Gabenor Sarawak, Taib Mahmud, diatu benung bentaruhka duit to mayuh dikena iya nagang sebuah bup baru ti nguji ngebakka tudung penyalah makai suap dalam pengawa ngulihka batang di menua Sarawak.

Lalu ba sehari tu, di nengeri Tokyo, Jepun, raban delegasyen ari menua Malaysia ti ngulu sebengkah aum ITTO ninting taun udah ngansak gerempung nya matak status pemerati ke gerempung NGO Bruno Manser Fund (BMF).

Pengarah gerempung BMF, Lukas Straumann, nya orang ti nuliska bup bepansik, “Money Logging – On The Trail Of The Asian Timber Mafia”, udah enda diasuh tama ngagai bilik aum ITTO nya.

Bup nya udah dilancarka di nengeri Kuching enggau KL ba minggu siti nyin kemari lalu diatu tau dibeli ari laman web Amazon.

Nitihka BMF, bala pemesai dalam sekretariat ITTO, kena hari minggu tu tadi madahka sida enda nerima raban NGO BMF nya ngulu aum, lalu arah nya datai ari “sebengkah opis perintah pemadu tinggi ari Kuala Lumpur”.

Dalam cherita lama ba pengawa begerempung nadai kala udah sesebengkah gerempung NGO ditagang nyadi pemerati aum ngena atur ti baka nya.

Mayuh gerempung NGO ti rinduka rampa menua bisi begelumu ba endur nya laban mantah atur ti nagang BMF nyadi pemerati aum di Jepun nya.

Agi mega BMF nya nyadika siti gerempung NGO pemerati aum ti endang udah dikelala bendar di menua Eropa enggau sebarang menua ti nyadi tuai rumah aum ITTO beberapa puluh taun tu.

Siku pelobi penduduk Pengarah ITTO ari menua Malaysia ti lama udah ngining penuduk nya disadang tau ngasuh ati irau, laban gerempung ITTO nya ti bejalaika pengawa sida atas belanja orang mayuh disadang deka nyadika seruan ti ngarika industri kayu batang.

Berebak enggau nya, Taib diatu udah belabuh ngerah raban lawyer iya di London, kompeni Mishcon de Reya ngambika ngemba bala penulis enggau pengeluar bup nya awakka sida matak pulai bup dalam versyen jaku Inggeris nya ngena atur undang-undang ti kasar ketegal betenahka iya.

Chara emba baka nya udah mujur dikereja dulu ari tu dikena Taib matahka jaku tuduh kompeni pengeluar berita, ti endur bala pengarang berita sida kala nguji deka nusui pengamat gaya utai menua Sarawak.

Chunto iya, enda kurang ari tiga bengkah berita bekaul enggau pengawa ngubah duit ti dikereja menantu Taib, Sean Murray, udah dibatak pulai ari kedai di menua Kanada beberapa taun ke udah tu udah bekau bala penulis diserang ngena undang-undang enggau kasar bala lawyer iya.

Ba semua kes nya bala penulis berita nya udah nunduk ngagai tekan laban nyeliahka diri ari kena pangka undang-undang ti mar, sekali ke bisi tauka nadai penerang sida ti ulih nyukung pansik berita sida, baka ti suah udah ditusui mayuh pengarang berita ti enda lantang ati enggau pekara ti amat-amat nyadi.

Tang, pengawa ke diatu dikena nagang bup Money Loggiing nya udah ngayanka atur ti baru, lalu tau bendar ngeruga penuduk iya empu ti ditanka iya enggau bebendar.

Laban, enti kompeni pengeluar bup, Bergli, ari menua Switzerland enggau Amazon enggai nyurutka diri, dia Gabenor Sarawak nya enda tau enda ngena tindak undang-undang tauka blih malu ketegal ti enda berani nundukka diri enti diperesa raban akim enggau juri di menua Eropa.

Dulu ari tu, dalam taun 2011 bala lawyer ari Mishcon de Reya udah kala mansutka jaku emba sida ngagai Sarawak Report ngarika Taib Mahmud sebilik, tang bala lawyer nya lalu enda mujur ngirit Sarawak Report ngagai kot laban emba bala lawyer nya enda dikibuhka.

