Udah ngelebus 15 taun jaku semaya ti bedau ditunaika, jaku penerang bala pengari rayat di Belaga kena minggu nyin kemari terang bendar nunjukka sida agi mengkang ngumbai bala orang bansa asal nya beli.
Ba siti jaku iya ti udu ngerichau Pengari Rayat ari menua nya empu, Liwan Lagang, bisi madahka pasal semaya ti deka ngeluarka bayar pampas ngagai orang asal ti bempu tanah, ti udah dipejal sida pindah ninggalka menua asal sida 20 taun ke udah, ku iya madahka “deka majak minta ngarika orang bansa asal”!
Nambah ke nya, kenu iya, iya udah mai pekara nya ngagau Menteri Besai Najib Razak enggau mega Kepala Menteri Sarawak, Taib Mahmud.
Seduai dua nya bisi kala besemaya sebedau PRU 2011 nyin kemari, madahka pampas ti kala disemayaka sepuluh taun ke suba nya deka ditunaika enggau jampat?
Enti nitihka, nya endang patut. Tang sampai ke diatu Liwan udah meri tanda ke nyelai madahka bisi penanggul, reti nya bayar pampas nya mar bendar deka diputarka … tau bendar ngasuh tekenyit ati.
Lebuh ti bejaku ngerichau Liwan madahka penanggul nya bepanggai ba pekara ti bisi kaul enggau “royalti” ti besangkutpaut enggau “perintah enggau perintah” lalu kelimpah ari nya “bayar chara ex-gratia” patut disidi.
Liwan madahka iya deka berandauka pekara tu enggau Kepala Menteri ti baru, Adenan Satem, ti ipar Taib empu.
Bala orang bansa asal di Belaga diatu udah nemu enti sema bisi duit pampas diagihka ngagai sida, duit nya tentu deka diperebutka bala kroni politik BN. Uji kitai meratika penulis jaku ke Liwan Lagang, ambi ke banding, Billy Abit Joo, siku pengari rayat BN ke dulu suba, nya Pengerusi dalam kompeni Wargana Consortium, ti ditumbuhka kenu ku jaku endang dikemataka iya kenyau ari iya agi nyadi MP ke menua nya.
Billy Abit mega siku pemegaai sher pemadu mayuh dalam kompeni persendirian nya ti bulih belanja ari wang turu orang mayuh, ti udah mujur bulih bejuta-juta ringgit dikena sida ngereja pengawa meresi uras ba danau tekat Bakun.
Sarawak Report kala mansutka skandal tu dalam taun 2012 suba ti nunjukka Billy kala didinga ngaku diri “mantu bala orang asal” nengah dagang dalam “koperasi” tu, tang ke bendar iya, iya mantu diri empu … ngulihka bejuta-juta ringgit. Lalu diatu, sekali agi Billy madahka diri agi mantu orang asal munyi ti disebut iya direkod suratberita Borneo Post.
Munyi ti direpotka Sarawak Report dalam taun 2012 suba, jaku randau orang mayuh pasal kompeni Wargana ti ditagaka nya gerempung “koperasi orang bansa asal, lalu orang bansa asal nya nyadika penerima ‘sher’ lalu mega ‘pengawa ti disediaka nya semina dikena ngelamun untung besai ke Billy enggau bos politik iya James jemut Masing, ti endur tiap iku seduai nya megai sher ba pemayuh 25,000 itu dalam kompeni nya (Masing, nengah nama mentua lelaki iya)
Ari sebuah gerempung kompeni ti nyengkaum 3 buah kompeni enggau 300,000 iti sher semina 25 iti aja sher diberika ngagai orang bansa asal, lebih agi 25 iku tuai raban, ti nerima siti sher ari kompeni Sinaran Bakun (M) Sdn Bhd, ti ngempu sebagi ari tiga bagi dalam gerempung kompeni nya.
Bala raban pengarah ti ngemataka kompeni nya Billy Abit enggau mentua lelaki James Masing, begulai enggau siku orang dagang ti megai sher mayuh agi, iya nya David Wong.
Seninjik bendar, taja pan kompeni Sinaran Bakun (M) nya sebuah kompeni betikas Berhad, kompeni nya enda dirintaika dalam palan Bursa Sher Malaysia. Lalu bala pengarah, iya nya Billy Abit enggau mentua lelaki James Masing diagihka dua iti sher siku-siku, enti disbanding siti sher ke tiap iku tuai raban bansa di menua nya.
