SCORE nya sebengkah projek pengawa ngaga barang pemadu tinggi di menua adap ke Asia Tenggara.
Projek ti betinjau jauh nya penuh enggau konkrit, tali kabel enggau simin ti didirika ba tengah-tengah kampung puang nya pemadu besai di dunya, enggau langgur nirika 12 buah tekat besai-besai ti udah disalah-chap nyadika pengeluar ‘kuasa karan ti beresi’.
Taib rindu ke tinjau besimin tu, laban iya empu udah bulih kuasa penuh ba palan pengeluar barang dikena ngaga rumah ke sida sebilik di Sarawak, lalu udah nukar CMS nyadi kompeni swasta ngagai genggam jari sida sebilik.
CMS ny udah nyadika kompeni pengeluar barang pemadu besai ke semua projek jalai enggau rumah kilang di menua Sarawak, terima kasih ke kontrak besai-besai ari perintah Sarawak.
Lebuh tali kabel kuasa karan ari semua tekat ai ti besai ti udah dilanggurka iya nya, dia petunggal Taib dipaduka nyadi pengerusi dalam kompeni kuasa karan dikena ngeregaska projek nya lalu anak lelaki iya nguasa penuh kompeni pengeluar tali kabel enggau chara nerima kontrak-kontrak ari petunggal iya nya.
Anak kuli Taib empu, Adenan Satem Satem, udah besemaya deka ngeregaska agi projek SCORE, ti udah nyadika semaya lebuh nukar Taib nyadi Kepala Menteri suba. Projek nya deka ngerusak semua batang sungai ti besai-besai Sarawak lalu mindahka pendiau bepuluh ribu iku orang bansa asal, ti mantah semua projek nya.
Nya alai, lebuh Dr Mahathir nyebut dalam jaku iya ba minggu tu ba Aum Kuasa Karan Entarabansa di Kuching, engka nya ku iya bisi pemilih ba pemansang ari sukut perening orang diri sebilik ti bukai di Sarawak – kelimpah ari perening sida Taib sebilik enggau bala kroni sida dalam CMS.
Endang amat ngasuh tekenyit laban Dr Mahathir nya nyadika temuai ke PBB Sarawak, lalu sida ngumbai Dr Mahathir deka mansutka jaku sukung ke projek sida ti besai nya.
Jaku iya baka ti nangkan semua orang ti ngulu aum nya!
Tang Dr M diatu udah duduk ba endur ti diasaika iya nadai disekat lebuh iya deka mansutka jaku ti datai ari runding iya.
Dr M mega lebih ngenuluka menua iya empu kelimpah ari ti berundingka isi bup akaun bank iya, munyi ti diterangka sekeda orang ti semak enggau iya.
Ke bendar iya, Dr M balat mantah pengawa ngaga tekat di Sarawak, beberapa minggu sebedau iya mansutka jaku iya di Kuching, lebuh iya ngemendarka jaku randau enggau Sarawak Report di KL. Tambah mega Dr M, baka ti ditemu orang mayuh endang siku tuai menua ti udah meri buah penemu lebuh pengawa ngaga Tekat Bakun suba, ti diatu benung mansutka kuasa karan ti belebih ari guna patut di Sarawak.
Orang tentu enda alit ati enti sema Dr M nandu serang iya nuju bala orang menua tasik ti mantah iya bekaul enggau pengawa ngerusak rampa menua di Malaysia sepemanjai iya bekereja suba.
Lebuh Sarawak Report betanya pasal kuasa pengelantang orang bansa asal di Sarawak, iya lalu nyerang bala orang di menua tasik enggau meri banding.
Nya nyadika siti lumur ti deka ditanya bala orang ti rinduka rampa menua lalu mega Menteri Besai ti dulu suba nya, ti udah netapka tikas ti baruh bebanding enggau pengerusak ti udah dikereja orang dalam cherita lama.
Lebuh iya ditanya pasal projek SCORE di menua Sarawak, Dr M madahka diri enda nemu enggau silik pasal projek nya.
Dr M engka udah silik mansik langgur Taib, siku tuai menua ti udah ditejuka iya merintah ngena kuasa autonomi pemadu lama di dunya.
Tambah mega projek SCORE nya nyadika penyungkak Tekat Bakun ti naka ke diatu nyadika projek tekat kuasa karan pemadu besai ti pelilih Asia Tenggara.
Bala pakar ekonomi dunya diatu belabuh betanya-tanya nama rasional beekonomi di belakang langgur projek nya lalu ari ni penatai bala klien projek nya ila?
Bala orang ti rinduka rampa menua endang lansik ba pendiau tebuka runding Dr M, bebanding enggau pemingking Taib, udah ngirumka mayuh surat penerang dikena nerangka langgur Taib ti rangka ti enda dipeguna orang mayuh nya.
SCORE nya nyadika projek pengeluar barang pemadu besai ti kala dilanggurka di pelilih adap ke Asia Tenggara tang nya semina dikemansangka chara resia lalu bulih input bala pakar ti pemadu mit ari menua tasik.
Dini endur penemu ti udah disara, langgur ti tebuka sereta mega pengelandik orang ba projek tu?
Diatu SCORE nya dipeda nyadika penyungkak pengawa dagang bebilion ringgit ke semua kompeni ti dikuasa sida Taib sebilik.
Bala delegasyen entarabansa ti datai baum di Borneo Convention Center (ti digaga menyadi indu Taib empu, Raziah) semua nya deka mai agenda rangka ke Sarawak. Tiap iku delegasyen nya deka mampul mata enggau pending diri empu ngagai penyalah makai suap enggau pemuntan ti disadang deka nuntung projek tu, lalu sida deka berasai pedis ati lebuh sida ninga penemu Dr M.
Dimaluka ulih jaku tuai UMNO pemadu tebilang nya, Perintah Sarawak diatu madahka sida deka berunding ngiga chara bukai ti manah agi ke rampa menua dikena ngeluarka kuasa karan baka ti dituduhka Dr Mahathir.
Sekali ke tu deka nyadika titik pemun ke SCORE?
Kita begunaka siku orang ti numbangka main Lego Taib Mahmud, ngapuska langgur iya ti deka ngaga 12 iti tekat besai-besai iya lalu madahka iya awakka iya nyerahka tanggungpengawa nya ngagai raban bala pakar ti endang dikelala?