Bini Menteri Besai Malaysia, Rosmah Mansor, bisi ditemu meransang semua nembiak sekula di Malaysia patut diasuh meda wayang ti dikeluluka Leonardo di Caprio, Wolf of Wall Street, nyadika tangkan ngagai sida pasal pengerangka enggau pengawa bukai ti enda manah.
Sekeda orang tentu deka betanya baka ni iya tau nuduhka penemu iya ti endur sebengkah wayang ti kamah ti ngembuan mayuh gambar seks enggau pengawa kasar, nyengkaum gambar orang nguna dadah nya?
Bala orang ti ngaga wayang udah ngemendarka Martin Scorcese ngaga sebuah wayang sekamah-kamah ti ulih digaga nitihka peneka iya, lalu udah nya ngujungka menua Amerika udah nagang wayang nya dipeda orang ti ari atas 17 taun semadi sida bisi disempulang orang ti tuai agi umur ti meruan.
Ungkus ngaga wayang nya mega nyadika jaku tanya sekeda orang.
Ba sekeda sekula di menua Sarawak bala nembiak tinduk bekempit-kempit enggau pangan diri beperabungka atap tuduh laban penyuntuk perintah ti enda ulih nyeruri rumah endur nembiak bemalam.
Tang pengawa ti mandangka wayang ti baru nya udah nguna belanja ti kelalu besai ti diberika ngaga sebengkah kompeni pengeluar wayang ari menua Malaysia tu empu.
Engka bini Menteri Besai ti bekuasa nya deka nentuka kompeni pengeluar wayang nya endang enggi orang Malaysia empu, ngambika duit belanja wang turu menua tau dikena nyukung pengawa nya.
Utai ti berupai agi nya, kompeni pengeluar wayang The Wolf of Wall Street, iya nya kompeni Red Granite Pictures, nya betuaika anak lelaki iya empu, Riza Aziz (tauka Riza Shahriz Bin Abdul Aziz), sebengkah penerang ti enda ditemu bala orang mayuh di menua Malaysia.
Red Granite Pictures ditumbuhka Riza Aziz dalam taun 2010 lalu udah bulih untung nengah wayang ti tebilang baka ‘Friends With Kids’ enggau ‘Dumb and Dumber 2’, enggau mega The Wolf of Wall Street, ti udah dibuai ari studio-studio tebilang.
Pengawa ti muai The Wolf of Wall Street nya, laban isi wayang nya balat meri malu ngagai bala orang ti meda lebuh bejadi wayang nya, munyi ti ditusui sekeda suratberita pengawa pemerindang.
Baka ni pemudah Riza Aziz nya tau nyadi orang ti melanja mayuh wayang di Hollywood udah ditemu kebuah iya. Sekali ke pengawa melanja wayang nya bisi kaul enggau penuduk sida sebilik enggau bala pangan dagang Riza empu?
Anak tiri Menteri Besai Najib Razak, Riza Aziz, nya endang bakih Jho Low ti rindu ngelantangka ati bepenapat, nya siku nembiak anak orang dagang ari Pulau Pinang ti udah tembu belajar ari UK enggau US, nyadika pengulu ba sekeda pengawa dagang bisi bekaul enggau Taib Mahmud di Sarawak enggau projek 1MDB ti datai ari buah runding Najib Razak.
Jho Low endang tebilang enggau ulah iya ti bebelanja sepeneka ati nitihka pengaya iya, ti ditemu nyadung Crustal Champagne lebu maya berami ba kelab-kelab malam tebilang di dunya begulai enggau sekeda orang indu ti tebilang bala sida Paris Hilton enggau bintang ari menua Taiwan, Elva Hsiao.
Jho Low udah bisi enggau orang ngelancharka wayang, begambar sama-sama enggau Riza Aziz enggau bakih iya Joey Mcfarland, ba atas panggau, ti endur gambar sida tiga nya disadang nusui kaul sida dalam pengawa ngeluarka wayang nya.
Berita ari Hollywood pasa pemujur Red Granite Pictures ti jampat ngelekai kenyau ari taun 2010 ti nyadika “kompeni tebilang dipeda” dalam timpuh tiga taun nya nyebut Riza Aziz nya ‘anak Menteri Besai Malaysia’.
Bala pengarang berita Hollywood ngenang pasal pengawa ngelancharka wayang ti dikeluarka Red Granite Pictures di Cannes nya nyadika “sebengkah pengawa ti balat ngerinduka ati” ke taun nya, madahka Wolf of Wall Street nya beungkus $100 juta.
Sarawak Report madahka komen ari anak tiri Najib nya duit iya nya mega duit sida sebilik, lalu iya betanggungpengawa ngagai ‘apai iya’ Menteri Besai, ti udah meri iya ‘pemendar’ nya.
Enti menua Malaysia ngemendarka suratberita tau nusui sepeneka ati pasal sebarang berita, sida udah chukup ngasuh mayuh macham jaku tanya baka ni anak Rosmah Mansor mujur bulih beratus-ratus juta dikena melanja wayang-wayang ari Hollywood nya?
