Ba rambau Krismas, bala kaban politik parti merintah di Malaysia udah balat bendar ngutuk penanggul bah ti ngujungkan semak setengah juta iku orang tasah di menua nya.

Sekeda ari sida nya untuk ngutuk bala orang ti indu ketegal ti enda nutup mua diri lebuh nurun ke pasar lalu sida ngaitka dosa nya ngagai duju ai bah ti datai ari ukum Petara ti udah ringat ke ulah rayat ti enda ibuh nya.

Malu bendar laban bala kaban politik nya udah bejaku ngena sangka penemu ti ngumbai bala rayat Malaysia nya nadai ngembuan penemu sains ti endur sida tau peneka ati nempa cherita – sebengkah pengawa meri penerang besangka ti udah beumur lebih dua ribu taun ke udah.

Ke bendar iya, nadai utai ti dipelalaika bekaul enggau utai ti ngasuh ai bah ti ngujungka penusah ari ti dulu ari tu ba maya musim pengujan.

Ulah enggau pendiau ti jai nya ti nyadika urat penanggul tu, tang nya nadai kaul enggau pengelikun pendiau ti diayanka ba orang mayuh lalu iya endang bekaul enggau ulah enggau pendiau rangka sekeda orang.

Pengawa ti betebangka kampung ti enda betagang ba menua bebukit di serata menua tu udah ngurangka daya kandung tanah nyimpan ai ujan ba musim pengujan.

Ari ti nadai agi urat kayu dikena betan, tanah deka anyut ditabanka telusur ai ujan lalu nyadi lutak ti deka anyut nempuh rumah enggau genturung pendiau.

Tanah gemu enggau lutak bechampur ai tu deka lenyau selama iya.

Tanah runtuh enggau tekat pechah udah nyadika buah kenang mensia mayuh dalam beberapa taun tu. Bah ba maya Krismas diatu majah nyadika buah kenang ti ngerusak pengidup mensia, sebaka enggau taun-taun ti dulu ari tu.

Tanah ti mipau di menua adap kitu, udah belipat kali mai pengerusak ari ketegal pengawa ba kes baka di Malaysia enggau Borneo.

Penusah tu udah ngumbai dosa mensia nya nyadika penatai ukum ti baka tu.

Tang orang ti besai agi penyalah udah mujur nabanka beratus juta ringgit asil makai suap betebangka kayu kampung ke menua tasik lalu beranakka puku sida din, lalu beserimbai enggau nya bala rayat ti endang lama udah seranta napi penusah lenyau kampung enggau tanah asal sida.

Tu mih pengawa orang kelas politik, ti udah diberi pengarap bejalaika atur perintah di menua Malaysia.
Tang baka ti disadang sereta balat ngasuh malu, sekeda ari orang tu udah nyelak gamal sida empu ba guni beras (ti dibeli ngena duit rayat enggau pemayar chukai menua) ngambika disadung ngagai bala orang ti tusah napi bah ketegal pengawa enggau ulah orang ti rangka.

Nyerumba nya, lebuh penusah bah nyadi balat sebalat, Menteri Besai empu, Najib Razak, ditemu benung ngelantangka ati bemain golf enggau Presiden menua Amerika, ti naka ke diatu lalu enda irauka penyalah makai suap ba raban kaban UMNO enggau atur sida ti nekan demokrasi di baruh perintah Najib.

Nama kebuah? Laban, Presiden Obama bisi ati nguasa pejalai atur korporat Amerika ba atur pasar Malaysia baka ti disemayaka atur Dagang Transpasifik, lalu Najib mega besedia nyual menua iya empu dikena iya ngulihka penuduk ti tau meri iya peluang bemain golf enggau Obama ba musim Krismas.

Ke bendar, bala kaban politik UMNO/BN diatu udah belabuh ngelala sereta ngaku pun penusah bah nya, lalu ngutuk pengawa orang betebangka kayu enggau enda betagang sereta salah ba undang-undang.

