Taib Mahmud sekali agi bisi ditemu numbuhka sebuah kompeni dagang di menua Sarawak, taja pan iya kala udah didinga bebula berita ari mensia mayuh ti madahka iya bisi ngereja pengawa dagang, lalu nambah ke nya kompeni nya diberi nama ngangkatka pangkat iya empu.
Nama kompeni Pehin Sri Heritage Sdn Bhd bisi disebut dalam rintai nama 49 buah kompeni Malaysia ti udah ditatepka dalam kot ulih menantu indu iya Shahnaz Binti Abdul Majid, ti minta sarak chara mutaah orang Islam ari laki iya, Mahmud Abu bekir bin Taib.
Ari ke semua kompeni ti direkodka nya (enda nyengkaum akaun bank enggau reta di menua tasik ti lama udah ditugungka sida Taib sebilik) bala jurukira ulih nunjukka anak lelaki Kepala Menteri nya berega lebih satu billion ringgit enti dipulaika ngagai rega reta tengkira kompeni, ti ulih ngasilka upah iya ba pemayuh RM2 juta setaun.
Mayuh agi kompeni sida Taib sebilik nya bejalaika pengawa dagang sida dalam menua Sarawak, ti endur sida nya bulih pemanah enggau penguntung ari kontrak-kontrak, pala-pala tanah enggau pengawa-pengawa dagang nengali ti diterima sida ari apai Abu Bekir, iya nya Kepala Menteri Sarawak nya.
Enggau nya terang bendar Kepala Menteri nya udah mansutka pemula iya lebuh ti ditanya pengarang berita ba mua kamera ti endur iya madahka sida sebilik ‘nadai bedagang dalam menua Sarawak’!
“aku enggau kami sebilik nadai udah beambika sebarang utai ari menua tu … bala anak aku besekula tinggi-tinggi magang … sida bedagang di menua tasik din, aku pan bedagang di menua tasik din kenyau ari 30 taun tu udah – kebuah nya mudah aja, aku enggaika danjang tanggungpengawa aku tu ngeruga runding aku belama-lama. Enti aku bedagang di menua tu, mensia mayuh tentu deka nuduh aku salah guna enggau kuasa aku, nya alai kami menyanak bedagang di menua tasik din, tang di menua tasik din, enti nuan bisi pengelandik enggau bebekalka puku mimit pan nuan tau mega mujur” [Abdul Taib Mahmud 2011]
Pehin Sri Heritage Sdn Bhd
Tang, nama reti syer kompeni sida Taib sebilik tu, ti 55% ari syer nya diengkahka di baruh nama Kepala Menteri nya empu?
Sekali ke PSHSB nya tau digambarka nyadika sebengkah perengka dikena ngelamun sekeda pengeraja Kepala Menteri nya, enggau chara ngasuh orang mayuh ngumbai iya nya rinduka gela iya nya? Enti nya amat, mensia mayuh bedau meda asil nya.
Kompeni nya direjista ba siti alamat laban iya nunjukka baka ni Kepala Menteri nya tau dikaitka enggau pengawa dagang iya ti diarika bala sida sebilik ti bukai.
Pehin Sri Heritage bekunsika siti alamat ti sama enggau kompeni sida sebilik ti bukai, Premier Cottage Sdn Bhd, ti udah mujur bulih projek ngemansangka tanah pemadu besai rampa di Sarawak.
Premier Cottage nya nyadi pemegai syer pemadu mayuh dalam sebuah pengawa dagang kunsi ngemansangka sebengkah rampa menua ba pemesai 10.5 ekar ti tinggi rega ba Isthmus Kuching ti endur sida deka ngaga sebuah palan hotel. Dagang kunsi nya dikumbaiIsthmus Development Sdn Bhd, lalu direjista ngena alamat ti sama.
Ketiga-tiga buah kompeni, Pehin Sri Heritage, Premier Cottage enggau Isthmus Development nya udah direjista ba Lot 201, jalan Blacksmith, Kuching, Sarawak.
Pengawa ngerampas tanah ba pelilih nengeri besai
Lalu, baka ni ku cherita di belakang Premier Cottage enggau Isthmus Development lalu baka ni kompeni-kompeni nya tau dikaitka enggau kompeni enggi sida Abdul Taib Mahmud sebilik?
Peluang ke sida Abdul Taib Mahmud sebilik tu udah dipenyadi lebuh perintah Sarawak udah ngambi tanah di pelilih kandang nengeri enggau chara pejal, lalu magi semua rampa tanah ba kandang Isthmus Kuching nya.
Kandang menua nya udah dilanggur ngambika dikemansangka, lalu dipelanja ngena wang turu (ari chukai mensia mayuh) ti dikemataka perintah.
