala bos iya patut dipansik enggau silik.