TU MIH MAYA MATAK PENGUNDI 45% NYA!
Kepala PKR Sarawak, Baru Bian, sehari tu tama ke dalam rumah Dewan Undangan Negeri ba kali ke terubah bebekalka jaku seregah. Iya bisi udah madahka Sarawak Report dalam sebengkah jaku randau iya, tu mih maya nesau sereta ngerah sukung ari bala pengundi dikena ngemansangka raban penyakal ba atur pengawa bepilih besai menua tu.
Dalam jaku pinta iya ngagai bala pengundi 45% ti udah milih penyakal, taja pan udah mujur bulih penuduk DUN ti mimit, rakyat Sarawak enda tau enda ngembuan ‘daya idup ti mudah meri diri’ dikena munaska penyalah makai suap dalam politik enggau ngurangka pemayuh pengundi ti kurang regas. Ku iya madah ngagai Sarawak Report:
“Ngerak sukung 45% nya pengawa ti beguna amat. Pengerindu meri diri ngereja pengawa nya ukai daya idup raban orang ba menua tunga kitu. Nya kebuah kitai enda tau enda ngerak bala orang lalu mai ubah baka ti dikedekaka semua kitai. Kita patut bebendar agi bekereja, laban enti enda baka nya orang deka selalu arapka diri dipampas ke semua pengawa ti dikereja sida. Kitai enda tau enggau naka ulih ngambi ati orang lalu nerang ngagai sida nya kitai ti ngereja utai tu awakka pulai ke penguntung serak tubuh kitai enggau serak tubuh ke dudi ari kitai”.
Kepala PKR, ke terubah iya tama ngagai DUN nyadi siku ari 3 iku pengari ari menua pesisir ti udah mujur ngerampas penuduk ari genggam BN, mega minta ditambahka agi sukung ari pengundi menua pesisir.
Raban penyakal, ti diarika DAP, udah mujur agi ngerampas nyau deka semua kerusi di kandang nengeri laban bala pengundi sida mereti agi ke isu-isu lalu sida mega ngembuan perengka-perengka pengawa politik ti manah. Taja pan baka nya enggau pemayuh kerusi BN di menua pesisir, Baru Bian deka nentuka raban PKR di nengeri ulih meri bantu ngagai kaban PKR ngerebut kerusi di menua pesisir ba pengawa bepilih besai tu ila. Ba pengawa bepilih besai tu tadi mayuh bendar kerusi semak deka ulih rampas sida PKR
“DAP tau mantu PKR tauka PAS ngulihka kerusi enggau chara meri bantu belanja sereta enggau bala pengereja pengawa maya kempen”, ku iya nerangka.
Kepala PKR nya enggau bejimat madahka kaul entara parti penyakal patut digaga manah ke agi, taja pan sida kala besengki penemu enggau pangan diri baka ti direpotka. Iya ulih nerima DAP ti ngaga kaul enggau SNAP, lalu iya mega deka numpuka perati iya deka madamka penyalah makai suap lalu ngamatka jaku semaya baka ti digaga dalam sempekat 20 pekara. Enti sema raban penyakal ulih bekuasa, iya madahka langkah sida keterubah nya deka ngambi pulai semua pengaya ti udah dicuri bala tuai-tuai BN.
Baru Bian meri penetap ngagai Sarawak Report kempen meri diri ngereja pengawa benung dipejalaika ba minggu-minggu ti deka datai tu ila, lalu sebarang sapa orang ti ulih magi jam, belanja, enggau pengelandik diri dikena nentuka pengelantang menua Sarawak.
JAKU RANDAU ENGGAU BARU BIAN
Nitihka pemutus pengawa bepilih besai tu tadi, nama pekara-pekara ti manah-manah ditemu nuan, lalu nama pelajar ti beguna ba raban penyakal?
“Keterubah, pekara ti manah iya nya undi nyukung raban penyakal bisi betambah, iya nya 45%. Undi nyukung BN bisi kusut ari 63% ngagai 55%. Kedua, penerima pupu raban bansa asal ba parti-parti penyakal udah nyata bendar. Bansa China di kandang nengeri nyau deka sampal nyukung DAP. Pekara tu endang disadang, laban raban China tu raban orang ti mudah agi bulih semua penerang pasal pekara ti nyadi dalam menua tu. PKR mega mujur ngulihka tiga iti kerusi, tu ngayanka sukung ari raban orang Ulu (di Ba’Kelalan), Iban (Ulu Krian) enggau China (Batu Lintang). Taja pan PKR enda mujur menang kerusi ba kandang menua Bidayuh, tang sukung ngagai PKR dia bisi betambah manah. Ba pelilih menua Beting Maro, kerusi ti nyau deka ulih rampas PAS, ngayanka bala pengundi Melayu bisi nambah ba sukung sida ngagai Pakatan Rakyat.
