Sarawak Report diatu udah nemu dua iku orang ti ngatur kaul dagang 1MDB enggau wang turu Aabar (ti anak kompeni IPIC) udah diketuka ari pengawa seduai ba kompeni bukai ti endur seduai gawa sepengudah seduai ninggalka Aabar suba.
Ba minggu nyin kemari Khadem Al Qubaisi udah diketuka ari pengawa iya ti nyadi Pengerusi dalam bank First Energy, ti endur kompeni Tasameem enggi iya nyadika pemegai sher pemadu besai dia. Bakan nya mega enggau bakih iya Mohamed Al Husseiny udah diketuka ari raban dalam Lembaga Pengarah.
Seduai dua nya kala udah dirintaika dalam laman web kompeni nya nyadi raban pengarah dalam bank nya nyentuk ke empat lima hari tu.
Tang nadai sebarang jaku gerah dipansutka lalu enda mega ditemu sekali ke Khadem udah nyual sher iya dalam bank nya, tauka sekali ke semua sher nya udah dibekuka berebak enggau pansik ti dipejalaika raban penerit undang-undang bekaul enggau pengelenyau duit ti mayuh ari dagang kunsi 1MDB-Aabar nya. Pekara ti nyata nya seduai sama udah lenyau ari rintai nama raban pengarah bank nya lalu naka ke diatu bedau bisi orang nganti.
Khadem enggau Al-Husseiny udah dibuai ari Aabar enggau mega dalam IPIC, udah bekau ngubah pemindah duit bebillion-billion dollar ari 1MDB, ti endur Aabar udah bejalaika pengawa ngangkatka bon dalam dagang kunsi nya.
Kedua-dua iku lelaki nya ditemu bisi kaul ti manah enggau siku orang dagang ti biak umur ti mega nyadika sanding penemu, Jho Low, enggau mega Menteri Besai Malaysia, Mohd Najib Abdul Razak.
Al Husseiny mega ngaku diri nyadi orang ti melanja bejuta-juta dollar dikena begagaka mayuh filem anak tiri Najib, iya nya Riza Aziz.
Pemesai ti kereja perintah begaji bulan nya bedau nerangka baka ni iya bisi akses ngagai sepenyampau duit ti mayuh bendar.
Khadem, ti udah nerima lebih setengah billion dollar ke dalam akaun bank iya ari dua buah kompeni enggi Jho Low, udah diketuka ari pengawa iya dalam IPIC ba bulan April 2013 besenutuk enggau maya 1MDB ti benung gagau sereta kiruh bebayarka utang mayuh bengkah bank.
Al-Husseiny mengkang dalam penuduk iya dua tiga minggu lama agi ari Khadem ;a;u siti ari pengawa iya ti penudi nya nanggam sempekat enggau 1MDB ngarika Aabar dikena nanggung utang (ba penyampau US$1 billion) nyentuk ngagai bulan Jun 2016 tu ila.
Al-Husseiny ngatur sempekat nya ti ngujungka kaul dagang kunsi nya nyadika penanggul ke Aabar, mejal sida mayar pulai utang dikena ngelempungka kompeni nya.
Di sepiak Abu Dhabi, raban pengarah sida udah belabuh ringat ke penanggul tu.
First Energy Bank nya nyadika pengeregas dagang ke Abu Dhabi. Ba taun nyin kemari Sarawak Report bisi nemu Khadem, nengah kompeni iya Tasameem nyadika pemegai sher pemadu besai lalu dientudika Opis Dagang Libya.
Enti mayuh bala orang ti bekereja ba perintah bepangkat tinggi udah ngumpul asset ti mayuh nya udah dibekuka, bank tu enggau mega kompeni ti bukai tentu deka dituntung penanggul ti sama.
Dagang kunsi 1MDB Malaysia enggau bala orang ti bekelala enggau sida dalam Aabar udah ngujungka pala pedis ke menua dalam Emiriyah nya sebaka enggau ti diasaika di Kuala Lumpur mega.