Beserimbai enggau bantah ari gerempung-gerempung NGO di Gerempung Bansa (PBB) sehari tu bekaul enggau tindak besenyata ti dipejalaika Perintah Sarawak ba bala orang asal ti ngayanka bantah sida enggau chara ti chelap di Baram, Sarawak Report ulih mantaika ulah seraban polis ti ngerumpang empang jalai ti dibantu bala tukang tumbang ti diupah kompeni nya.
Bisi 50 iku raban polis udah bejalaika atur ngererak empang jalai orang bansa asal ti didirika sida ti deka dikelai sida chukup setaun nya dikena sida mantah pemansang projek Tekat Baram.
Empang jalai nya didirika bala orang bansa asal nyadika kelai bantah sida laban enggai ke rampa menua enggau temuda-rimba sida diampuhka ai tekat ti bedau temu betul tauka enda nya.
Raban polis nya dibantu bala pemesai ari Opis Kampung enggau mega bala tukang tumbang ti diupah kompeni MM Golden, ti ngumbai diri bisi kuasa ngena lisin nebang kampung NCR enggi orang bansa asal nya.
Tang orang bansa asal, ti udah mantah lisin kayu batang nya, diatu udah meri penerang ngagai Sarawak Report ti madahka MM Golden udah tama ngagai kandang menua sida ngulihka kayu Tapang kenyau ari beberapa bulan tu udah.
Gambar ti diambi bala orang di menua nya empu bulan Lima tu tadi bisi ngerikod gambar sekeda kerita lipan enggi kompeni nya ngerusak kampung sida lalu ngenchuri kayu Tapang ti pemadu berega ari menua sida nya.
Reti nya raban polis enggau pemesai penerit adat ari opis kampung udah ngena bala tukang tumbang nya ngelaban bala orang bansa asal.
Kusai pekara tu udah ngeleseka jaku kepala menteri Sarawak ti baru ti madahka iya deka ngemunaska pengawa orang ngulihka kayu batang chara belalai di Sarawak, taja pan opis kampung ditemu agi ngena kompeni nya ngelaban orang bansa asal ngetanka menua sida.
MM Golden udah ditemu nanggam semaya ngaga jalai dikena ngepunka projek Sarawak Energy ngaga tekat Baram ti nyadika pemendar sida ngulihka lisin nebang kampung di endur nya.
Cherita tu ngayanka baka ni pengeran Taib enggau Sarawak Energy ngena chara pejal ngemasukka pemansang ti balat dikejakuka orang mayuh, taja pan projek nya bedau bulih pemendar orang mayuh.
Nitihka penerang ari Presiden JAOS Thomas Jalong beserimbai enggau hari ti ke-365 dikena nandaka peniri empang jalai di Baram, atur chara undang-undang projek nya mengkang bedau temu ulu enggau ili. Nya alai, perintah Sarawak enggau Sarawak Energy nadai kuasa ngepunka sebarang projek enggau chara meresi rampa menua di endur nya ti endang enggi orang bansa asal.
Bala orang bansa asal nyau jampat-jampat nirika baru empang jalai sida lalu udah sida dipejal ngambu empang jalai ti udah didirika sida dulu ari tu nyerumba sambut genap setaun empang jalai didirika.
Tang sida udah dipejal ngena undang-undang ngetanka tanah sida kena keruga lisin kampung ti dikeluarka atas tanah NCR sida enggau nadai diberi sebarang notis ari Taib, lebuh maya iya mangku pengawa kepala menteri enggau menteri pekara belanja menua suba.
Beratus-ratus iti lisin kampung udah dianjung ngagai kot di Sarawak, laban tikas nya dikemendarka Taib, ti mayuh agi nya ditemu salah ba undang-undang baka ti ditemu bala akim Kot Perintah Besai.
Taja pan suah udah dialahka dalam kot, tang perintah menua mengkang enggai ngubah undang-undang ti salah digaga Taib Mahmud!
Lalu lisin ngagai MM Golden ti udah ditesau enggau nadai nimpuh sereta bulih pemendar ari orang bansa asal udah tembu bepilihbesai bulan Tujuh 2013, nya siti ari chunto ti manah dikena nunjukka pendiau sida ngelanggar undang-undang.
Taib udah ngemendarka lisin atas tanah pesaka sida enggau nadai meri notis ngayanka undang-undang nya enda manah.
Sebengkah kes dalam kot ti dikenataika orang bansa asal ti udah tanggul ngelaban perintah menua lalu Taib udah ngelaban kuasa orang asal ba tanah pesaka sida.
Lalu, sapa ti betul?
Sekali ke orang bansa asal ti ngetanka tanah sida, tauka raban polis enggau Opis Kampung ti nguna bala tukang tumbang ti nyerang dunju pengibun empang jalai sida.
Lalu sekali ke atur ti belalai dikereja enggau kompeni dikena ngaga jalai projek tekat ti ngeluluka diri ngaga jalai kayu batang dikena nunjukka menua Sarawak nya sebuah menua ti megai penemu demokrasi ti bendar.
Enggau chara ngena pengasar ba orang bansa asal udah nunjukka ngagai orang mayuh di serata dunya nya kepala menteri Sarawak ti baru nya nyadika anak patung ti neruska polisi salah Gabenor Taib Mahmud.