Pengarah Opis Kampung Sabah, Sam Manan, direpotkan udah kena kangauka ba minggu nyin kemari betemu enggau Kepala Menteri Sabah, Musa Aman, ngambika bisi nerangka baka ni sekretari iya, Magdalena Maikas tau mudah bendar bulih lisin nebang kayu kampung galau perintah, baka ti udah direpotka pengarang berita Sarawak Report.
Lisin nebang kayu kampung nya, ti dikuasa kompeni Rinukut, ditagaka ba sebuah endur kebun dandang besai ‘besitak-sitak’, ti dibuka Sam Manan ba sebengkah kandang kampung, ke dulu suba ditagaka nyadika kampung galau perintah menua.
Bala pemegai syer dalam kompeni Rinukut nya menyadi lelaki ke sekretari Sam Manan enggau bini iya, sama enggau siku orang dagang di menua nya empu, Kelvin Tan.
Musa Aman udah ringat bendar laban nitihka penerang arid alam opis nya empu, iya nadai meri sebarang pemendar ba pengawa meri lisin nya, lalu Sam Manan diatu dituntung penanggul.
Tang diatu mayuh bendar penerang ti nunjukka bos Sam Manan nya empu, Musa Aman mega benung berasai angat, enggau tugung lisin kampung ti nyelai-nyelai sereta enggau puluh juta duit suap ti udah dipasukka ngagai kuchik iya.
Mayuh bendar penerang udah diperambuka bala pemansaik ari opis SPRM, ti ulih ngaitka Musa Aman enggau dagang bejuta-juta dollar enggau pengari iya Michael Chia, udah puntan dipechara dalam kot laban Lawyer Bansa, ti endang ari sida sebilik nya enggai ngambi sebarang tindak undang-undang atas iya.
Michael Chia udah ditekanka ukum jel enggau sekali sipat bekaul enggau kes nya, diatu benung ngapil kes nya dipecharaka baru.
Sarawak Report udah ngerekod mayuh bengkah penerang dikena ngelaban Musa Aman, nyengkaum penerang ti madahka Chia bempu akaun duit simpan dalam HSBC enggau UBS di menua Singapura, ti dikena nugungka duit suap bejuta-juta ringgit ari bala orang dagang Sabah ti ngulihka ‘lisin nebang kayu kampung’, ti beserimbai enggau nya mega dikena melanja bala anak Musa ti besekula di menua Australia enggau siku orang ti ngibun seduai ti besekula nya.
Taja pan udah dituduh nerima duit suap, Musa endang enda didawa, lalu diatu pengarap orang ba iya makin tendu lebih agi ari perintah besai enggau bala bakih politik iya empu dalam BN.
Penerang ari dalam pengawa politik di Sabah madahka ngagai Sarawak Report, Najib kala nangkan Musa Aman enggau Taib Mahmud ngambika ngetu bekereja ba taun nyin kemari, lebuh sida tiga nya betemu ba pengerami bejadika jematan di menua Brunei ba bulan Duabelas 2013 suba.
Dua iku kepala menteri nya sama udah dibantaika penyalah kleptokrasi seduai lalu ngasuh kaban parti BN makin lenyau pechaya, taja pan seduai sama udah meri pemayuh kerusi ke pelilih menua pesisir di Sabah enggau Sarawak.
Skandal lisin nebang kayu kampung ti bekelingi ba pendiau Pengarah Opis Kampung Sabah, Sam Manan enggau penulung ti rapit bendar enggau iya, Mag Maikas, nadai mantu meresi pengamah nama Musa Aman.
Siti penanggul ba Musa nya iya udah enda mujur nunda chara Taib Mahmud mangku pengawa Gabenor, siti penuduk ti kala disalahsangka tau meri pengebal dikena ngelindung penyamun raban bansa.
Gebanor Sabah ti diatu, Juhar bin Mahiruddin, disadang ngetu bekereja kena 31 haribulan Duabelas lalu Musa Aman andal bendar bulih pemendar ari BN Perintah Besai bulih penuduk pemadu tinggi di Sabah nya.
Musa Aman bisi ditemu ngereja pengawa jauh agi nyentuk ke iya udah ngemendarka duit perintah menua dikena meli sebuah kerita Rolls Royce ke guna Gabenor, ti endur iya empu ngarapka diri ulih nyadi gabenor lalu nepan kerita nya lebuh iya bulih penuduk nya ila!
Tang 31 haribulan Duabelas pan udah ngelebus, laban Gabenor Juhar diasuh mangku pengawa nya siti penggal agi, lalu neju ke Musa bedau ulih nepan kerita Rolls Royce nya, ditambah mega pengeliat ati bala munsuh politik iya majak lenyau.
Bala bakih Mag dalam opis kala besebana madahka indu nya balat bekuasa, terima kasih ke kaul rapit iya enggau tuan iya ba pengelama beberapa taun.
Mag Maikas dipeda udah ngambi mayuh bala anak kaban belayan bekereja dalam opis nya, enggau pengarap sida nya ulih ngentapka agi kuasa iya dalam opis nya – tambah mega nama iya udah dikena ngaga nama kebun bungai ba mua opis nya enggau mega kandang menua ti bebukit, kelimpah ari rampa kampung udah abis ditebang sida sekaban.
Nama sida sekaban ti bisi dalam rintai Direktori Opis Kampung Sabah nya nyengkau anak indu iya empu, Daphne Robert; anak menyadi lelaki iya empu, Herdarius Gaidim; dua iku anak menyadi iya, Bernstein Hilarius enggau Jannet Hilarius.
Siku agi kaban Mag ti sama bekereja dalam Opis Kampung Sabah nya, bisi anak menyadi iya Bernstein Hilarius iya nya Jennifer Amora.
Berebak enggau nya bekereja ba Opis Pekara Wang Sabah nya anak indu menyadi iya, Dymphna Bedi enggau siku agi kaban sida Marcella Philip Tutus.
Bekereja dalam Opis Pekara Ekonomi, Industri enggau Angka Kira-Kira Sabah nya Mecesza Soo, siku agi kaban iya. Enggau siku agi anak menyadi iya empu, Jane bedi ti bekereja ba Opis DO Sandakan. Bekereja ba Opis Kampung di pelilih Sook nya anak menyadi iya, Julius Gaidim.
Musa Aman enggau bala bakih politik iya mar bendar deka sebana ke pasal ulah nepotisma enggau makai suap ti dikereja orang dala opis perintah ti dikuasa sida – nya udah nyadi tebalan ba stail perintah sida lalu bala anak menyadi sida empu endang patut deka nunda pendiau baka nya.
Enti Najib udah salah singkang dalam atur 1MDB sereta mega bechara ke kes munuh Altantuya, Musa mega bisi kebuah iya empu ngereja ulah nya ba menua iya empu!