Menteri Besai Malaysia ti dulu suba, Dr Mahathir udah mansutka buah penemu diri, lalu diatu Najib ngereja pengawa ti sebaka. Di menua Sarawak, Kepala Menteri Adenan Satem Satem udah mansutka jaku bantah iya mutap sereta ngutuk pengawa ngulihka kayu batang enggau chara enda betagang (ti endang lama udah nanam pengeringat ba bala penyakal, ti endur sida madahka Adenan Satem nya jauh jai agi ulah ari Taib Mahmud bekaul enggau pengawa ngerampas tanah).
Tang, tu mih bala orang ti endang amat-amat bempu tanggungpengawa ke penusah ti benung nuntung orang mayuh di menua tu.

Pengawa ngulihka kayu batang enggau chara ti salah ba undang-undang udah dikereja bala orang beberapa puluh taun tu udah. Semina diatu, lebuh semua kampung udah lenyau, baru sida belabuh bejaku ke atur deka ‘madamka’ penanggul tu.

BN/UMNO enda tau ditejuka lari ari pengamat sida ti bependiau geraji mata dua.

Sida suah udah ditangkan bala orang enggau gerempung NGO ti rinduka rampa menua enggau orang bansa asal ba pengelama beberapa puluh taun tu pasal ulah rangka sida, lalu saut sida nya sebaka belama.
“Kita udah ngereja nya, nama kebuah kami enda tau?”

Enggau leka ‘kita’, sida nunjukka ngagai bansa orang Eropa ti dulu menya ti lama udah parai lalu enda dikingatka agi beratus taun suba.

Guru Adenan Satem, Taib Mahmud rindu bendar betalat munyi tu, ‘kampung’ menua Eropa ‘balat dirusak’, nama kebuah kampung di Sarawak enda tau ditebang dikena meri awak ngagai pengawa ‘pemansang’?

Tang bala kaban politik tu nadai ngemansangka menua sida empu ke guna enggau penyamai orang bansa asal sida empu.

Sida nebang kayu kampung, nyual lalu nabanka rega nya ngagai menua bukai.

Berindik ari pengerangka bala orang politik tu, ti udah ngenasalka pemesai rampa kampung nyadi abuk kayu enggau keretas dalam timpuh ti kurang ari siti serak tubuh, diatu udah nyadika sida pengubah gaya hari.

Pengerusak rampa kampung nya udah balat ngujungka ubah ba gaya hari lalu semua ubah nya makin jai sejai ninting hari.

Nyerumba bala orang politik ti chabul mulut bejaku ke pengerusak ti dibai pengawa ngulihka batang ti enda betagang, Menteri Pemansang Tanah Sarawak, James Jemut Masing udah didinga meranika diri madahka menua Sarawak patut begunaka mayuh agi tekat ai, ti kenu ku iya, tau nagang penusah datai ari bah besai.

Baca enggau silik sereta lenak pasal tekat ai enggau mega pasal pengawa nebang kayu kampung ti enda betagang!

Tekat ai, ti endur kandang ngundan ai ti majak ditebang, baka ba kandang menua ari ulu tekat Murum, ambi ke banding, deka mai penusah besai bah ba dudi hari.

Di menua Sarawak enggau Malaysia ai hujan ti bangat ulih nganyutka tanah enggau pasir dikena nekan dinding tekat – baka ti udah nyadi di Cameron Highlands ti udah dikutuk Dr Mahathir.

Ba minggu nyin kemari penusah tanah tusur enggau tanah runtuh udah munuh orang.

Pengawa ti ngelanggar atur enjinir siti-siti tekat dengan mai penusah bah ba pekara ti mit enti dibandingka enggau nya.

Bala sida ti bependiau geraji mata dua tu mih ti patut diasuh anyutka bah ubah politik ti deka datai tu ila.