Sarawak Report bisi udah bulih sanding penemu siku enjinir tekat kuasa karan tebilang ari menua Britain bekaul enggau pengawa miki enjin turbin ti benung dipejalaika ti baru dipasang di Murum.
Dr Phillip Williams ari kompeni Williams Associates ti bepalan di menua San Francisco nya siku orang ti pandai dalam pelajar pekara hidrolik. Kami bisi nunjukka repot ti ditiriska ngagai kami bekaul enggau enjin turbin digaga China ti nyau ka semua enjin baru nya bisi penimpang dipasang di Murum.
Kami mega ngayanka timbal penemu ari CEO SEB Torstein Sjotveit ti madahka “penimpang nya agi ba tikas ti tumu” lalu “ulih dibiki”, nyengkaum Penerang Media ari SEB ti betopik “Projek Tekat Kuasa Karan Murum Nya Chukup Likun”.
Dr Williams udah meri timbal penemu iya madahka iya besetuju enggau penemu Professor Daniel Kammen ari Universiti Berkeley ti madahka pengawa miki penimpang ba enjin turbin nya, perengka nya enda tau enda dichabut ari penuduk iya lalu dibiki dalam kedai turbin tauka diganti sekali.
Dr Williams nunjukka pengelemi ti bisi ditemu ba daun kipas turbin Murum, nyengkaum penimpang ti ditemu dalam besi enjin nya empu, sebaka enggau penimpang ti nyadika ketegal penusah ti ninggang stesyen kuasa karan hidro Sayano-Shushenskaya di menua Rusia dalam taun 2009 seuba, ti ngujungka enjin turbin nya techabut ari rerumah iya empu lalu ngerusak rumah pam stesyen nya, nabanka 75 nyawa bala pengereja pengawa di endur nya.
Sarawak Report udah mansutka jaku tanya ti bekaul enggau penemu CEO SEB Torstein Sjotveit madahka penanggul nya “udah ditemu ba tikas ti tumu” – sebengkah repot ti udah dipelalaika nyentuk ke kami mujur bulih salin ti udah ditiriska nya. Repot ti tau ngasuh ati tekenyit nya udah dikeluarka ari kompeni penyanding penemu Norconsult ari menua Norway, ti udah ngerintaika semua penimpang ti ditemu ba semua enjin turbin baru di Murum nya.
Nyadika timbal penemu iya ngagai jaku Torstein, Dr Williams belabaka “tikas tumu” nya engka nerangka pengawa sebedau masang enjin turbin nya.
Jaku bantah ti datai ari bala orang ti endang pandai ba pengawa ngeluarka kuasa karan hidro balat bendar pangka, lalu kompeni SEB patut meri jaku saut ti tau ngambi ati bala orang mayuh.
Pengelemi ba atur nguasa kualiti ti dipejalaika kompeni pengaga tekat ari menua China, Sino-Hydro udah ditemu nyadika pun penanggul di Bakun.
Kompeni Sino-Hydro udah bekereja dalam timpuh ti serekat enggau bajet ti dikenyadika laban ketegal politik, munyi ti ditusui bala staf sida, lalu beduduk ari nya sida nadai ibuhka pasal nguasa kualiti.
Dr Williams arap ke isu ti sebaka nya udah meri empas ti disadang tau ngerusak atur pengawa di Murum dikereja kompeni Three Gorges Dam ari menua China, ti udah dijaga ari kena tanya beduduk ba ketegal politik.
Patricia Adams, siku penulis bekaul enggau pekara rampa menua ti bepalan di menua Kanada, gerempung Probe International, udah bejalaika pansik iya ba fenomena program begagaka tekat di menua China, ti munyi ku penemu iya tau mai penusah ngagai menua ti benung mansang, nyengkaum Sarawak.
Pengawa ngaga tekat besai-besai nya sebengkah teknologi ti baru bendar lalu penemu nya agi ba tikas uji enggau pansik, lalu menua China agi mayuh utai patut dipelajarka ari menua di barat.