Bala orang di menua nya udah mai kes tu ngagai kot laban beserebanaka sida dibayar pampas ti mimit, ti udah ditukar nyadi tanah nengeri lalu digaga nyadi syer ti dipegai kompeni sida Taib sebilik, Cahya Mata Sarawak Berhad (CMSB).
Kompeni CMS Property Development S/B diatu nguasa 51% ari tanah nya lalu opis SEDC megai laluh 49% beduduk ba dagang kunsi enggau nama CMS Land S/B.
Sekali ke sebarang bayar udah disua ngaga perintah menua ke rega tanah di endur nya ti diambi CMSB, lalu bedau ulih ditentuka penyampau, tang baka ti selama tu, ngena penuduk iya nya, kompeni sida sebilik nya mega bulih belanja ari SEDC dikena ngemansangka tanah dia.
Ari ti nyadika orang ti meri pemutus penemu sereta ngena kuasa iya ti nyadi Kepala Menteri, Menteri Perambu Pengawa enggau Pengeraja Asil Tanah enggau Menteri Pekara Belanja, Taib Mahmud udah ngatur semua pekara ti tau mai penguntung ngagai kompeni sida sebilik.
Nyadi lantang agi diau
Premier Cottage ti dikuasa Hanifah, iya nya anak indu Taib Mahmud; adi ipar iya, Gertie Chong (balu Ariff Mahmud) enggau menantu iya, Hisham (Sean) Murray (iya nya laki Jamilah Taib).
Pemegai syer nya sebengkah kompeni ari menua tasik ti benama Pioneer City Enterprise Limited. Kami belabaka kompeni resia nya mega diempu sereta dikuasa tiga iku pengarah nya tadi, abis enda pan, Taib Mahmud empu.
Bisi jaku gerah ti nunjukka CMS Land S/B udah ngelanggur deka nyukung projek ngaga hotel ti beungkus RM380 juta enggau chara bekunsi dagang ti diberi nama Isthmus Development S/B (IDSB), ti endur Premier Cottage megai 54% ari semua syer dia.
Pemutus penemu mungkur CMS Land ti meri IDSB tanah ba pemesai 10.5 ekar nyadika untung dagang 3% ari syer ba projek nya. Pengawa tu ngujungka Premier Cottage nyadika penikam tender ti mujur lalu CMS nyadika penikam tender ti enda mujur taja pan CMS nya megai syer ti mayuh agi, lalu mega SEDC.
Endang enda masuk akal lebuh CMS nguji meri kebuah ti madahka pengawa besiping bisi dikereja ba pengawa meri tanah ba pemesai 10.5 ekar nya ngagai Hanifah Taib, ti nyadika pemegai syer pemadu mayuh lalu mega bini siku ari pengarah sida, Ahmad Alwee Asree. Tang dalam surat-surat ofisyel sida, bala pengarah ti bisi kaul terus dalam dagang nya udah pansut ari bilik aum lebuh pemutus runding nya dikenataika!
Kitai ninggalka bala pemegai syer ti mit-mit ti bukai dalam kompeni ti dikuasa sida Taib sebilik, laban Kaban Pengarah dalam CMS, baka Kepala Eksekutif sida, Richard Curtis tentu nemu sapa ti mayar gaji bulan sida. Kompeni pemadu besai di Sarawak nya udah nyadika sapi tusu ke sida Taib sebilik ti amu nya.
Mantah laban kenu ku sida, enda besalah
Nyerumba sida ti ngulihka untung lalu ngena penuduk Taib, manah agi enti kitai ngingatka baka ni Taib enggau menantu iya udah kala didinga mansutka jaku bantah ti madahka sida sebilik nadai ngereja sebarang pengawa dagang di menua Sarawak.
Enggau gaya ti ringat Murray udah ngerekodka jaku bebula dawa ti madahka iya kala mantu kompeni mentua iya nugungka pengeraja nengah pengawa ti balat besiping di menua Sarawak.
Enggau penerang ti tebantai nya mensia mayuh diatu majak nemu sida sebilik nya udah bula enggau naka iya.
Raja apek bayat
Lalu enggau penerang ti madahka kompeni Pehin Sri Heritage Sdn Bhd nya udah direjista ngena alamat opis ti sebaka enggau Premier Cottage enggau Isthmus Development, mensia mayuh tau ngamatka kaul ti bechura penyalah makai suap entara Kepala Menteri Sarawak enggai sida sebilik, ti udah bulih penguntung ari projek enggau kontrak perintah beduduk ba belanja menua ti datai ari mensia mayuh di Sarawak.
Bala pemacha blog tu engka deka macha baru artikel kami ti dulu ari tub a topic ‘Sean Murray’s Kuching Construction Connection’.