Stesyen Radio Free Sarawak, kena hari dua tu tadi, udah diberi basa nerima perais ari Universiti Queensland di menua Australia nyadika pemenang Perais Komunikasyen Ke Ubah Gaya Kaul Mensia ke taun 2014.
Semina sebuah aja gerempung ti patut diberi tanda basa nya ti bekaul enggau atur komunikasyen ninting taun lalu raban ari RFS berasai gaga bendar ati nerima perais nya bepelasarka pengering projek sida, ti ngelama tu nyadika pengerembai berita enggau informasyen ngagai mensia mayuh di serata dunya.
Pemenang ba kategori orang siku-siku diberi ngagai siku pengarang berita fotografi ti mega nyadika orang tasah ari menua Afghanistan iya nya Barat Ali Batoor, ti udah nuliska dokumentasyen pejalai iya ti udu tasah ngiga menua endur ngenduh, meraka menua Malaysia enggau Indonesia nuju Australia.
Nerangka pasal pengawa RFS, Palan Komunikasyen Ke Ubah Kaul Mensia ari universiti nya madahka:
Radio Free Sarawak (RFS) udah ngena champur ICT enggau teknologi gelumbang angin pandak dikena mai perening media ti kritikal ngagai kandang endur ti tussah di lawa di Sarawak, lalu mega ngemudahka raban bansa asal din berandau ngena telefon ngenataika berita, lalu ngajar orang ari raban bansa asal pasal kuasa pengelantang sida enggau kuasa nguna media pemadah tauka kuasa ngulihka sebarang berita ti dikerembaika.
Pengepun stesyen RFS, Clare Rewcastle Brown enggau DJ ke terubah sida, Peter John Jaban (ti ngena bali nama Papa Orang Utan) udah dikangau ke nengeri Brisbane, Australia ngambika nerima tanda basa nya lalu mega betemu enggau bala tuai raban akademik di universiti nya, nyengkaum Profesor Pradip Thomas, ti mega diberi basa bejadika pengawa nya.
Duit perais nya ila deka dikena melanja pengawa meli enggau nyadung set radio ngambika dianjung ngagai menua pesisir di serata Sarawak.
Lebuh ti berandau dalam pengawa nya, Peter John Jaban bisi nusui baka ni sida sebilik enggau raban bansa Dayak udah dipejal ngemataka tanah pesaka enggau pengidup sida dirampas dalam kandang beberapa puluh taun tu enggau nadai diberi sebarang konsultasyen ti meruan.
Iya madahka diri ngena gela orang utan, laban kenu ku iya, pemidik raban bansa iya sebaka bendar pemidik baka jelu nya ti majak napi pemunas ketegal kampung enggau pengidup sida udah balat bendar kena keruga.
Clare Rewcastle mega madahka diri dipadahka pasal perais nya beberapa hari udah bekau laman blog iya, Sarawak Report, udah mantaika siku orang dagang ti nyadika pengeruga ba panchar program radio RFS enda badu-badu, ti udah ngujungka mayuh peninga ari menua pesisir ringat bendar.
Raban Sarawak Report udah berandau betunga mua enggau penyual perengka telekomunikasyen enggau pemanchar gelumbang radio, Ludo Maes, di nengeri Brussels sebedau sida bekejang ke nengeri Brisbane ti endur sida mai semua penerang ti bekaul enggau pengawa ngachau panchar program radio ari stesyen sida.
Lebuh dalam bilik aum enggau Ludo Maes, iya bisi direkod besetuju nyual perengka dikena iya ngachau panchar program radio orang bukai, ti kenu ku sida, datai ari menua Afrika.
Ludo madahka pengawa ngachau panchar program radio orang bukai nya sebengkah penyalah ba undang-undang penabur program entarabansa, tang udah nya iya madahka diri besedia nyual perengka nya (enti orang ti deka meli nya ulih mayar sebagi ari rega perengka nya) lalu “mantu bejalaika projek” dikena nentuka pengawa nya mujur dikereja.
Raban Radio Free Sarawak nya udah besemaya deka ngelaban Ludo ngena sebarang chara ketegal iya ti udah balat ngachau program sida, laban kenu ku raban RFS nya, kuasa nerima penerang enggau berita ke raban bansa asal ti diau di menua pesisir patut dikelala lalu dikemendarka ngambika sida mereti agi ke propaganda perintah, lalu program radio ti baka nya mega tau nyadika pelasar endur sida ngenataika serebana sebarang penanggul ti nuntung sida.
Clare Rewcastle mansutka jaku pengaga ati iya ngagai universiti nya ti udah ngelala pengawa sida dalam RFS, ukai semina ketegal perais nya, tang bepanggai ba pengarap ari mayuh bengkah institusyen entarabansa ti udah meri sukung sida dikena napi tekan enggau emba ari Taib Mahmud enggau kaban politik iya di Sarawak.
“Kami udah balat bendar dikutuk sereta diserang bala menteri BN enggau mega Taib Mahmud empu. Iya udah ngumbai stesyen kami tu ‘Stesyen Radio Ti Jai’ lalu kami udah dituduh ngerachun runding raban bansa Dayak. Kami dituduh ngachuk lalu tau mai penanggul ngagai kaul entara pengarap enggau bansa – semua nya tau mai nerangka sebengkah penyalah di Malaysia, ti endur serang tu dilancharka enggau udu ba orang ti pro-demokrasi udah bekau raban penyakal menang undi majoriti (enti enda kerusi) ba pengawa bepilihbesai nyin kemari.
Kami suah udah napi serang ba program radio ti dipancharka kami lalu kami pechaya serang ti baka nya begunaka belanja ti besai bendar.
Aku empu udah dikeleseka dalam rumah Parlimen Sarawak ulih Kepala Menteri laban kenu ku iya aku tu ngepunka penemu neo-kolonialisme dikena ngerampas hasil pengaya menua minyak ke penguntung aku empu – ukai ngena kapal perang ke diatu, tang ngena panchar gelumbang angin pandak ba pengelama dua jam selemai. Utai ti ngenusahka ati aku diatu nya aku enda diasuh nemuai ke menua Sarawak nya, sebuah menua ti endur aku ada menya.”
Perais nya dipadahka berebak enggau Perais Pemun Pengawa Pengerembai Berita 2013 Institusyen Pengerembai Berita Entarabansa lalu DJ RFS Peter John Jaban udah nerima tanda kelala ari sebengkah NGO Pengerembai Berita Nadai Sempadan ti bepalan di menua Peranchis nyadika siku ari raban 100 Bujang Berani Pengerembai Berita di dunya tu.