Lebuh maya iya enda nganu raban NGO ketegal pemerani sida madahka iya udu nebang kampung enggau enda betagang, Taib dipeda balat beenseraka ‘pemansang pengawa pengaga barang’ ti mega enda betagang di menua Sarawak.
Tang ba penemuai iya ke menua India, Gabenor Sarawak nya dipeda udah besedia bependiau beterus terang enggau bala orang ti ninga ke jaku iya.
Sarawak Report bisi tetemuka sebengkah penerang suratberita ti ditulis dalam jaku Taib ti becheritaka penemuai Taib nya ba bulan Duabelas nyin kemari, ti balat nusui jaku temegah iya bekaul enggau kayu batang ti nyadika pun pengawa dagang iya.
Dalam jaku iya ba mua Gabenor nengeri Tamil Nadu, Taib bisi didinga ngelakuka lalu madahka menua Sarawak agi mengkang nyadi penyual kayu batang kampung tropika ti pemadu besai di dunya.
Kampung temuda Sarawak ti mit agi ari kampung di menua Congo enggau Amazon mengkang ulih ngeluarka mayuh kayu batang bebanding enggau kampung di endur bukai di dunya, taja pan asil kayu batang nya udah lebih ari patut ditebang maya Taib nyadi Kepala Menteri Sarawak suba.
Kita kala ninga repot pasal pengawa enchuri kayu batang di menua bukai adap ke Tengah Kalimantan ti diangkut pansut nengah garis entara menua ti balat tiris, enggau mega chop ofisyel perintah ti nyelai, ti nyadika pun penatai asil kayu batang ke menua Sarawak ti meruan ke dijual ke menua bukai: laban enggau pengerembai pengawa bekebun dandang besai sawit, peluang nanam baru kayu kampung udah nyadi puntan.
Tang Taib agi bisi langgur ti bukai dikena iya ngeregaska agi penatai kayu batang ti dipeda makin kusut, enti sekeda ari bala pemacha kita agi ingat.
Langgur iya ti ngaga beberapa iti tekat ai ke kuasa karan ti besai-besai di serata menua Sarawak meri peluang ti manah ke pengawa nebang, ti deka diampunhka ai tekat ila.
Tekat Bakun ti udah tembu dalam taun 2011, udah meri asil beratus juta ringgit rega kayu batang enggau chara tu, ti udah silik ditebang Ting Pek Khing, siku kroni-kroni dagang ti tebilang ke Taib Mahmud.
Bala pemansik udah meresa penyampau kontrak nya lalu sida tetemu siti ari kompeni ti udah mujur bulih kontrak nebang kampung nya, ti diberi Ting Pek Khing nya sebuah kompeni ti benama Pacific Chemicals (PC).
PC nadai ngerejista bala orang ti bisi megai syer dalam kompeni nya, baka ti dipinta undang-undang, dalam opis Pengerejista Kompeni.
Tang sebuah pansik ti ditulis siku penulis ari menua US, Edmund Gomez dalm bup iya Chinese Business in Malaysia, ti dikeluarka dalam taun 1999. Gomez udah nyebut 7 ari 10 iku pemegai syer dalam kompeni Pacific Chemicals nya semina nomini, semak 20% ari kompeni nya dikuasa kompeni Majaharta Sdn Bhd ti diempu empat iku anak Taib (tang diatu dikuasa dua iku anak indu iya).
Pacific Chemicals ukai semina diberi kontrak nerangka 18,000 hektar kampung, tang kompeni nya mega diberi kontrak RM1.2 ribu juta dikena masang kabel kuasa karan Bakun.
Nitihka Gomez, Pacific Chemicals udah enggau jampat-jampat madamka dagang sida ti endang ngeluarka kimia dikena dalam pengawa betanam betupi lalu numpuka dagang sida ngagai pengawa ngulihka kayu batang ti udah nya tetemuka bakih dagang sida bisi penau dalam pengawa masang kabel kuasa karan!
Lalu ba Murum, dia Andrew Pattle udah nerangka ngagai bala bakih jurutera iya ti endur iya madahka pengawa nerangka kampung ari ulu Murum deka ngujungka rampang menua nya kusi lalu mai penusah tanah tusur ti udu. Keresik deka betakat ba tekat lalu tau ngujungka endur nya enda ulih ngundang tikas ai ujan ti sama baka dulu suba.
Tekat Murum ti digaga beratus-ratus batu ari ulu Bakun ti ukai semina ditemu enda ulih nampung sebarang pangka ai enti sema penusah tekat runtuh ari Murum, baka ti ditemu ba asil pansik empang ngagai rampa menua di endur nya empu.
Jaku tanya, baka ni pematut iya kepala Menteri ti mengkang nyadi pengansak projek SCORE, berani bendar madahka Sarawak udah mujur ngemataka pemanah kampung lalu diatu agi bisi 70% rampa menua iya agi dibalut kampung.
Jaku ke-dua ari taib nya ngenang pasal dagang temuai ti didinga enda ulih diterima akal. Jaku iya nya enda besenutuk enggau pemansang pengawa begagaka barang.
Sekali ke penemuai iya nya enda deka narit beribu-ribu iku anak kuli India munyi ti diguna perintah BN?
Sekali ke iya endang sengaja ngerusak dagang temua ngena atur nebang kampung?
Sekali ke iya ngumbai bala temuai ti datai ari jauh nya deka meda palan ngaga barang, kebun dandang besai enggau rumah tinggi-tinggi di sebelah nengeri aja?
Enda kini iya mereti ke bala temuai ti datai ke menua Sarawak deka tetarit ati ngagai main asal orang asal, kampung ti chukup intu, sungai enggai pengidup jelu, ikan enggau burung ti enda dikeruga?
Tang iya endang meretika semua tu, nya kebuah dagang temuai di Sarawak nya tau bendar ngasuh malu, lalu pengurang penatai bala temuai nya enda senutuk enggau pemesai rampa kampung 70% ti ku iya nya.
Taib endang enda rindu ke dagang temuai. Pengawa nya enda meri untung ti mayuh ngagai bala orang politik bebanding enggau pengawa ngulihka pengeraja ari tanah ti muntang agi dikereja. Ingat mih, rayat Sarawak deka mengkang seranta ngambi ke rejim perintah tau majakka ‘model pengawa pemansang’ sida empu.