Taib Mahmud udah bebendar amat didinga nguji bebulaka penerang ti madahka anak indu iya Jamilah, ti udah nyadi peranak menua Kanada enggau sida sebilik ti bukai bejalaika pengawa dagang di menua Sarawak.
Tang diatu kami ulih mantaika penerang ti dalam pengelama beberapa puluh taun tu udah sida Taib sebilik nya udah nyual kayu kering ari rampa kampung Sarawak terus ke menua USA!
Sama bisi bekaul enggau pengawa dagang nya mega bala menyadi Taib empu, Onn Mahmud enggau Tufail Mahmud, enggau niang bini Taib, Laila Taib enggau anak lelaki Taib, Sulaiman.
Pengawa dagang nya udah dipejalaika nengah jarin kompeni-kompeni ti bisi bekaul enggau Bormill Wood (Terengganu) Sdn Bhd, ti ba ke terubah iya dipejalaika dalam taun-taun 70-an lebuh aya Taib (iya nya Abdul Rahman Ya’kup) agi nyadi Kepala Menteri Sarawak.
Jamilah nyadika siku pengarah enggau pemegai share dalam Bormill Wood, iya nya sebuah ari 83 buah kompeni ti ditemu kami, ti endur iya bisi share magang di menua Malaysia.
Bala pemegai share ti bukai iya nya bala kroni Taib, iya nya raban Hii sebilik, ti kala dikenang kami nyadika raban orang ti besedia meri duit suap ngagai Kepala Menteri nya.
Jamilah udah nyadi pengarah ba kompeni nya kenyau ari bulan Mei 1980, lebuh umur iya baru 19 taun lalu iya mega benung belajar di menua Kanada.
Taib udah bebendar amat meri jamin ke orang mayuh madahka Jamilah ngulihka belanja iya empu ari pengerajin iya empu ti mega lalu disukung laki iya, Sean (Hisham) Murray, ti kenu ku iya ti endang datai ari raban orang diri sebilik ti endang maju dalam pengawa dagang.
Tang Taib udah tepejal ngaku diri empu kala “meri duit puku” dikena ngemudahka Jamilah ngepunka pengawa dagang iya di Ottawa, lebuh iya agi belajar di menua nya.
Diatu Taib mega enda tau enda madahka baka ni Jamilah ti maya nya umur suba semina anak dara udah nemu bekaul dalam dagang kayu batang di Malaysia – sekali ke Taib mega bisi meri iya duit puku dagang ngagai anak iya nya?
Jarin pengangkut kayu batang ngena kapal
Gerempung kompeni Bormill enggi sida Taib sebilik nya mega chukup landik bejalaika pengawa ngangkut asil kayu batang ngena kapal di serata dunya.
Bala pengarah dalam Bormill Line Sdn Bhd nya bala menyadi iya, Onn Mahmud enggau Tufail Mahmud, enggau mega anak lelaki iya, Sulaiman.
Kompeni nya ditumbuhka dalam taun 1983 suba, nyerumba penumbuh gerempung kompeni-kompeni Sakto ti dipunka Onn Mahmud di Kanada sama enggau bala anak Taib ti benung besekula din, iya nya Jamilah enggau Abu Bekir.
Lebuh maya nya, sereta Taib nyadi Kepala Menteri Sarawak, Onn Mahmud udah dipaduka iya nyadi proksi dagang iya. Onn mega ditagaka ngatur pejalai kompeni Achipelago (ti mega ditumbuhka dalam taun 1983) ti endur Taib meri dagang nengali (monopoli) meri permit-permit ngagai kapal ekspot di Sarawak.
Dagang nengali nya udah meri penguntung manggai RM2 billion setaun ngagai sida sebilik.
Bala pemegai share dalam kompeni Bormill Line Sdn Bhd nya bala kroni ekspot ke Taib nyengkaum bala sida Lau enggau Ting sebilik ti dikaitka enggau kompeni Sanyan.
Kompeni tu, Bormill Line Sdn Bhd mega direjista di menua Singapura, ti ngena alamat ba Shenton Way.