Bala lawyer ari Mishcon de Reya lalu bedau betemu enggau raban ari BMF tauka enggau penulis bup nya, laban sida endang nemu Lukas Straumann ngembuah chukup penerang dikena nyukung asil pansik ti ditulis iya, lalu Lukas tentu deka bendar dipecharaka baka nya.

Tang dalam surat sida ti panjai nuju kompeni pengeluar bup, Bergli, di Switzerland enggau bala pengagih bup Amazon, dia bala lawyer Taib, Mishcon de Reya udah ngutuk bup laban ngundan “jaku dawa enggau jaku tuduh ti liar lalu nadai pengamat ti tegap” pasal pengawa dagang Taib dalam industri ngulihka kayu batang di menua Sarawak.
Kompeni lawyer Mishcon de Reya madahka pengarang berita Sarawak Report, Clare Rewcastle Brown nya siku ari ‘penabur petenah besiri’. Taja pan sida suah enda mujur ngambi tindak undang-undang nitihka cherita ti udah dituliska iya.

Tang ba chara sida ti kelalu gagit deka ngelindung Taib Mahmud nya, bala sid udah ngengkahka iya ba penuduk ti tebuka ti ngujungka iya nyau enda lantang ati.

Lebuh sida ngeruga enggau mansutka jaku emba sida ngagai bala penulis enggau pengeluar bup di Amazon, sida mega nusui pasal pengeraja Taib Mahmud.

Dalam laman web sida mega nusui pasal 70% ari anak guam sida raban “orang ti kelaalu kaya di menua Asia” nyengkaum bala orang ari menua Malaysia ti kala udah dipetenahka bisi kaul ngubah duit kamah ulih bala pengarang berita.

Bala lawyer dalam Mishcon de Reya mengkang ngetanka penerang sida pasal Taib nyadika siku orang ti datai ari ruang bilik orang ti kaya raja lalu sida ngenggaika penatai asal Taib ari ruang bilik orang ti seranta, lalu sida mega ngenggaika penerang iya ti kala bulih bantu dikena belajar ke menuaa Australia.

Ngena penerang ti baka tu, bala lawyer Mishcon de Reya udah ngusaika ‘but’ Taib, ngena reti jaku ti bukai.

Taib mangku pengawa dalam perintah sereta iya udah tembu belajar ari universiti, lalu tu mai reti, gaji menteri ti jelan penyampau diterima iya ninting bulan nya mega bisi dituliska dalam pengelama semak lima puluh taun, lalu penerang tu nyungkak jaku tanya baka ni pengeraja iya ti enda anchi-anchi nya tau dikumbai bala lawyer iya nya datai ari pengawa iya ti lurus sereta betul.

Tang dalam surat sida ti panjai nuju penyadung bup Amazon, bala lawyer nya mega dipeda baka ti nguji terejun ke dalam lubang kebung ti ditumbak sida empu, enggau chara besebanaka empas ari jaku kutuk dalam bup nya pasa’ “keruga ngagai pemanah nama pengawa dagang” Taib Mahmud.

Tang baka ti ditemu dunya, Taib nya siku gabenor Sarawak lalu lebih 30 taun sebedau nya iya nyadi Kepala Menteri.
Ngena atur undang-undang menua iya empu ti nagang sapa-sapa menteri bekaul dalam sebarang pengawa dagang, Taib tentu enda patut irauka pemanah nama dagang iya dibalut pengamah!

Lukas Straumann udah enchabar Gabenor Sarawak ti benung ringat bendar nya awakka mai iya bechara dalam kot di menua Eropa.

Tang, kenu ku Lukas Straumann, iya endang arap bendar Taib enda berani ngereja utai nya, lalu iya ngumbai Taib endang rindu ngemba sapa-sapa ti ngeleseka iya ngena undang-undang ti mar.

Kompeni pengeluar bup Bergli mega madahka diri enda matak sebarang salin ari bup nya ari pemanggai sida lalu sehari tu, Lukas Straumann dipeda nbisi nyadung mayuh salin bup nya semak palan aum ITTO di menua Jepun.
Diatu bol nya benung ba menalan Taib, lalu pemintar enggau pengelandik iya bemain benung dikemataka mensia di serata dunya.