Diatu Sarawak Report ulih mantaika pasal kompeni kedua enggi Jho Low, Blackstone Asia Real Estate Partners Limited, ditemu bisi mayar beratus juta dollar ke dalam akaun enggi Menteri Besai Malaysia, Najib Razak, enggau mega Pengerusi wang turu Aabar ke udah diketuka gawa, Khadem al-Qubaisi.
Aabar, sebuah kompeni pampang ke wang turu IPIC, udah ditemu bebalut dalam sekeda pengawa dagang ti nyelai lalu dituntung pengerugi enggau 1MDB ti benung dibalut skandal, ti dikemataka Najib, ngena Jho Low ti nyadika proksi iya.
Pansik Sarawak Report nunjukka kompeni Blackstone, ti direjista di BVI lalu ngena alamat sida di Simgapura, udah ditemu nyadika pengirum duit dalam matawang dollar ti mayuh bendar ngagai Najib enggau Khadem antara taun 2011 enggau 2012. Penrang kami tu nyengkau dokumen telegraf ti diatur nengah sistem bank Amerika.
Kompeni menua tasik nya ngena chara ti selama dikena ngaburka mata orang ti seruran beratika Jho Low ti endur iya deka dipeda bisi kaul dagang ti manah sereta tegap enggau kompeni dagang ti besai ari menua US, iya nya Blackstone Group. Tang Blackstone Group nya nadai kaul terus enggau kompeni ti ditumbuhka iya (Blackstone Asia Real Estate Partners [BVI]) nya.
Dokumen ti diulihka ari bala pemansik entarabansa nunjukka penyain dokumen ke kompeni nya, Seet Li Lin, sapit Jho Low, ti mega ngari ke Jho Low ba kompeni Good Star Limited, sebuah kompeni ti diatu benung ba tengah-tengah skandal 1MDB, ti endur Jho Low mega nyadi pemegai sher pemadu mayuh.
Sekeda ari rekod sebedau kompeni nya dichairka ba pun taun 2013, semina tiga taun udah bejalaika pengawa, Blackstone Asia Real Estate Partners udah mindagka lebih setengah billion dollar ke dalam akaun Najib enggau Khadem. Tu senutuh enggau timpuh ti sama lebuh pengawa meli palan kuasa ti dituntung pengerugi udah dipelanja ngena atur ngangkatka bon bebillion dollar ngena jamin sama dua buah wang turu nya. Mayuh agi ari duit nya enda diakaunka enggau meruan, ti diatu udah nyadi penanggul utang ti kelalu besai ba 1MDB.
Sarawak Report bisi udah mantaika empat bengkah bayar berindik ba dokumen ngagai Khadem nengah akaun ba Banque Privee Edmond de Rothschilde Eropa (ti bisi induopis di Switzerland) dalam taun 2012. Penyampau semua duit nya kelalu besai.
Ba pemun iya, kena 29hb Mei 2012 Blackstone Asia (BVI) bisi ditemu mindahka US$158,000 juta ke dalam akaun Khadem, ti dipegai iya ngena nama Vasco Trust, ti endur iya nyadika pewaris enggau pengempu wang turu nya.
Tiga iti agi bayar diatur kena 3hb Ogos, 31hb Oktober enggau 4hb Disember nya ngengkaum penyampau duit US$100,750,000, US$129,000,000 enggau US$85,000,000 sesebengkah bayar nya. Semua penyampau bayar nya manggai lebih setengah billion dollar – lebih dua billion enti udah ditukar ngagai matawang menua bukai, dibayar ngagai kompeni BVI ti kabur ke dalam akaun Khadem dalam timpuh enam bulan.
Pemeri penerang madahka ngagai Sarawak Report bayar nya dikira ke duit suap ti dikaitka enggau Khadem dalam 1MDB.
Bisi sebengkah agi pemindah duit dipasukka ngagai akaun Khadem ba wang turu Vasco Trust ba taun ti sama – US$20,750,000 udah dipindahka ari Good Star enggi Jho Low kena 20hb Februari 2013.
