Bekaul enggau penemuai Presiden US Barack Obama ke menua Malaysia ba pun bulan baru, Najib sekali agi didinga bebula penerang ti ngasuh malu bekaul enggau 1MBD.
Sekali tu Najib bebula penerang nya ditujuka Najib ngagai jaku ambu CEO DuSable Frank White Jr, ti mega nyadika mandal pengawa dagang ke Obama.
Pansik kami tetemuka White udah ngerejista bayar setengah juta dollar ari Perintah Malaysia bekaul enggau 1MDB lalu iya mega disadang nyadika orang ti nulung ngemanahka kaul dua iku tuai politik nya, ti kala bemain golf di pulau Hawaii lebuh Malaysia dituntung penusah bah ba pun taun tu tadi.
Kompeni DuSable numpuka pengawa sida meli kuasa karan solar lalu ba taun nyin kemari udah madahka pengawa sida puntan dalam 1MDB di menua Kedah (ti endur kami diterangka pasal ungkus projek nya mar tiga kali lipat ari projek ti sebaka ba endur bukai).
Enggau nadai guna ti nyengala ke 1MDB ti ngarapka sebarang sukung ari US ba projek kuasa karan solar di Kedah, White disadang udah besetuju meransang kaul Perintah Malaysia ngagai bos politik iya, Obama.
Ambi ke banding, White ngatur main golf entara Najib enggau Obama.
Enda alit ati ninga, ba saut betulis iya dalam aum Parlimen, Najib udah bebula penerang madahka endang nadai sebarang sempekat udah ditanggam entara DuSable enggau 1MDB!
Enggau nya MP Wong Chen ari parti PKR ti mansutka jaku tanya nya madahka diri tekenyit.
Sekali ke Najib enggau kompeni 1MDB iya nuduh mandal ke Obama nya orang pemula?
Agi mega, sebarang sapa ti deka mansik pasal dokumen ti dikenataika DuSable, laban undang-undang menua US minta semua kompeni US ngerejista pengawa dagang sida ba atur FARA (Undang-undang Pengerejista Agen Dagang Menua Tasik).
Frank White Jr udah ngenataika dokumen iya bekaul enggau dagang iya enggau 1MDB, belabuh ari taun 2013, lebuh langgur pengawa ngaga stesyen kuasa karan solar nya ditesau ngagai orang mayuh.
Udah nya DuSable ngubah ambu iya ba tahun ti nangkanka nya enggau madahka kaul nya nadai besangkutpaut enggau puku dagang dalam kompeni ulih 1MDB, munyi ti kala disebut dulu suba.
Dipelabaka publisiti ti ngelingi berita pasal 1MDB deka beranakka puku dagang dalam DuSable nya udah dikumbai enda bekonstruktif.
Pekara ti diterangka dokumentasyen tu madahka DuSable endang bisi kaul pengawa dagang enggau 1MDB.
Penerang ba orang mayuh nunjukka penyampau duit ti betul diulihka DuSable ari “Perintah Malaysia” ti nyadika “bayar dagang kunsi projek kuasa karan di Malaysia” – munyi ti diambu DuSable.
Penyampau duit ti mayuh ke White ke pengawa iya, nyengkaum berandau enggau pemesai-pemesai perintah US dikena meri sukung ukai ngena mata duit. Iya nusui semua nya dalam pom ti enda sebaka, nyengkaum tambang bilun enggau endur ngenduh ke White enggau penulung pengarah iya ke KL.
MP Wong Chen ari parti penyakal PKR diatu enchabar Najib ngambika beterus terang pasal kaul 1MDB enggau menua US.
Engka Najib ulih mutarka penanggul tu sebedau Obama datai di KL dalam kandang dua minggu ti deka datai tu?