Sekali agi wang turu orang penchen Norway untuk meresa baru semua dagang di menua Sarawak lalu ngeluarka dua buah kompeni ari rintai nama kompeni enggau bedagang, iya nya dua buah kompeni ti bisi bekaul enggau Kepala Menteri Sarawak Abdul Taib Mahmud.
Udah bekau wang turu nya muai kompeni Samling Global laban ditemu ngerusak kampung enggau enda beradat 2010 suba, ‘Wang Turu Asil Minyak’, ti nyadikan institusyen beranakka puku dagang pemadu besai di dunya nya, udah ngeluarka repot ti nunjukka nama kebuah sida mega muai kompeni Ta Ann Holdings Berhad, enggau WTK Holdings Berhad.
Kompeni Ta Ann nya dipejalaika petunggal Taib Mahmud, iya nya Abdul Hamed Bin Sepawi, lalu kompeni WTK nya kompeni ti udah ngenataika penanggul reba anyut ba pemanjai 30 batu di semanjai Batang Rajang dalam taun 2010 suba.
Pemutus muai nama dua buah kompeni nya ari rintai kompeni ti enggau sida bedagang nya ukai pengawa ti muntang. Komiti Pemanah Atur Norway udah bejalaika pansik enggau peresa dalam pengelama lebih setaun lalu sida udah mujur ngeluarka dua iti repot dikena sida mantah pengawa ngerusak rampa menua ti dikereja dua buah kompeni nya.
Wang Turu Asil Minyak nya udah muai Ta Ann ketegal ikas pengerusak ke rampa menua ti dikereja sida ba menua-menua pesisir di Sarawak lalu mega ketegal kompeni nya udah ngelanggar atur EIA ba pengawa ngulihka kayu batang.
Uji klik ditu ba dikena beratika repot pasal Ta Ann
Baka nya mega, repot pasal WTK bisi ngeluarkan penerang pasal pengawa ngerusak rampa menua ti dikereja sida ba puak kampung di menua Sarawak ti udah ngujungka pengerusak ngagai menua enggau batang-batang sungai.
Dua iti repot nya terang bendar ngayanka baka ni kompeni ti bekaul enggau sida Taib Mahmud sebilik nya udah ngelanggar undang-undang ba pengawa ngulihka kayu batang. Tambah mega, mayuh raban sida Taib Mahmud sebilik nya endang bisi syer ti mayuh ba dua iti kompeni nya.
Uji klik ditu ba dikena beratika repot pasal WTK
Atur ofisyel enggau silik menua Norway dikena muai Ta Ann enggau WTK nya udah ngujungka CEO Sarawak Energy Berhad bebansa Norway, Torstein Dale Sjotveit nya tau bendar berasai malu sereta rawan.
Sjotveit udah bebendar amat ngelindung polisi-polisi ‘pemansang’ Taib Mahmud. Tang bos iya, iya nya Pengerusi SEB, Abdul Hamed Sepawi, mega nyadika Pengerusi enggau pemegai syer pemadu mayuh dalam Ta Ann.
Nyerumba Sjotveit ngampuhka rampa menua enggau pendiau raban bansa penan enggau Kenyah enggau chara ngisi tekat Murum, iya tentu begigaka saut sekali ke menua iya empu , Norway, ti ngembuan stindit pemanah atur ti tinggi deka bejalaika atur dikena ngelaban iya di menua Sarawak?
Agi mega, Torstein ti nyadi CEO dalam SEB begaji bulan pemadu besai nya ukai semina udah ngelanggar adat bansa asal enggau mega atur ngemansangka kuasa hidro, tang iya mega udah nejuka penyalah makai suap dikereja enggau terang bendar dalam opis iya enggau chara meri kontrak-kontrak besai-besai ngaga tekat ngagai kompeni-kompeni enggi sida Taib Mahmud.
Sebengkah peresa enggau pansik ti dipejalaika raban NGO ari menua Switzerland, Bruno manser Fund, ba atas Torstein, sida madahka peranak Norway nya endang bisi kaul enggau penyalah makai suap.
