Bedau lama tu udah menua Sarawak baru baik ari penanggul kuasa elektrik dalam pengelama bejam-jam, sebengkah penanggul ti nuntung pengidup mensia mayuh.
Kepala kompeni SEB Torstein Dale Sjotveit diatu bisi didinga minta ampun, ngaku penanggul ba kuasa elektrik nya bepun ari pengerusak teknikal ba tekat ai Bakun ti baru, ti disadang ulih nyukung sebengkah program pemansang ti chakah.
Beduduk ari iya ti enda mereti ke penanggul nya, iya dipeda enda ulih ngulihka pengarap sebarang orang bekaul enggau projek tekat hidro ti besai-besai ti deka mayuh agi digaga ba rampa kampung di menua Sarawak, lalu ngumbai program nya ditaga dikena ngemansangka Sarawak nyadi menua pengeluar barang.
Bayar pulai utang RM30 billion nya!
Tang tu ukai siti chunto Torstein udah nejuka Sarawak dalam pemetang ketegal penanggul ba kuasa elektrik nya. Baka ni utang RM30 billion ti udah diinjau sebengkah kompeni awam nya kenyau ari taun 2011 suba?
Tu sebengkah utang ti besai bendar lalu bekelas dunya. Lalu nama penemu kitai mayuh ba pekara tu? Sarawak Energy Berhad lalu bedau ngeluarka Repot Taun sida kenyau ari taun 2010 lalu kitai diatu benung ba tengan taun 2013.
Pejalai kompeni SEB nya dipelanja ngena duit mensia mayuh enggau duit bayar ti digumpul ninting bulan ari bala penguna kuasa elektrik di menua Sarawak lalu nyata bendar sida tu mih ti nyadika jamin utang SEB nya. Nama kebuah Torstein enggau Taib lalu bedau meri sebarang penerang pasal pekara belanja kompeni nya ngagai bala rakyat enggau bala penguna kuasa elektrik di Sarawak dalam pengelama dua taun tu?
Torstein udah nunjukka SEB nya bedau mayar pulai utang nya, taja pan penyampau utang nya bisi ayan dalam rekod opis pengerejista kompeni-kompeni.
Utang ba lumur 18 enggau 19 nya ngundan dua iti tanggam bon Sukuk Islam bepenyampau RM15 billion siti-siti, dikemataka kompeni TMF Group/Equity Trust. Sida tu ngarapka utang nya ulih tembu bayar ba bulan Enam 2011 tang diatu lalu bedau ngemuaska ati.
Pengari ari parti DAP, Chong Chieng Jen udah dikeleseka Torstein lebuh iya nguji mangkit pekara tu taun nyin kemari, ti madahka “laluh utang kompeni ari program nya semina RM740 juta ba maya nya. Kelimpah ari nya SEB nadai utang bukai ti besai”.
Tang Torstein mega bisi nyebut “sebuah kompeni awam pemadu besai ti bisi kaul terus enggau perintah Sarawak, kami endang ngaku semua pengawa SEB bisi penguntung ke mensia mayuh”. Nya endang amat, lalu kami pan besetuju enggau penerang nya.
Nama utai ti bendar nya nyadi? Sarawak Report udah mujur bulih surat-surat penerang ti nunjukka enggau silik bekaul enggau pejalai pekara belanja nya ti diatur kompeni TMF Group.
TMF Group nya sebengkah kompeni pengibun reta ti jampat bendar mansang, ukai semina ketegal diasuh ngatur transaksyen ti besai-besai di Malaysia ngarika Taib enggau program ‘pemansang’ 1MDB Najib Razak.
TMF Group ngerembai ari Equity Trust di menua British Virgin Islands (BVI), sebengkah kompeni ti landik ngemataka reta di menua tasik. Seninjik bendar kompeni-kompeni enggi sida Taib sebilik baka Ridgeford Properties enggau CMS (BVI) nya endang nyadika pelanggan Equity Trust baka ti kala direpot kami dulu ari tu.
Udah datai ba maya endur kitai ngayanka pekara ti bisi kaul
Torstein udah didinga meri penerang ti nyelai-nyelai pasal penyampau utang SEB nya, lalu udah tentu bala pemayar chukai enggau penguna sida nya ti nyadika jamin utang sida.
Dini endur duit injau SEB nya disimpan?
Kini penunga kempen SEB ti deka meri bekal kuasa elektrik hidro ngagai orang ti seranta di menua pesisir, ti udah nganti 40 taun semaya nya dikamatka ba sida?
Torstein udah meri kontrak masang tali kabel bekuasa tinggi ngagai kompeni anak bos iya, Abu Bekir, Sarawak Cable, ukai ngena chara tender tebuka.
Jaku-jaku tanya ti munyi tu enggau mayuh agi komisyen ti dipelalaika, ti udu nguntungka Kepala Menteri nya, udah nyungkak mayuh jaku tanya ti patut disaut Torstein.
SEB engka lama udah ditingkilka ari pasaran saham udah bekau kompeni nya dibeli Kepala Menteri dalam taun 2009 (iya udah ngena duit awam dikena meli syer-syer SEB ba rega ti diinflasika nyentuk ngagai 24% tinggi agi ari rega ti penudi).
Tang, SEB agi bisi tanggungpengawa ngeluarka repot-repot pekara belanja taun sida ti ulih dikena sida nyaut semua leman jaku tanya ti dibangkitka bala pengari rakyat enggau tukang audit persekutuan.
Bejaku chebur-chebur tang enda tampak
SEB nya sebengkah kompeni awam pemadu besai di Sarawak ti betanggungpengawa ngatur projek ngeluarka kuasa elektrik hidro, ti kenu ku sida nya deka ngubah menua Malaysia jemah ila. Enggau nya, nama kebuah Torstein suah melakangka bala orang ti mayar ke belanja projek ngambika ulih endur sida meratika semua macham repot enggau langgur pengawa SEB?
Agi mega Torstein udah nunjukka iya nya siku orang ti ngemesaika diri. Iya udah balat didinga mantah jaku tuduh bala orang ti mantah atur pengawa iya ti belalai baka ti bisi ditemu dalam ruang komen laman web tu.
Iya mega bisi numbuhka mayuh bengkah laman web, dikena iya madahka dunya pasal langgur pengawa iya ‘ngubah Sarawak nyadi sebuah menua ti manah agi’ lalu mega dikena iya madahka dunya nya raban bansa Dayak nya raban orang ti manah nasit laban bisi iya ti dipaduka mai ‘pemansang’ ngagai pengidup sida.
Torstein mega bisi ditemu numbuhka laman Twitter dikena iya nyakal jaku bantah orang, ti endur iya ngumbai gerempung NGO baka sida Bruno Manser Fund benung nerima duit bantu ke guna sida empu ngena chara ti enda betul!
Tang, SEB ti betuaika Torstein lalu mengkang enda ulih ngeluarka Repot Taun enggau Repot Pekara belanja sida.
Promosyen-promosyen Torstein dalam media baru nya balat agi dikena iya meresi nama diri.
Kami minta Encik Torstein Dale Sjotveit nerangka enggau pengabis silik nama langgur pengawa SEB ngena duit jali RM30 billion nya, dini endur duit nya diatu lalu berapa penyampau duit jali nya udah dipelanja?