Tuai Parti Green Australia, Senator Bob Brown, udah manggil penyunting Sarawak Report ke nengeri Hobart, ngambika bisi bejakuka pasal penyalah makai suap di Sarawak, ba minggu tu tadi.
Senator nya nyadi ke pengari menua Tasmania, sebengkah menua ti endur kompeni bekaul enggau Taib Mahmud, Ta Ann, bisi dituduh ngulihka kayu kampung peneka ati sida.
Ba sebengkah aum enggau bala pemberita pagi tu, bala pemberita disadung salin-salin surat ti ditujuka ngagai Menetri Besai Australia, Julia Gillard, betanyaka pasal pengeraja sida Taib sebilik ti patut dibekuka di Australia enggau pansik atas penyalah makai suap.
Gillard deka meri saut lalu tu mih surat ti terubah diayanka ngagai mensia mayuh di Australia. Taja pan baka nya, perintah menua Swiss enggau Germany udah ngambi tindak ngagai peminta orang mayuh ke pansik ti patut dipejalaika atas pengeraja Taib sebilik enggau penyalah makai suap.
Penyunting Sarawak Report nerangka ngagai bala pemberita Australia nya diatu udah bisi mayuh bendar penerang pasal salah guna kuasa politik di menua Sarawak, ti endur Kepala Menteri benung ngena kuasa penuh iya ba nengeri nya mai bebilion-bilion ringgit pansut ngambika disimpan dalam akaun sida sebilik di menua luar.
Lebuh kompeni Ta Ann baru iya beduduk di menua Australia penanggul laban sida bedau dipeda lalu bedau bisi sebarang rekod. Tang diatu enggau semua macham penerang berekod ti udah bisi, Senator Brown ngansak perintah ngambi tindak ti patut atas kompeni Ta Ann.
Pengerusi Eksekutif ti mega pemegai share pemadu mayuh dalam Ta Ann, Hamed Sepawi, nya petunggal enggau Taib Mahmud, ti mega dipaduka ngemataka reta tengkira Taib. Kompeni Hamed nerima beribu-ribu hektar tanah kampung endur ngulihka kayu kampung enggau pemendar dikena muka kebun dandang besai, lalu pia mega nerima mayuh bendar kontrak nengah kompeni Naim Candera, iya nya sebengkah agi kompeni ti endur iya nyadi Chairman enggau pemegai share ti mayuh mega.
Semua kontrak enggau projek nya diberi Kepala Menteri, ngelaungka proses tender ti betul enggau patut.
Kompeni Ta Ann Tasmania, iya nya anak kompeni ti endur Hamed Sepawi megai 22% ari semua share, suah udah ngelarika diri ari sebarang bantah ba penanggul ti digaga sida ba pengawa ti ngulihka kayu kampung. Kompeni Ta Ann bepanggai bendar ba kayu kampung ti ditebang sida dikena sida ngaga sereta ngeluarka papan lapis.
Taja pan baka nya, Ta Ann Tasmania diatu patut meri penerang pasal penguntung ti dikena sida nudukka kilang di Australia nya ukai penguntung ulih ari penyalah makai suap ti pulai ke pengaya indu kompeni sida di Malaysia.