Sebengkah sama undang-undang ti dipunka anak tiri Najib Razak, Riza Aziz dikena iya ngelaban bala bakih pengeluar filem iya, Steve Stabler enggau Brad Krevoy, udah dibangkitka baru enggau semua tuduh ba iya, baka ti direpotka dalam suratberita di Los Angeles.
Stabler enggau Krevoy sama udah ngubah dawa balas seduai ba Riza enggau kompeni iya, Red Granite ti mayuh udah bulih duit belanja, berindik ba ‘atur ngelanggar Undang-undang Nipu enggau Gerempung Ti Ngena Atur Makai Suap’!
Hollywood Reporter ti udah mansik cherita tu, enggau laman web Deadline, madahka jaku-jaku tuduh ti baru bisi udah diengkahka dala kot di California nyadika sebagi ari rebut ba kuasa-kuasa atas filem Dumb and Dumber To.
Penerang ti silik tau dibacha ba surat tuduh ti udah difailka dalam kot, ditu (http://sarawak.s3.amazonaws.com/documents/Steve-Stabler-Brad-Krevoy%201-First_Amended_Complaint.pdf)
Kes tu udah ditemu bala lawyer di Hollywood, ti jarang bendar ngatur kes baka tu. Kes tu pansut udah bekau filem Wold of Wall Street, ti dipelanja ngena ungkus lebih $100 juta enggau mudah (sebengkah pengawa melanja filem dikereja Riza enggau bakih iya Joey Mcfarland) udah puntan ngulihka sebarang perais.
Pengenggai Komiti Perais Academy udah ngemendarka Riza Aziz nerima sebarang perais dulu ari peraiz Oscar, udah ngenyitka ati orang mayuh lalu mega nyungkak mayuh spekulesyen di Hollywood.
Pekara tu dientudika atur ngetu mangku pengawa Presiden Pengeluar Filem Joe Gatta dalam kompeni Red Granite.
Cherita nya udah nyungkak komen pasal pun penatai belanja ti enda nyengala ke kompeni nya lalu mega nyungkak buah kenang pasal pemanah nama sida laban pemesai pun belanja nya bedau kala dikejakuka dulu ari tu.
Red Granite udah meri timbal penemu sida ba jaku tanya nya ngena penerang bebulaka jaku tuduh nya. Kompeni nya, ti diarika raban lawyer ari Loeb and Loeb udah madahka suratberita Hollywood Reporter.
Bala lawyer ari Loeb and Loeb udah nuliska dua puchuk surat undang-undang nuju blog tu, dikena sida nuduh berita ti diperesa kami nya ti bisi ngenang pasal Riza Aziz enggau Red Granite dalam pengawa ngaga filem nya semina jaku petenah aja. Tang, jaku emba sida ti deka nyaman Sarawak Report mengkang bedau dipejalaika sida.
Diatu Hollywood agi nganti laban deka meda sekali ke kompeni Red Granite enggau bala lawyer sida deka napi tuduh ke baru diatu dalam kot tauka sida deka mutarka tuduh nya di luar kot, ti ba asal iya nya datai ari sebengkah pengawa dikena bebulaka pengeluar filem Dumber and Dumber To ti deka dikeluarka enda lama agi.