“Lebuh maya ngaga tekat Three Gorges di menua China, menua nya nadai pengelandik ngaga tekat ke diri empu” ku Adams, nya kebuah sida meri kontrak ngaga tekat nya ngagai kompeni ari menua barat ngambi sida tau bulih teknologi nya.
Tang atur nyaga kualiti ti dikemataka kompeni menua China empu enda sebaka tikas enggau pengawa ti dikereja menua ti endang lama udah maju, ku Adams meri jaku tangkan.
Nitihka asil pansik iya iya mantaika pemuntan ba pengawa ngemataka kualiti lalu pengawa salah nya endang “suah dikereja ba semua utai ti dikeluarka di menua China”.
Kompeni ti enggi perintah menua China nya kelalu rindu ngaga kaul dagang ba projek nya ba sebelah menua Afrika enggau ba endur bukai, ti endur isu rampa menua enggau kuasa pengelantang mensia suah agi enda dikibuhka pemerintah ti balat nekan rayat sida empu.
Bala pengereja pengawa ari menua China udah ngena timpuh dua taun ngeletupka batu dikena ngagai arus baruh tanah di Murum sebedau orang mayuh di Sarawak nemu pengawa nya udah belabuh (terima kasih ke raban Bruno Manser Fund ti udah mujur ngusaika resia tu).
Pengirau ati bala orang bansa asal ti ngayanka bantah sida udah enda dikibuhka Taib Mahmud, ti udah bulih penguntung bebilion-bilion ringgit ari pengawa nya, enggau mega bpenganti iya Adenan Satem ti nyadika anak patung iya.
Ke bendar iya, polisi penagang penyalah makai suap menua China ti baru dipejalaika udah meda dua iku pemesai dalam kompeni Three Gorges Dam nya bisi kaul bekereja ba pengawa ngaga tekat Murum, ti udah diasuh badu bekereja seduai. Projek besai di China nya diatu nyadika buah kenang orang mayuh laban skandal besai menua nya, nyungkak jaku tanya bekaul enggau penyalah ngenchuri wang turu enggau pekara pasal pengelemi ba atur ngemataka kualiti.
Dua iku pemesai kompeni nya nyadika orang ti sama diberi tanggungpengawa lebuh tekat Murum dikemendarka digaga, ti mega nyungkak jaku tanya pasal pengelantang ati kepala SEB ari menua Norway nya, ti ba minggu tu tadi madahka “Projek Tekat Murum nya Likun Dikena”.
Sepengudah beberapa taun opis menteri di Norway ti seruran enggai nyaut jaku tanya ti ditujuka ngagai sida, ti endur sida udah mayuh bendar melanja pengawa ngaga tekat di serata dunya, opis Kepala Audit sida diatu udah ngeluarka sebengkah repot bekaul enggau pengawa dagang ngaga tekat.
Menua ti balat kena kutuk baka menua Norway enggau orang siku-siku baka Torstein nya udah suah bepanggai ba pengawa ti nguji ngayanka pemereti ati orang mayuh ba penguntung ari tekat ti meri kuasa karan ‘ti beresi’ ti ‘manah ke proses pengangat dunya’.
Tekat nya dipelanja ngena kuasa karan ti beresi enggau bajet ubah ba gaya hari ari menua baka nya, tang pengawa nya ti bendar mai ubah ti jai agi ba gaya hari ti ngemediska mensia mayuh.
Lalu nama reti leka jaku ‘beresi’ enti dikaitka ngagai pengawa ngeleburka besi enggau palan ti bukai ti mai pengerusak ba sesebengkah kandang endur ti ditagaka SCORE di Sarawak?
Bala orang politik enggau raban orang dagang tu patut napi sebarang jaku tanya enggau bantah ari semua orang ti pandai dalam pekara tekat kuasa karan ari serata dunya lalu atur pengawa ti dilalaika patut diketuka enggau lengkas.