Menua Norway endang bisi undang-undang ti terit dikena ngambi sebarang tindak atas peranak menua sida ti ngereja penyalah makai suap di luar menua sida, lalu lebuh maya Torstein merak raban polis ketegal enda kasar enggau bansa Penan ti kih di Murum (ti enda bepuas ati ke atur pampas) iya disadang ngarapka perati dunya enda ditujuka ngagai iya enggau menua Sarawak.
Orang bukai ti sama berasai malu ketegal penetap runding menua Norway iya nya bala bakih politik menua Tasmania, ti udah enda ibuh ke rekod jai ngerusak rampa menua ti dikereja Hamed Sepawi di Sarawak; penyalah makai suap serata dunya enggau penerang-penerang ti madahka iya nyadika orang kanan ke Taib Mahmud ti rangka nya.
Baka nya mega sekeda gerempung rampa menua di menua nya ti enda ibuh krekod jai Hamed Sepawi di Sarawak, lebuh sida berunding deka ngemendarka iya bedagang di Tasmania ngena bantu ari anak kompeni Ta Ann, ti udah kala ditemu bula pasal asil kayu ‘manah’ ke rampa menua sida.
Sekeda piak ti bekuasa di Tasmania udah bejalaika pengawa dagang sida enggau Hamed Seapwi, udah ngemendarka kompeni menua sida empu, Hydro-Tasmania, ngaga kaul dagang ba pengawa ngaga tekat ti besai-besai ke Taib Mahmud nyadika sebengkah atur pengawa ngapuska pengawa nebang kampung enggau betanamka sawit.
Hamed Sepawi nya siku Pengerusi dalam SEB, ti udah nginjau duit bebilion-bilion ringgit ngena nama rakyat Sarawak dikena ngaga tekat ti besai-besai nya.
Lalu, baka ti dikena ngemendarka sebarang tindak ti enda patut-patut, dikena meri penguntung ke sekeda orang di Tasmania, Menteri Besai nya empu baru udah pulai nemuai ke Jepun, udah bebendar amat meransang orang di Jepun meli asil kayu sida, ti udah mulauka asil kayu Ta Ann nya, lalu meri ketegal ti nyau deka sebaka enggau Norway.
Kompeni-kompeni besai kayu batang ti dikaitka enggau Taib nya udah suah bendar ngena atur dagang ti sama sereta muntang iya nya meli penaluk ati bala orang politik dikena iya ngulikhka pemendar tama lalu ngeruga kampung ba sesebengkah menua, sekali ke di Sarawak, Afrika, tauka di Australia.
Tang, menua Tasmania nya udah ditemu nyadika siti menua ti mudah bendar dipasuk udah bekau Hamed Sepawi, dalam taun 2008, nirika kilang kayu ba dua iti menua ngena sabsidi ari perintah menua nya – siti ba menua enggi Menteri Besai ti dulu, Paul Lennon, lalu siti ba menua enggi Menteri Kuasa ti diatu mangku pengawa nyadi Menteri Besai, Bryan Green.
Pugu pengari ari Ta Ann ari menua Tasmania, Paul Harris, ti udah diansak ngaku penemuai iya ke Sarawak endang dipelanja kompeni Ta Ann nya (ti endur semua pengawa iya nya endang ngiga penerang pasal Sarawak).
Beserimbai enggau menua Norway ti udah muai Ta Ann ngena dalih ti patut nya, Tasmania mengkang nejuka kampung bungas isda majak dikeruga Ta Ann ngena belanja perintah sida empu!
Lalu empas ari atur nya, dia bala orang politik enggau pengawa nagang bala orang ti rindu ke rampa menua ti, kenu ku sida, balat ngachau Sempekat Kampung, udah nunjukka sekeda pengawa ti lama dalam pengawa ngeluarka kayu ramu semina ditemu sekeda sida ti inggar bendar bejurai lalu ngarika Ta Ann.
Rakyat Sarawak bisi kuasa ngulihka sukung ari Tasmania ba pengawa sida nyelamatka kampung sida, ukai ngelindung-ngayung sebuah kompeni ti udah disebutka Norway nyadi kompeni ti patut enggau beranakka puku dagang.