Sama ngena alamat nya mega kompeni Bormill Line (Singapore) Pte Ltd, ti endur bala pemegai share nya sebengkah kompeni ti bemisteri, Premier Resource Holdings di British Virgin Islands.
Tang indu opis Bormill Sdn Bhd nya direjista atas Jalan Padungan, Kuching Sarawak. Sama direjista ba alamat nya mega iya nya sangking kompeni nya empu, iya nya kompeni Universal Shipping ti endur bala pemegai share nya nyengkaum dua iku menyadi Taib, Onn Mahmud enggau Tufail Mahmud.
Niang bini Taib mega bisi bekaul!
Siku agi pemegai share enda terus dalam Universal Shipping nya niang bini Taib, iya nya Laila Taib. Semua reta nya nyadika sebagi ari empayar dagang ti besai bendar ti dikemataka sebengkah agen ti benama ‘Hartanah Mendiang Lejla Taib’.
Share nya nyengkaum tebal agi share dalam kompeni CMS. Kami deka nemu nama kebuah Kepala Menteri nya mengkang enggai beterus terang madahka sapa ti nyadika waris saham niang bini iya nya?
Pekara ti narit ati mensia mayuh nya, bisi siku indu ti sebaka nama enggau nama niang indai Taib empu ti direjista nyadika pemegai share dalam kompeni nya, Hamidah Bt Haji Ya’kub. Tang lumur kad pengelala iya nunjukka iya nya siku peranak menua bukai.
Gerempung kompeni Bormill nya udah ditumbuhka dalam taun-taun 1970-an suba ngena nama sida Lau sebilik. Tang ba pun taun 1980-an, mayuh bagi ari share dalam kompeni nya udah diberika ngagai sida Taib sebilik.
Bormill Agencies Sdn Bhd, ambi ke chunto, udah ditumbuhka dalam taun 1981 (iya nya enam bulan udah Taib nyadi Kepala Menteri) dia kitai meratika Tufail Mahmud sekali agi dirintaika nama nyadika siku ari raban pemegai share dia.
Chura kaul dalam pengawa dagang baka tu ti ngujungka mayuh orang dagang besebana, ti endur sida madahka, enti deka terus mujur dalam dagang, sida patut besedia magi share kompeni sida ngagai Kepala Menteri nya.
Tang, sekali ke bala orang dagang tu udah ngepunka penanggul ba sida empu laban udah muka peluang ti korup ngagai Kepala Menteri sida ti baru megai perintah nya?
Ekspot-ekspot ke menua US
Bisi mayuh bendar rekod ti nunjukka ekspot-ekspot ti dipejalaika Bormill Wood enggi Jamilah nengah Port Klang di Malaysia ngagai kompeni-kompeni di menua USA. Asil kayu nya dikumbai ‘kayu kering begred manah’, ari sebansa kayu keruin ari kampung Borneo, ti ditagaka dijual nyadika papan lantai.
Bala pengimpot kayu nya nyengkaum Conwood Products Inc di Vancouver enggau Overseas Hardwood Co di menua Alabama. Kompeni Overseas Hardwood kala ngaga iklan sida ti madahka diri nyual “produk kayu ari Kuching” lalu bisi mega bakih dagang di Kuching, iya nya Quality Link Timber Enterprise.
Siku orang ti tau endur betanyaka penerang ba kompeni Overseas Hardwoods di Alabama nya benama Richard Murray. Enggau pemayuh bala sida menantu Taib nya sebilik ti bekereja dalam kompeni Jamilah, engka Richard Murray nya siku ari bala sida sebilik ti bekereja dalam empayar dagang Taib di menua tasik nya.
Ulih tauka enda Jamilah enggau sida Taib sebilik ti bukai nerangka ngagai kitai ni pemayuh kayu batang udah dijual sida nengah kompeni Bormill Wood enggau kompeni-kompeni sida ti bukai?
Taib ti nyadika Kepala Menteri nya patut ngembuan tanggungpengawa madahka ngagai kitai tu nama utai udah diambi iya ari menua iya empu. 