Nama kelai ti manah agi dikena mandingka penakut raban BN ti nunjukka sida deka alah ba bepilihbesai serak tu enggau chara meri lalu besemaya deka meri mayuh macham ‘projek’ baka ti suah didinga kitai ngelama tu?
Dalam taun 2008 suba BN ditemu bisi nyuap RM10 ngagai tiap iku pengundi sida. Tang ba minggu tu tadi kitai ninga berita ti madahka siku tauke kompeni kayu batang MP Tiong Thai King bisi udah bejalai ngusung bala pengundi iya di sitak Lanang lalu besadungka RM1,000 ngagai bala pengundi iya!
Enggau nya, diatu rakyat udah mupuk-mupuk ngelala nama pemeri ti ulih diberi bala orang politik lalu nama kebuah beguna bendar bala pengundi ti pintar patut angkat lalu ngelaban keduan raban BN.
Dalam pengelama beberapa taun tu Taib udah bepegai ba polisi iya ti ngasuh bala orang menua pesisir mengkang suntuk lalu ngemba sida enti sida mantaika serebana sida.
Tang penaluk ati sida ngagai BN nadai mai sebarang penguntung ngagai sida enti dibandingka enggau pengaya ti makin nambah ke sida Taib sebilik laban iya endang enda ngetu-ngetu bekerugaka kampung enggau tanah asal enggi rakyat iya empu.
Lebuh iya bejalai ngusung mayuh bengkah endur, iya nepan bilun buah engkabang, bilun jet Cessna enggau kerita Rolls Royce iya, lalu raban sida ti indu dalam ruang bilik iya bekenaka barang kemas entara ti pemadu mar di dunya, iya deka nentuka wang turu perintah enda tau chukup dikena mayar gaji bala tuai rumah.
Ngeleput laban gaji bala tuai rumah!
Tang udah bekau iya ninga semaya YB Baru Bian enggau PR ti madahka perintah baru ila deka ngangkatka pemanah atur gaji ke bala tuai rumah, Taib lalu ngasaika diri empu patut ngubah rentak lagu iya.
Diatu bala tuai rumah semina nerima gaji RM450 sebulan, iya nya setengah ari penyampau ti ditetapka ba gaji RM800 sebulan, iya nya kurang RM1,000 ari ikas gaji pemadu mimit di Semenanjung Malaysia (ti endur rega barang di menua nya jauh murah ari di Sabah enggau Sarawak).
Taib Mahmud seruran madahka anggur belanja (bajet) Perintah Sarawak enda kala chukup dikena mayar gaji 4,456 iku tuai rumah di sekayu menua Sarawak.
Tang raban penyakal ti ngaga kira-kira ngena formula sida empu dalam bup manifesto sida lalu besemaya deka mayar dua kali lipat penyampau RM900 sebulan (ti diseretaka enggau indeks napi pengusut belanja menua).
Baru Bian mega bisi mansutka semaya baru iya dikena mayar gaji bala tuai sembiang (pastor) mayuh bengkah atur pengarap Kristian ti seruran nguluka sembiang ke raban bansa sida. Tu mih siti pekara ti enda dipejalaika Taib Mahmud.
Ba pun iya bala orang BN udah ngemelika penemu raban PR lalu ngumbai PR nya semina naburka semaya puang aja, enggau chara madahka langgur PR nya deka ngemuntanka ekonomi Sarawak. Tang semina kemari, orang kuat PRS, James Masing udah diasuh mansutka jaku gerah ti madahka BN deka nikika gaji bala tuai rumah!
Enda sementas ati raban PR
Pemeri ti disemayaka James Masing nya jauh mimit ari ti udah disemayaka PR, tang nya endang udah nyadika dalih BN ti semina deka ngenyitka ati bala tuai rumah enggau penyampau gaji dalam timpuh ti pandak.
James Masing ngelanggur deka nikika gaji sida ngagai RM800, enggau nadai ngenang pasal indeks ti dikaitka enggau pengusut belanja menua ke dudi hari.
Tang sida ditagaka nerima penyampau gaji ti mimit dalam timpuh ti panjai nya, James Masing madahka gaji nya ditikika belabuh ari bulan Januari, reti nya sida tuai rumah nya deka nerima arias RM2,400 ba pakej ti ke terubah.
Sekali agi BN udah ngaga bala pengundi sida baka nembiak mit, lalu arapka sida nya deka gaga ati nerima RM2,400 duit penulu lalu sida tentu deka enda ingat ke RM6,000 ti deka diterima sida ari perintah ti baru dalam timpuh ti lama ila.
Taib mega kala besemaya deka nikika gaji sida rambau bepilihbesai 2008 nyin kemari tang lalu nyentukka sehari tu semaya nya enda dikamatka iya!
Sehari tu,ba Radio Free Sarawak siku pengari PR ari DUN sitak Saratok YB Ali Biju udah mansutka jaku ansak iya ngagai perintah nya patut nikika gaji bala tuai rumah, kala diketawaka raban YB BN ti endur sida madahka “perintah nadai chukup duit”.
Pemingking penemu tuai menua ti pemadu kaya di Malaysia
Bisi sebengkah penerang ti beguna amat ti enda ditemu bala tuai rumah ba pementas Taib rambau bepilihbesai tu.
Ke tebal agi gaji sida tuai rumah nya naka ke diatu nya dibayar Perintah Besai lalu ukai ari Taib.
Beduduk ba jaku ti udah dipesetujuka, Perintah Besai deka mayar setengah ari gaji semua tuai rumah, lalu Perintah Sarawak mega deka mayar setengah.
Naka ke diatu Perintah Besai aja ti udah ngamatka sempekat enggau
tanggungpengawa enggau mayar RM400 ari penyampau nya ngagai tiap iku tuai rumah ti patut nerima.
Tang Raja Pala Burak Sarawak nya semina udah sanggup nambahka RM50 ngagai RM400 ti ari perintah besai ke gaji siku tuai rumah! Kini penunga RM350? Ditanka Taib?
Ingat, iya seruran pechaya, enti rakyat ditejuka suntuk belama, sida deka beterima kasih ke pemeri ti mimit.
Tu mai reti ti madahka James Masing enda tau enda setuju nikika ungkup ari perintah Sarawak RM350 ngambika nyadi penyampau ti chukup baka ti patut lama udah dikamatka iya.
Penerang tu nyadika saut nama kebuah gaji bala tuai rumah di menua Sarawak jauh mimit ari gaji tuai kampung di Semenanjung Malaysia!
Enti nitihka pematut iya, bala tuai rumah nya ukai semina nerima arias ti ditarit ngagai bulan Januari, tang sida mega patut minta ngena undang-undang gaji penuh sida patut dibayar kenyau ari beberap puluh taun tu!
BN dijangka deka beduan lalu bemain-main enggau duit gaji bala tuai rumah ti lama udah ditanka sida dikena sida bejalaika kimpin bepilihbesai sida.
Tang Sarawak Report deka meri buah penemu ngagai bala tuai rumah tu awakka badu agi arapka BN lalu sida patut meri peluang ngagai raban lawyer ti landik ba undang-undang tanah NCR ti nyadika tuai PR ngamatka semaya sida ngagai bala rakyat.