Pelajar ti ditemu ari pemutus nya kemari ngayanka bansa China udah besedia nerima ubah baka ti dikedeka ke. Tu nunjukka kitai sukung ari raban bansa China enggau nadai ngira parti ni ti didirika sida. Chunto iya baka ba Batu Lintang enggau Senadin ti udah ngengkahka parti PKR. Kami menang di Batu Lintang jauh besai ari taun 2008 suba lebuh maya DAP bediri dia. Di sitak Senadin kami alah mimit bendar. Parti DAP alah ba dua iti penuduk sitak ukai China ti diperebutka sida iya nya ba Sri Aman enggau Bukit Kota, ti ngayanka bansa ukai China bedau besedia nerima DAP nyadi ke parti ti deka ngarika sida. Tu dikena nangkan DAP ngambika sida lebih tebuka agi ngagai raban bansa bukai; lalu enggau nya sida bisi ngayanka diri deka ngaul SNAP lalu ngatur Penulung bebansa Bidayuh bekereja enggau YB Chong ngambika bisi ngemataka pengawa ti bekaul enggau bansa Bidayuh di Kuching.
Ba PKR, sekeda kerusi ti ulih dimenang, ambi ke banding di Telang Usan enggau Kakus enti enda ketegal tanggul ba sekeda-sekeda endur. Diatu kami udah nemu mayuh bendar pekara ti tau nanggul kami ngulihka kerusi, iya nya tau dibagi ngagai dua pekara; pekara luar enggau pekara dalam. Pekara luar bekaul enggau jaku emba, jaku semaya deka meri pemansang enggau projek-projek, nguasa semua perengka pengangkut mensia mayuh, nguasa semua tuai-tuai raban bansa enggau pengawa ‘nyuap’, enggau ti bukai, lalu pekara ti nanggul datai ari dalam nya baka tukuh politik ti enda tegap, laun diasuh mangku pengawa lalu laun mega ngeluarka nama pengari, Agen Pengundi enggau Agen Pengira undi (PACA) ti salah pilih. Pengurang penemu enggau pengelandik ba bala PACA lalu penyuntuk belanja nya sekeda ari pekara ti enda diperatika kami enggau silik”.
Nama atur pengawa PKR dikena ngemanahka agi atur ila?
“Pekara ti keterubah nya ngerejister bala pengundi raban nembiak enggau pengundi baru lalu ngumbuk sida nyadi pekereja parti. Enggau mayuh agi pengundi baru ti endang mereti agi ke chura enggau gaya politik menua tu, PKR deka mujur ngulihka sukung bala pengundi raban bansa Dayak enggau Melayu/Melanau. Kebuah pia, laban PKR endang senutuk bendar enggau bala orang bansa asal lalu tuai-tuai dalam PKR mega ditemu deka kiruhka penanggul bekaul enggau tanah-buah di serata menua tu. Kami enda tau enda muka mayuh agi pampang parti di genturung pendiau orang dikena ngaul sida. Mayuh agi ceramah patut diatur. Bekereja segulai sejalai enggau kaban PR ke bukai. Pengari enda tau enda ditentuka tumu ngambika tumu mega dikelala bala pengundi. Pampang parti di menua tu enda tau enda mega ngatika diri ba pekara belanja lalu enda tau selalu bepanggai ba bantu belanja ari Indu Upis Parti aja. Tang Indu Upis mega enda tau enda nulung enggau patut ba semua pengawa ti diatur di menua tu”.
Nama sekeda ari pugu pekara dalam manifesto kita ti tau matak penyukung kita ila?
“PKR tu sebengkah parti ti agi biak enti dibandingka enggau DAP enggau PAS, kelebih agi ba menua Sarawak. Tang sukung ari bala pengundi chukup meri kami peransang, baka ti diayanka ba 3 iti kerusi ti dimenang kami, enggau kerusi ti diperebutka kami taja pan kami alah. Nya kebuah kami enda tau enda betan lalu majak ngaul mayuh agi penyukung. Bala tuai kami enda tau enda tetap ati enggau runding. Ya, kami enda tau enda nekanka manifesto kami ba senentang atur perintah ti manah sereta nyengala. Pemutus runding kami ba ngaluska penanggul tanah-tanah NCR ti nuntung semua raban bansa asal. Bebasaka sempekat 20 pekara lalu minta nambahka bayar royalty petroleum nya mega sekeda ari pekara-pekara dalam manifesto ti deka digaga nyata nitihka juluk ati mayuh agi orang Sarawak”.
Ulih nuan nerangka kaul dalam PR enggau DAP – deka tauka enggai DAP mantu kita ba sitak menua pesisir tu ila?
“Bala kaban dalam PKR nadai penanggul bekereja begulai enggau DAP ti tau pulai ke pemanah kaul dalam PR. Semina penanggul ti ditapi kami suba iya nya ke terubah kami bejuraika pemun kaul kami nya. Tu endang ditemu kami laban DAP endang bejuluk-ati deka ngulihka sitak ti mayuh agi diuan raban bansa China, laban kerusi-kerusi nya endang ditemu sida deka ulih rampas sida (ari BN). Sida DAP nemu sida enda ulih mujur ngulihka kerusi ari sitak menua ti mayuh agi bala Dayak/Melayu. Enggau nya DAP tau mantu PKR tauka PAS enggau chara meri bantu belanja enggau bala pengereja pengawa sida lebuh maya kempen”.
