Taib udah nerangka iya ngarapka diri deka dichiri nyadi Gabenor Sarawak sehari tu, udah bekau iya ngadap YDP Agong ba Istana Negara urung pukul 3 lemai tu.
Iya udah madahka rayat iya ti endur iya arap ke diri empu diangkatka penuduk ti sebaka enggau penuduk Ratu menua England, ti semina meri sanding penemu.
Lalu utai ti beguna agi ba iya nya, iya udah nerangka iya arapka penuduk nya meri iya pengebal ari sebarang tuduh enggau dawa ba chara iya megai kuasa stail kleptokrasi ba pengelama beberapa puluh taun.
Ba kuasa ti bisi diatu, nyengkaum Menteri Besai Malaysia, patut berunding enggau dalam, laban enti sida majak deka nyiri Taib nyadi Gabenor, dunya deka ngumbai sida bisi kaul dalam penyalah makai suap, baka ti ditemu orang mayuh.
Kemari seraban kaban ari parti penyakal ti ringat udah mai kes sida terus ngagai opis Najib enggau mega ngagai opis SPRM.
Bala pemesai ari SPRM ti malu-malu nya udah ngamatka dalam aum sida enggau Rafizi Ramli enggau See Chee How ari parti PKR, madahka pansik sida ba siku orang kaya gila kuasa nya tetap dipejalaika.
Tang, ba mua mensia mayuh sida SPRM udah madahka, bala menteri kanan Taib lalu ukai iya empu ti nyain pemendar berampaska tanah orang bukai, kelimpah ari mayuh agi penyalah salah guna kuasa, sida tetap agi begunaka penerang bekaul enggau penyalah iya nya.
Beserimbai enggau nya, beberapa iku orang udah ngenataika isu sida ngagai kot undang-undang. Baka ni siku Kepala Menteri ti udah ngerusak mulia undang-undang nengah penuduk iya ti nyadi Pengarah dalam kompeni-kompeni iya empu, baka ti ditanya parti DAP, dikemendarka mangku pengawa nyadi Gabenor – sebengkah penuduk ti nagang sapa-sapa orang dia mangku pengawa nyadi pengarah dalam sebarang kompeni dagang.
Kot Tinggi Kuching udah madahka diri nadai kuasa veto nagang pengawa nyiri Gabenor nya dipejalaika ari atur YDP Agong.
Tang pemutus runding kot nya nyebut komen ti madahka Taib deka nyerahka pengawa nyadi pengarah dalam semua kompeni iya enti iya dichiri nyadi Gabenor ila!
Baka ni munyi jaku penetap ti manah agi ba pengawa pengarah ti dipangku Taib dalam kompeni-kompeni iya nya lalu pengawa nya endang salah ba undang-undang.
Taja pan orang mayuh nemu Taib udah ngelanggar mayuh undang-undang, mar bendar deka nagang iya niki Astana, kelimpah ari Menteri Besai empu bejalaika pengawa nya ti udah ari pechaya rayat iya empu kelimpah ari ti nyaga pengelantang sida.
Enti Najib enda ngelubahka pengawa nyiri Taib, orang mayuh di serata dunya tu deka nanya iya “berapa rega iya? Sekali ke Taib deka mayar duit suap ba pengawa bepilihbesai ke-14 tu ila tauka endang udah bisi sebarang sempekat ti dikena nyelamatka iya ari dipechat enggau chara ti betul?”
Menteri Besai nya tentu berindik ba tanah pemendar enti iya mechat Taib Mahmud, siku tuai ti lama udah dibalut penyalah makai suap ti balat nya.
Tu mih siku orang ti dikenang petunggal iya empu bekereja berindik ba penyalah makai suap munyi ti dikeluarka dalam video Global Witness.
Gerempung NGO nya baru tembu ngeluarka sebuah agi berita bekaul enggau penyalah makai suap, serak tu bekaul enggau makai suap bejuta-juta dollar ngagai anak Taib, Abu Bekir, ari kompeni Trienekens ari menua Jerman. Kompeni Trienekens udah mujur diberi kontrak muai uras udah bekau sida dituduh kena palit penyalah makai suap di pelilih Colonge – nama agi langgur penemu ti manah agi ke sida Taib Mahmud?
Taib endang deka mengkang mangku pengawa Kepala Menteri taja pan mayuh cherita pasal iya udah disebut dalam suratberita.
Tang Menteri Besai enda patut ngereja pengawa setengah jalai lalu ngemendarka Taib dichiri mangku pengawa Gabenor ti tau ngujungka iya nyadi kebal.
Semina Najib aja ulih ngemuntanka pengawa politik Taib.
Laban, enti Najib ngemendarka Taib terus nyadi Gabenor, Taib deka nudukka penganti iya ari raban sida sebilik empu, lalu iya deka terus bekuasa enda salah-salah menua Sarawak nya diempu iya nengali.
Nambahka nya, kemari tuai bekukut besai nya udah mansutka penerang bekaul enggau langgur perintah ti deka majak ngaga 5 iti agi tekat ai dikena ngeluarka kuasa elektrik di Sarawak, ti deka belabuh dipejalaika dalam setaun tu.
Perambu tu nyadi sebagi ti besai agi ti udah dipansutka iya dua hari sebedau iya ninggalka opis Kepala Menteri lalu jaku pesan nya terang bendar nandaka iya endang deka majak bekuasa, taja pan program ngaga tekat ai nya balat napi bantah orang mayuh.
Diatu Taib majak besedia napi bantah orang mayuh bekaul enggau isu tekat ai nya, kelimpah ari ti ngulihka untung ti mayuh ke iya empu nengah kontrak ti besai-besai ti diberika ngagai kompeni-kompeni iya.
Pendiau Kepala Menteri tuai ti badu gawa nya nyau majak dibalut mayuh macham skandal lalu tau bendar meri malu ari sehari ngagai sehari.
Enti Najib majak deka ngangkatka penuduk Taib nyadi Gabenor, iya deka bempu tanggungpengawa ba sebarang asai ati orang mayuh ti enda puas ati udah tu ila.