Sarawak Report bulih penerang ti madahka pansik ba 1MDB ba akaun Najib ba AmBank di KL nya ngamatka penerang ti madahka bayar pemadu besai nya datai ari pumn ti sebaka dua tiga bulan dulu ari nya.
Dalam taun 2011 Blackstone Asia Real Estate Partners Ltd udah ngemasukka US$170 juta ke dalam akaun Najib ti sama, lalu udah nya US$680 juta agi ba taun 2013, baka ti dituliska Sarawak Report, kelimpah ari ti dituliska Wall Street Journal.
Sarawak Report kala nuliska pasal bayar ti dulu ari tu ti manggai lebih satu billion dollar. Udah tembu maya bepilihbesai lebih ari US$600 juta udah dipulaika ngagai akaun Najib di Singapura (akaun nya diatu udah dibekuka sekumbang kena pansik) lalu akaun ba AmBank nya diatu ditutup.
Kami ulih mantaika pasal pemindah terubah ti ba penyampauUS$170 juta datai ari Blackstone Asia Real Estate Partners (BVI) lalu disukung surat jamin ti sama ari siku sheikh pelesu Arab ti ditempaka nama ‘Saud Abdulaziz Majid al-Saud’, ti mega nyukung US$680 juta dalam taun 2013.
Baka ti udah ditemu kami enggau silik, Saud Abdulaziz Majid al-Saud nya nadai ujud di tanah Arab lalu sekeda surat jamin ti sebaka nya nadai nyebut alamat enggau pangkat iya.
Raban pemansik tentu enda alit ati ke 1MDB nya deka tembu enggau pengawa betanya pasal bayar bepenyampau besai nyadika sebagi ari pengawa sida ngambi pulai duit ti lenyau nya ngagai wang turu nya.
Raban pemansik ngaga simpul (sebedau sida diketuka gawa, ditangkap, lalu ba siti kes, dibunuh) madahka pemasuk duit ke dalam akaun Najib bisi kait enggau pengelenyau duit ti mayuh ari akaun kompeni nya.
Blackstone Group endang bisi sebuah kompeni mampang ti benama Blackstone Real Estate Partners Asia. Tang Blackstone Group, dalam saut sida, madahka Blackstone Asia Real Estate Partners (BVI) nya nadai bekaul enggau sida.
Pansik ba sekeda kompeni BVI ti enda tentu nyengala nya udah mantaika pasal kompeni kerubung nya udah dikorporatka ba 1hb November 2010 ngena nama Foreign FX Trading Ltd lalu udah nya nukar nama iya ngagai Blackstone Asia Real Estate Partners kena 26hb Mei 2011.
Udah tembu mindahka duit ba penyampau beratus juta dollar ke dalam akaun Najib enggau Khadem, kompeni nya lalu ditutup kena 30hb April 2013, sepenembu pengawa bepilihbesai Malaysia.
Sarawak Report ulih melabaka Blackstone (BVI) tu sebengkah kompeni resia dikena Jho Low mindah-mindahka duit.
Kompeni bukai ti enggi Jho Low ti udah ditentuka kami nya dikena iya mindah-mindah sereta ngubah duit nya PetroSaudi International Ltd (Seychelles), SRG (Strategic Resources Global), Aabar Investments PJS Limited enggau Merryl Capital.
Offshore Incorporations Center ti bepalan di London udah dikena ngerejista Good Star Ltd nyadi kompeni korporat di menua Seychelles enggau Blackstone (ti pelesu) di BVI. Sarawak Report udah nentuka bala pemansik entarabansa diatu ulih nukuka pemegai sher dalam Good Star nya endang Jho Low.
Najib diatu patut ngaku madahka duit ngemayuh nya udah direkodka duit ti lenyau ari 1MDB/Aabar udah ditemu dipasukka ngagai akaun Najib enggau Khadem.
Orang ti ngemudahka chara pemindah duit Blackstone BVI nya Jho Low sebedau iya nutup kompeni nya (baka Good Star) ba pengawa iya ngenyaruka penerang ti deka pansut.