Nama pengelemi BN dipeda kita ba bepilih besai tu ila?
“BN nadai manifesto ti ngenyala ulih terima semua orang Sarawak. Enggi sida BN nya politik duit enggau pengawa ‘nyuap’ pengundi. Enggi sida nya semina Jaku Semaya ke pemansang-pemansang enggau projek-projek, tang enda semua ulih dikamatka sida. Udah pengawa tembu, bala rakyat pan deka nemu BN enda ulih ngamatka jaku semaya sida, semina semaya ti balang. Pengamat deka nyadi nyata. Raban PR enda tau enda terus nyerungkai lalu mantaika semua pemula ti ayan dalam penerang-penerang BN maya bekempen”.
Nama pemanah iya pulai ke PKR ti deka ngerah 45% pengundi ti udah ngundi sida dalam PR suba
“Ngerak sukung 45% nya pengawa ti beguna amat. Pengerindu meri diri ngereja pengawa nya ukai daya idup raban orang ba menua tunga kitu. Nya kebuah kitai enda tau enda ngerak bala orang lalu mai ubah baka ti dikedekaka semua kitai. Kita patut bebendar agi bekereja, laban enti enda baka nya orang deka selalu arapka diri dipampas ke semua pengawa ti dikereja sida. Kitai enda tau enda enggau naka nulih ngambi ati orang lalu nerang ngagai sida nya kitai ti ngereja utai tu awakka pulai ke penguntung serak tubuh kitai enggau serak tubuh ke dudi ari kitai”.
Ba runding nuan, nama pengawa ti deka dikereja raban PKR di Sarawak enti sida iya menang ba pengawa bepilih besai tu ila?
“Pekara ti keterubah patut dikereja nya mai semua tuai-tuai BN ti lama udah ngereja penyalah makai suap, bepun enggau Kepala Menteri enggau bala kroni iya. Semua ‘perepasan’ ti ulih sida ngerampas ari rakyat enda tau enda dipulaika ngagai rakyat baru. Udah nya kami deka minta ditambahka royalty petroleum lalu ngeluarka duit agih dikena melanja pengawa pemansang. Jalai-jalai ti besabungka nengeri enggau menua pesisir enda tau enda digaga enggau jampat ngena belanja ari perintah besai. Pekara tu dikena muka jalai ke pengawa betanam betupi dikena nyukung pengawa pemansang lalu ngambika penguntung ari pemansang nya ulih dibai ke nengeri. Kami deka beratika baru sempekat 20 pekara ba sempekat penumbuh serakup Malaysia lalu ngubah dini-dini pekara ti patut diubah”.
Nama runding nuan ba jaku penerang ari Kepala MACC ti bekaul enggau pansik ba Taib Mahmud?
“Aku gaga bendar ati ninga berita MACC ti deka mansik Taib Mahmud. Aku enda arapka MACC berani mansik Taib Mahmud, taja pan sida bisi penerang-penrang ti silik bekaul enggau pengaya ti ulih iya enggau chara ti salah ngelama tu. Taib nya kelalu beguna bendar ke Najib, laban iya suah bendar udah mai pemenang BN Sarawak, lalu Najib pan enda patut mega ‘ngetup jari orang ti nyapi iya makai’ ngelama-lama tu. Tang enti MACC bisi pemerani bejalaika pansik, nya udah tau dikumbai kereja ajih”.
Baka ni pengasai ati nuan ketungkah nuan ti deka enggau orang baum dalam DUN lalu nama batang pengawa ti deka dikereja nuan dia?
“Aku endang berasai gaga ati nyadi siku ari orang ti dipilih enggau baum dalam DUN nya, ngarapka diri empu ulih mai pemanah ke menua Sarawak enggau rakyat iya, ngarapka perintah ti manah sereta meruan, ngarapka polisi ti menuku, pengaya ti enda bebelah bagi. Tang aku mega deka ngasaika pemerat tanggung pengawa laban bala pengari BN nya mayuh agi tubuh ari bala kami penyakal ti tau bendar ngunjungka jaku kami enda dikibuhka sida. Taja pan munyi nya aku deka terus ngulihka juluk ati manifesto kami nya. Ambi ke banding, juluk ati kami ti deka mai numbuhka Upis Komisyen Tanah ti deka nyadika pelasar nadai bebelah bagi ba pengawa ngatur sereta ngemanahka isu-isu tanah. Enti bisi private bill tau dikenataika bekaul enggau tuju tu, aku deka enggau naka ulih ngemata sereta beratika tu. Kedua, aku deka ngemataka pengawa pemansang dikereja nitihka udah disemaya ngelama tu. Ambi ke banding, sekayu jalai alun ti deka besabungka Ba’ Kelalan enggau Bario. Aku mansutka jaku tu mungkur sebarang isu ti nanggul mensia mayuh ngelama tu, nadai ngira sebengkah-sebengkah pupu raban bansa enggau pengarap”.