Sarawak Report udah diterangka pasal pemarai ngenyit Pengurus Pekara Teknikal ti bekereja dalam kompeni Sarawak Energy Bhd (SEB) ke projek Tekat Kuasa Karan Murum, Frankie Chin, ti udah dipansik opis MACC sebedau iya parai bulan nyin kemari.
Frankie Chin parai ngenyit kena malam 12hb Enam nyin kemari udah bekau kena serang sebansa penyakit tungkul ati.
Siku orang ti ngelala Chin bisi madahka ngagai Sarawak Report ti nusui pasal Chin, ti beumur 57 taun nya, mati ketegal diserang sakit tungkul ati, sepemulai iya nemuai ke menua Vietnam
Kami diterangka pasal Chin nya siku pemesai ba pekara teknikal bepenuduk tinggi dalam SEB ti diberi tanggungpengawa ngemataka pengawa ngaga enggau pengelikut tekat Murum, udah kena pansik opis MACC udah bekau pengirau ati sekeda bala orang pasal pengelikun tekat nya.
Frankie Chin disadang deka napi pansik audit di SEB ba hari ti besenutuk enggau pemarai iya, ti nunjukka penimpang ti tau mai penusah ngagai kipas injin turbin ti dianjung ngagai tapak tekat Murum nya.
Repot nya udah dipelalaika SEB lalu Sarawak Report diatu bisi udah nemu mayuh agi repot ti baka nya dipelalaika, bekaul enggau projek ngaga tekat nya.
Sarawak Report pechaya ke pasal pengirau ati bala orang ba penegut resia ti ngelilingi projek nya.
Siti dokumen ti pemadu beguna ti patut dikeluarka nya repot Empas Projek Ba Rampa Menua (EIA), ti patut dipejalaika sebedau projek belabuh digaga tauka dikerandauka orang mayuh.
Ke bendar iya, repot EIA ti bisi nusui pasal penimpang nya dikeluarka UDAH bekau pengawa ngaga tekat nya belabuh tang dipelalaika enggaika ditemu orang mayuh, ti deka enda bepeluang betanyaka pasal penimpang ti tau mai penusah, baka ti benung digaga kompeni Three Gorges ari menua China.
Berebak enggau nya, repot nya udah ditemu orang mayuh, terima kasih ke peniris berita ti diberika ngagai Sarawak Report.
Repot nya udah dibantaika ngegai SEB ari kompeni sanding penemu Norconsult ari Norway kena 20hb Tiga, lalu Frankie Chin nya nyadika siku pemesai dalam SEB ti diberi tanggungpengawa, meri repot iya ngagai bos iya CEO Torstein Dale Sjotveit.
Kompeni Norconsult udah ngaga simpul penemu sida madahka semua kipas turbin ke Murum nya bisi penimpang magang lalu “enda likun dipasang tauka dipejalaika”.
Taja pan baka nya, kompeni SEB bisi ditemu ngaga pemutus runding sida balalaika repot ari kompeni penyanding penemu tang lalu ngambi tinbdak miki penimpang nya ti mar ba tapak tekat, kelimpah ari ti nangguhka pengawa ngaga tekat.
Bala orang ti landik bisi madahka ngagai Sarawak Report, tindak nya enda kala dipejalaika ari ketegal pemalat pengerusak enggau pemesai penusah ti disadang tau nyadi ari penimpang nya.
Nitihka repot dalam dokumen ti diterima kami nya, Frankie Chin nya siku ari raban pengurus dalam SEB ti diberi tanggungpengawa bejuraika penanggul nya enggau kompeni Three Gorges enggau mega kompeni Harbin, tin gaga injin turbin ke guna di Murum nya.
Beduduk ba pemutus penemu ti deka miki semua injin turbin nya ba tapak tekat nya empu, kelimpah ari ti mulaika semua injin ti udah timpang digaga nya, penerang ti baru belabaka pengirau raban MACC ti nyadang Frankie Chin kala udah nerima duit suap.
Penerang ti bisi kaul enggau projek enggau mega Frankie Chine nya bisi madahka ngagai Sarawak Report madahka Chin udah kena tanyapansik sekali ke iya kala nerima duit suap ari kontraktor projek.
Bala pemeri penerang ti sama mega madahka, kelimpah ari Chin siku, agi bisi bala pemesai SEB ke bukai sama bisi kaul dalam pengawa nyambut duit suap ari kontraktor ti sama.
Diatu bisi pengirau ati ba orang mayuh ti madahka pengawa miki penimpang injin turbin Murum nya enda ulih putarka enggau meruan.
Resia ti ngelilingi projek Murum ti dipelalaika bala kontraktor ari menua bukai nya mengkang seruran diresiaka ari orang mayuh, reti nya nadai siku orang deka nemu nama bansa pengawa miki nya enti sema bisi dipejalaika.
Berebak enggau nya, pengawa nguji injin nya deka dikereja enda lama agi, nitihka penerang ti diterima kami.
Nitihka bala orang ti landik, enti injin turbin nya enda dibiki enggau manah, pengerusak nya ila deka mai penusah besai ngagai mensia mayuh ti diau bekelingi enggau tekat nya jemah ila.
Pengerusak ti disadang deka nyadi ba projek Murum nya ila deka ngujungka projek nya nyadi gajah burak, ti deka ngeluarka kuasa karan ti enda chukup ke guna, tauka nadai ngeluarka kuasa sekali. Penusah ti deka nuntung nya deka disadang besai amat, sebaka enggau penusah ti kala udah nyadi di menua Rusia dalam taun 2009 suba.