Ba pun iya semua tuai raban bansa disemayaka deka diberi dividen ngarika rumah panjai enggau genturung sida. Tang bala pengarah kompeni lalu bedau ngeluarka bayar nya ngagai sida.
Kompeni Wargana udah ditumbuhka dalam taun 2005, sebedau tekat Bakun tembu digaga, lalu maya nya suba Billy Abit endang udah mangku pengawa nyadi pengarah. Kompeni nya udah bulih lisin nebang kayu batang – nemu tauka enda bala orang bansa asal pasal sher tu lalu bisi tauka nadai sida ngasaika penguntung nya? Saut iya, tentu nadai.
Baka ni chara Wargana enggau Pengerusi sida, Billy Abit “mantu” orang bansa asal nya? Enti nadai mayar dividen, engka bisi peluang bekereja ke orang bansa asal nya?
Sebuah kontrak ti beungkus RM9 juta ari Sarawak Hydro udah dikeluarka dikena mayar upah pengawa meresi danau tekat Bakun nya kenyau ari 2010. Tang nadai sebarang pengawa meresi danau dipejalaika, munyi ti dikenang siku orang bansa asal di menua nya.
Tang, tugung uras ti tau ngujungka penanggul besai di sebelah tebing danau nya, lalu bedau diperesi!
Utai ti balat nanggul iya nya bala tuai raban bansa enggau nembiak sida lalu bedau meda sebarang asil ari kontrak kompeni Wargana, tambah mega orang ti meri penerang ngagai kami madahka bala penerit adat endang enda kiruh ke pengawa orang ti ngulihka kayu batang chara belalai ti dipejalaika sekeda tuai raban bansa, ngena pengereja ti diupah sida ti datai ari Bintulu.
Tu siti ari pengawa ti enda ulih rara perintah datai ke sehari tu.
Tang kena hari Enam nyin kemari Billy Abit nyebut pasal tiga iti pengawa baru udah dipejadi Lembaga Sungai Sarawak ba sebuah palan pengemata pengelikun ti ngamatka jaku dawa sida Wargana udah mujur meri pengawa enggau pengeraja ke orang asal di menua nya.
Enda masuk akal.
Liwan seruran nguji ngulihka pemenang ke kerusi iya ba bepilihbesai ti deka dipejalaika sebarang maya, dipeda mansutka jaku umbuk ngagai perintah iya enggau mega ngagai Sarawak Hydro, awakka ulih nyediaka peluang bekereja ke raban nembiak bansa asal di menua nya.
Tang, pengari rayat nya dipeda kelalu balat masu Sarawak Hydro, enggau chara meri pengaga ati iya laban sida “mujur ngatur pengawa ti tau nguntungka orang mayuh”, nyadika siti tanggung pengawa sida ngagai orang bansa asal.
Liwan mega madahka orang mayuh pasal perambu ti deka nirika rumah muzium ti menua lalu tapak rumah nya agi ditentuka … enti bisi jalai tama ngagai endur nya udah dikemendarka perintah.
Tekat Bakun nya empu udah nyadika lambang penyalah makai suap lalu nyadika sebuah projek gajah burak ti pemadu besai di Asia Tenggara lalu orang bansa asal enggai masau hari ngarapka sebarang utai ti datai ari mimpi Liwan pasal pengawa puang ti baru dalam muzium nya ila.
Pansik ti dipejalaika ba pengulih ngena panel kuasa matahari ke raban orang bansa asal ti diau ba rumah jelatong nya nyadika pemilih kuasa karan ti manah (murah lalu enda mai empas pengerusak rampa menua ti balat) bebanding enggau projek kuasa hidro, ti diatu lalu bedau ulih ngeluarka kuasa karan ti enda bebayar baka ti disemayaka.
Bisi pengamat munyi ti diterangka Liwan lebuh iya berandauka pasal menua nya enda tau enda digagaka palan pengemata pengleikun di Bakun.
Enggau atur ti nirika palan pengemata pengelikun, orang Bakun deka nyadi orang tutup lalu bala nemuai ti deka ngusung endur nya enda diasuh tama kia sepeneka ati, enti nadai pemendar?
Sida tentu deka mulaika sebagi ari duit ti udah dicuri sida ari orang bansa asal, ngena duit suap sebedau bepilihbesai. Tang bala orang politik mengkang ngasuh bala orang asal nyadi seranta awakka duit suap ti mimit nya ulih diberika ngagai sida.
Tu siti ari kebuah orang bansa asal di Bakun enda ulih nerima duit pampas sida baka ti kala disemayaka perintah BN.