Kebuah pia, laban enti duit nya datai ari Najib, baka ni pemudah Menteri Besai nya tau nyadi kelalu kaya?
Jaku tanya tu tentu enda ngelantangka ati tuai BN Malaysia, ti diatu benung dibelit skandal nyambut duit suap ba pengawa meli kapal selam Scorpene ti deka dipechara ba kot di menua Peranchis ke bayar €119 juta ngagai sebuah kompeni Malaysia ti dipejalaika bakih iya, Razak Baginda.
Baka ni pemudah Riza Aziz nya bulih untung ke diri empu?
Sarawak Report bisi udah bulih penerang pasal pengawa Riza Aziz udah bekau iya ti nembuka pelajar iya ba London School of Economics dalam taun 2000 suba. Iya lalu bekereja nyadi penyanding penemu ba pengatur pengawa dalam KPMG dalam pengelama dua taun nyentuk ngagai taun 2002 dan udah nya iya bekereja enggau HSBC London ari taun 2005 nyentuk ngagai maya bank nya dituntung pengerugi dalam taun 2008.
Nitihka Opis Finacial Services, Riza Aziz kala diambi bekereja dalam HSBC dalam pengelama lima taun tang iya ukai ukai mangku pengawa ti tinggi, taja pan iya iya madahka diri ngetu bekereja dia dalam taun 2008. CV pengawa iya manah bendar dibacha tang ke siku lelaki ti nadai ngewaris duit ari apai indai iya, pengawa iya nadai nerangka penatai pengeraja iya. Enggau chara ti enda tentu ditemu, nembiak ari menua Malaysia tu diatu udah ngelaluka mayuh jaku komen laban iya udah meli sebuah rumah besai ba tengah nengeri New York, 7 bilik tinduk ba rega $33.5 juta.
Suratberita pemerindang LA Times nandu cherita ti madahka projek ngeluarka wayang Red Granite nya enda dikerinduka sekeda studio laban sida nya ngumbai pengawa nya tau ngerusak dagang sida empu.
Rayat Malaysia patuit nemu anak tiri Menteri Besai nya bulih akses ngagai wang turu menua Malaysia ti mayuh dikena iya napi penanggul dagang ti besai. Bisi berita angin di menua KL madahka sekeda kompeni ari menua Malaysia nya entara kompeni-kompeni ti diperansang beranakka puku dalam wayang Wolf of Wall Street.
Bisi tau nadai Jho Low melanja projek ngeluarka wayang tu?
Jho Low endang ditemu rinduka wayang lalu bisi kaul enggau pengelulu wayang Leonardo di Caprio ti endang udah bekelala enggau pangan diri dulu ari penumbuh Red ranite Pictures.
Enti berita nya amat iya udah muka tinjau baru ba kaul Jho Low enggau PM Najib Razak ba projek 1MDB sida, iya nya sebengkah projek bank pemansang ti udah mai penguntung bebilion-bilion ringgit rega bon ti enda diterangka ngagai mensia mayuh, sekeda ari sida nya, Goldman Sachs.
Beranakka puku dalam 1MDB nya nyau nyadi jaku tanya, numpuka tinjau sida ba pengawa meli kompeni kuasa elektrik ti udah lama sereta luya, ti benung napi jaku tanya ba pasal rega dalam pengawa ngemansangka menua-menua di Malaysia.
Siti ari kompeni ti bisi kaul enggau 1MDB nya kompeni ti seruran dipeda ngemaruhka diri ari Timur Tengah, Petro-Saudi ti meli syer lebuh sida Taib sebilik nyual syer sida dalam UBG Bank ba taun 2011 suba.
Nyerumba nya, sebuah kompeni wayang di Hollywood, Motion Pictures Corporation of America (MPCA), diatu benung nyaman Red Granite Pictures ketegal sida udah ngelanggar sempekat bekaul enggau pengawa meli sebuah wayang ‘ti dituntung penanggul’, iya nya sebuah wayang jenaka ti tebilang dalam taub 1990, Dumb and Dumber. Ba sebengkah penerang dalam kot, bala pengeluar wayang Steve Stabler enggau Brad Krevoy ti bempu kompeni MCPA madahka Riza enggau Mcfarland udah ngenchuri buah runding asal sida.
Jaku tuduh nya tau ngeringka agi gaya kaul enggau Jho Low. Bala rayat Malaysia deka nemu pasal pengerami-pengerami ti diulu Jho Low lalu mega kaul iya enggau Riza, nitihka isi dalam surat penerang dalam kot nya.
Enda semua orang ulih ngambarka wayang nya nyadika ajar manah ulah baka ti diasuh Rosmah Mansor.
Orang mayuh deka meda baka ni pengelulu Leonardo di Caprio ngulihka bejuta-juta dollar ba pengawa makai suap enggau pengawa jai ti bukai.
Wayang gambar baka tu nadai mai reti ba Hari Krismas. Wayang tu semina tau ngerusak runding bala orang ti meda iya.
Ngena duit ti kamah melanja wayang sida ke terubah nya, perintah BN enggau mega Rosmah Mansor ti seruran besai bebelanja nya dipeda ngayanka ulah diri nengah wayang nya.