Kaul entara menua UK enggau Malaysia patut manah lalu nadai dibalut mayuh macham leman pekara ti enda menuku.
Tang ba penemuai Menteri Besai Malaysia Najib Razak ke menua UK ba minggu tu, sebengkah atur pengawa nyambut iya ti diatur David Cameron patut dikena dua iku pemesai nya ngemanahka kaul dua menua lalu ukai dikena seduai ngiga peluang ngulihka penguntung ke seduai empu.
Tambah mega, Najib diatu benung ngarika perintah minoriti ti enda ulih dikarapka, ti endur tiap iku orang nemu pemenang perintah iya ba bepilihbesai tu dikereja enggau chara ngelakar lalu mar bendar dipelalaika.
Rakyat Britain empu patut nyukung rakyat Malaysia dalam pengangkat sida ngulihka atur demokrasi ti tulin, 50 taun udah bepilihbesai ti ke terubah, lalu ukai ngulihka pengawa dagang begulai enggau rejim ti udu korup.
Cameron patut muka mata enggau pending diri empu ngagai pengawa nipu maya bepilihbesai Malaysia tu tadi tauka nelentangka tapa jari iya ngulihka duit dagang ti kamah ari BN, ti dichuri ari rakyat sida empu.
Sepatut iya, seraya ti napi jaku kutuk ba penyalah korup BN di Malaysia empu nyengkaum pengawa begelumu bebala mayuh, Najib deka ngumbai penemuai iya ke UK nya sebengkah sambut ti ngembuan tuju dikena ngemanahka nama iya empu.
Tang perintah UK tentu enggai besaum penemu enggau orang Malaysia enti tuju sida nya dikena empelas mua diri. Lalu enti tuju sida nya baka nya, pengawa sida tentu deka ngeruga integriti sida, sebaka enggau dalam skandal sempekat meli senyata bekaul enggau Tekat Ai Pergau ti udah kala ngeruga Margaret Thatcher dulu suba.
Bejaga-jaga ari pemansut duit kamah ari menua Malaysia
‘Peluang’ Malaysia diatu dipeda nyadika sebengkah pemerat ke sekeda raban orang ti besai-besai dalam kaul parti-parti politik kenyau ari hari terubah sida megai perintah.
Enggau penerang-penerang ti suah dipansutka Komisyener bekaul enggau peluang pengawa dagang enggau pengandal ati sida ke penemuai pengawa perintah nyengkaum penemuai pasang di-raja Will enggau Kate ke menua Sabah taun nyin kemari.
Tang, baka ti diterangka siku tuai parti penyakal ngagai Sarawak Report, “lebuh nuan nguji berandau ngenang pasal pekara ti ngelanggar kuasa pengelantang enggau pengelikun mensia di Malaysia, jaku saut ari tuai-tuai perintah UK semina ngenang langgur sida ti deka muka kedai Tesco ti baru di nengeri KL”.
Tweet
BN udah didinga inggar bendar ketegal pengusut kredibiliti sida ba bepilihbesai bulan Lima tu tadi, tang penginggar jaku ringat sida nya udah tengelam laban pemerat sida ngagai pengawa dagang sida ke Malaysia.
Ba komen-komen dalam laman Twitter enggi Komisyener UK Simon Featherstone ba minggu nyin kemari, iya bisi ditemu berumban-baban ke nengeri London laban ti deka nyambut penatai Najib.
Menteri dalam Opis Menua Luar, Hugo Swire mega nadai ngenang pengangkat bantah demokrasi di menua Malaysia.
Swire engka nya bisi ngembuan “tinjau ti manah” pasal ubah, penampak enggau pengelepas, tang iya “nyukung penuh” pemansang Stesyen Kuasa Elektrik Battersea ti benung dipejalaika kompeni Sime Darby ti enggi perintah Malaysia.
Sime Darby nya nyadika sebengkah kompeni pengeluar minyak sawit pemadu besai di dunya, terima kasih ke pengawa sida mai pengerusak rampa kampung Borneo di Sarawak enggau Indonesia enggau mega pengerusak rampa kampung di Sumatra.
Kompeni Sime Darby nyadika suspek ti nyata ti ngasilka sebun asap ti ngebab kandang menua nya dalam beberapa hari, ari ketegal pengawa sida meresi kampung lalu nunu reban dikena muka kebun dandang besai sawit ba rampa kampung pemadu tuai di dunya.
Penanggul sebun asap tu udah nuntung rakyat Malaysia, tebal agi sida nya ti udah ngayanka ati sida ti enda puas ngagai sebengkah perintah maya bepilihbesai bulan Lima tu tadi.
Sida mega ngutuk sereta ngayanka bantah sida ngagai Perintah Raja UK.
Lalu nyerumba perintah Britain ti chakah ngatur dagang ke kompeni BAE Systems enggau menua Malaysia, iya mega mai penanggul ngagai Perintah Raja ti endur BN ngembuan rekod ti jai lalu sida semina deka tembu enggau pengawa ngulihka duit suap ti mayuh ke bala orang politik – baka dalam kes skandal meli kapal selam Scorpene ari menua Peranchis ti mengkang dipejalaika datai ke sehari tu.
Dagang reta Malaysia di London
Diatu udah datai ba maya iya bala menteri UK bejuraika polisi menua sida lebuh ti nerima pemasuk duit BN ti enda temu penatai nya ke dalam pengawa dagang reta UK nya.
Endang amat, duit nya endang ari menua Malaysia, tang diperanakka bala orang siku-siku ti udah mai pansut duit nya enggau chara korup ari wang turu menua ti dataai ari kuchik rakyat sida. Bala pemesai Malaysia ti benung dibalut skandal ba ‘pemansut duit kamah’ nya udah dikelala.
Bala pemesai di London patut berasai malu laban duit kamah ari menua Malaysia nya diperanakka di menua UK lalu ukai di Malaysia empu, ti endur duit nya patut dikena ngaga perengka penyaga pengerai, sekula ke rakyat ti udah kena keduan BN.
Nyerumba bala orang politik UK ti kaya ti udah bulih untung bejualka reta ba rega ti tinggi-tinggi ngagai orang Bumiputera ti tambap ari Malaysia, empas pengawa nya dipeda deka muru peranak Britain pansut ari nengeri sida empu.
Enggau nya, penemuai Najib ngagai pengawa ‘nasih tanah’ ke Battersea minggu dudi tu ila, mayuh orang Malaysia enggau Britain deka nemu berapa pemayuh untung deka ulih sida ari kaul Cameron/Najib nya?
Udah tentu pekara tu deka direkod.