Mayuh repot madahka kompeni Cahya Mata Sarawak (CMS) enggi sida Taib sebilik udah belabuh ngambi alih sebengkah kompeni menua ti lalu ngujungka Sarawak Report mansutka jaku tanya ti nunjukka menua Sarawak agi mengkang dikuasa Kepala Menteri to dulu suba enggau mega ti nyadi Gabenor ke diatu, Abdul Taib Mahmud?
Ba pun iya CMS nya semina sebuah kompeni ti ‘dijual’ ngagai Kepala Menteri Taib enggau sida sebilik kenyau ari taun-taun 1980, nyerumba pengerembai aset menua enggau chara dagang nengali, lebih agi ba pengawa ngeluarka simen.
Kompeni nya udah enda ngetu-ngetu bulih untung ari kontrak menua sekumbang Taib nyadi Kepala Menteri suba.
Aset kompeni nya diatu nyengkaum “bank tanah tii besai bendar rampa” ti beduduk ba tanah ke ditagaka pemansang ti udah dibagi ari tanah perintah ti udah nya dijual baru ba rega ti murah bendar ngagai sida Taib sebilik.
Udah mayuh bendar peluang diterima ari perintah menua kenyau ari bepuluh-puluh taun ke udah ti ngujungka kompeni CMS ngerembai nyadi sebuah gerasi dagang ti kelalu besai, ngelamun dagang ti bukai di Sarawak.
Enggau nya kompeni CMS udah nyadika sebuah kompeni penchuri lalu nerumpak wang turu menua ti dikereja nengah siku tuai menua ti semina ngaku digela ngena nama tuai kleptokrat betikas dunya.
Resia pemujur CMS nya ngerebut tiap iti kontrak ti besai-besai di menua Sarawak sekumbang perintah menua ti betuaika Taib nyadi Kepala Menteri, ngena sebengkah sistem ti dikumbai iya “kontrak ti dipesetujuka” enggau enda ibuh ngena atur tender tebuka.
Tu mih atur dalam pengawa perintah menua ti dikarapka kitai patut diapuska sekali, nyerumba jaku pasal niat ti deka mai ubah ba jaku Kepala Menteri ti baru, Adenan Satem, ti suah didinga kitai bisi pengeran deka ngapuska penyalah makai suap, dikena iya ngenyamaika ati sekeda orang ti udah ngasaika pemedis maya diperintah Taib Mahmud.
Taja pan baka nya, orang mayuh udah dipadahka ba minggu nyin kemari ti endur Sekretari Pekara Wang Menua udah ngena kuasa iya nyual 50% ari sher dalam kompeni Sacofa, iya nya siti ari aset menua ti besai bendar rega enggau reti, ngagai kompeni CMS ba rega sepemaruh RM180 juta ti enda begunaka jurai tauka sara penemu ari mensia mayuh.
Dini endur jurai parlimen pasal pengawa nyual reta menua ti ngemeranka industri telekomunikasyen pemadu besai sereta tunggal ti benung ngerembai tu?
Nama kebuah orang mayuh enda dibai meresa tauka ngabas rega aset pemadu besai tu lalu nadai mega diatur sistem tender tebuka, enti pemutus penemu nya tau pulai ke pemanah orang mayuh – lebih agi endur reta nya pulai ngagai jari Taib ti endang udah lama kaya raja nya?
Tambah mega, bala pemayar chukai menua udah berasai enda tau enda mayar chukai dikena nyungkak pemujur kompeni Sacofa, tang ke pengujung iya dipasukka nyadi reta CMS, munyi ti disebut siku CEO British Richard Curtis ti enda nemu malu nya, ngagai bala orang ti beranakka puku sida dalam CMS.
Agi mega ke Taib, kompeni tu nyadika “penyedia tunggal ti nenggali” semua tiang menara telekomunikasyen di Sarawak, baka ti ditemu kitai, Gabenor nya rindu ke dagang nengali.
Tu udah ngujungka orang mayuh betanya nama penyadi ba ‘program ubah’ Kepala Menteri Sarawak ti baru enggau mega jaku penerang iya pasal sapa ti ‘lebih bekuasa’ diatu?
MP PKR Batu Lintang, See Chee How, udah nuduhka penemu ngambi ke jurai enggau sara penemu pasal pekara tu patut diatur, baka ti kala disebut iya ngagai Sarawak Report.
Mayuh suratberita udah nusui pasal cherita tu ba pengelama beberaapa minggu ke udah pasal penyakah Adenan nguji ngapuska mayuh macham penyalah ba pemesai-pemesai opis kampung lalu nyengkaum sekeda menteri lalu mega nangkap bala apek bayat ti mit-mit.
Tang ikan yu ti besai bendar agi ditejuka nyemerai di sebelah ai di menua Sarawak, begigaka pemakai, makai sebarang laluh industri enggau kontrak menua.
Ba minggu tu tadi CMS bisi dikenang laban udah mujur bulih siti kontrak ti besai bendar beungkus RM308 jua dikena ngaga sebuah rumah mijum baru di Kuching.
Adenan dipeda mantaika pengelemi iya empu ke bendar lalu majak tunduk ngagai peneka CMS. Pejalai pengawa dagang tu nunjukka saapaa orang ti agi regas bedagang, lalu nya mega nunjukka bala orang baka Sekretari Pekara Wang Menua mengkang kereja nitihka arah bos lama sida, iya nya orang ti meri sida pengawa suba.
Di baruh Adenan, ti endur iya endang bakih Taib, nadai mayuh raban pengereja pengawa udah ditukar. Semua penyokong politik iya enggau mega tuai-tuai opis perintah nya mengkang raban orang ti diberi Taib pengawa lalu agi nitihka arah Taib datai ke diatu.
Kepala Menteri ti baru nya udah suah sereta mayuh mantaika publisiti, nyerumba pengawa bala penyakal ti bebendar meri penerang madahka ubah ba politik ulih diaambi enggau enda ibuh bekereja bebendar, semina ngatur pengerami makai.
Ubah semina ulih disukat ngena tindak, lalu ukai disukat ngena leka jaku.