Beratus juta ringgit duit menua udah dipelanjaka BN dikena empelas mua diri.
Semua duit enggau pengawa nya udah balat bendar dibasau baka nya aja ketegal sebengkah pemutus runding ti mudah dikena ngelamun penampak siku tuai parti penyakal.
Mensia mayuh di serata dunya diatu udah enda ulih dikemulaka agi ti endur menua Malaysia nya sebuah menua ti moden, maju sereta bepenemu demokrasi ti jelan.
Kebuah pia, laban Malaysia mengkang nyadika sebuah menua ti endur perintah iya ngukum jel semua munsuh politik sida lebuh sida udah berasai kena keruga.
Siku tuai perintah ti benung mangku pengawa, udah nyadika perintah BN sebuah perintah berejim ‘demokrasi’ pemadu lama betan ti udah nya meri jaku tangkan ngagai dunya ti benung numpuka perati ngagai menua Malaysia.
Lalu pengawa ti baka nya enda ulih mantu raban pemerintah ti udah milih jalai dikena nekanka munsuh politik sida. Chara nya nerangka ngagai dunya pasal tikas runding seraban orang ti benung mangku pengawa dalam perintah Malaysia.
Enggau nya, bala tuai menua bukai di dunya tu baka David Cameron ari menua Britain enggau Tony Abbott ari menua Australia berasai mar bendar deka ngatur pemanah kaul sida sereta ngeregaska agi pengawa dagang sida enggau ‘pangan dagang chara kelia’ nya.
Lalu gerempung-gerempung NGO enggau bala pengemata kuasa pengelantang mensia udah enggau chara ti tan ati meri jaku tangkan ngagai Perintah-Perintah menua Barat ti madahka pemansang Malaysia ba demokrasi nya sebengkah pemuntan pengawa BN ti balat bendar ngemalu.
Di menua Malaysia, tinggi agi sistem akim iya, kurang agi ga kuasa enggau atur pengawa bala akim iya. Lalu sehari tu raban orang di serata dunya udah diayanka sebengkah kes ti mudah bendar.
Pechara ti asal ke penyalah udah dibali enggau beguai-guai semina dalam beberapa jam aja.
Pengawa lawyer Malaysia ti dulu suba dipeda sebengkah pengawa ti tau ditemegahka, diatu udah nyadika bala lawyer nya semina nyadi pengemata aja, lalu perkara ti nyelai udah nyadi enda nyelai agi.
Baka ni enggau atur ti dikena ngelepaska dua iku jejaga udah bekau seduai diukum jel enda lama, udah bekau seduai ditemu munuh Altantuya Shaaribuu ti bisi ngumbai diri nyadika ambai Menteri Besai lebuh iya nyadi tukang salin jaku maya skandal makai suap meli kapalselam ari menua Peranchis?
Patut bendar kitai mantaika jaku tanya nama kebuah dua iku pemesai polis tu, ti endang ditemu nabanka siku indu biak lalu udah nya munuh iya ngena letup bom soldadu, semina diukum jel beberapa taun aja lebuh Kot Apil sehari tu netapka ukum jel lima taun ba tuai parti penyakal ke sebengkah penyalah ti ukai nyadika penyalah ba mayuh menua di dunya tu?
Tu meh utai ti mudah sereta nyata bendar ti endur komuniti dunya numpuka perati sida udah bekau iya disungkak raban pejuang kuasa pengelantang mensia.
Enggau chara ngukum jel Anwar Ibrahim, Najib Razak udah ngerak semua gerempung gay sedunya lalu iya tentu deka meda penanggul ba pemanah kaul enggau tuai-tuai menua ti seruran dipilih raban BN endur beranakka puku dagang kamah sida, baka di Amerika enggau Eropa.
Tuduh enggau dawa BN ba atas Anwar Ibrahim semina ngemesaika ulah ngeluluka diri parti BN ti merintah nya.
Aram kitai sama meratika isi cherita ti kamah dalam wayang blockbuster nya ti dikeluarka anak tiri Menteri Besai Najib bedau lama ti udah, Wolf Of Wall Street!
Pengawa ngeluarka wayang ti kamah nya udah ngejutka mayuh piak di menua Hollywood lalu iya udah lenyau pengawa melanja ari studio, laban iya ngundan isi cherita ti kamah, tang Riza Aziz majak melanja $100 juta dollar ngagai projek nya.
Ulah beleman sesama lelaki nya nyadika siti ari tema beleman dalam wayang nya, dipegulaika enggau salah guna dadah.
Tang taja pan isi wayang Riza nya dikumbai sebengkah uti, tang udah nyadika sebengkah penyalah besai ti ditinggang ngena ukum ke siku tuai penyakal ti dipejalaika perintah rejim apai tiri iya.
Pengeran ati perintah BN Malaysia deka munuh nama siku tuai politik penyakal tentu deka mantaika beberapa iti pekara ti amat, ti dilamun ngena kimpin PR ti besai bendar ungkus dikereja BN. Diatu Malaysia ti ngembuan 22 juta iku rayat, benung beduduk ba tikas lumur 4 ba penyalah pemindah duit kamah di dunya, semina dialahka menua ti besai-besai baka China, Russia enggau India.
Pengawa dagang entarabansa kala udah dikenyitka ngena berita ti madahka duit jali ti mayuh bendar dikereja Malaysia nengah bon menua tasik ti nyelai pemesai iya nengah 1 Malaysia Development Berhad, ti betuaika Najib Razak.
Mayuh agi ari duit injau nya disadang udah lenyau lalu masuk ngagai akaun orang siku-siku di menua tasik.
Iya ke bendar, utai ti nyadi di Malaysia nya dipeda rechau. BN udah enda ulih nagang penyalah makai suap ti balat dikereja bala tuai sida lalu sida mengkang megai perintah laban sida bebendar ngelakar maya bepilihbesai. Siku pengari ari parti penyakal ti udah menang undi pemadu mayuh diatu dipejal tama jel.
Diatu Najib patut meratika kes penyalah ti dulu ari tu beteladanka kes ba menua bukai lalu iya mega patut nagang diri ngachuk rayat iya empu. Sekali ke BN deka ngirit menua Malaysia ngagai penyarut, semina ketegal sida ti ngumbai diri bisi kuasa megai perintah belama-lama?