Beberapa taun ke udah sida Taib sebilik bisi ditemu bebendar nguji ngelamun pun penatai belanja ke puku dagang bejuta-juta dollar sida di menua baka Kanada, Amerika enggau UK.
Taja pan baka nya, diatu kami ulih mansutka sebengkah penerang ari arkib ti baru, ti diserungkai raban NGO Switzerland, Bruno Manser Fund (BMF), ti ngemendarka Jamilah Taib ngaku maya ti berandau dalam media ti madahka dalam taun 1989 bala orang ti beranakka puku dagang dalam kompeni Sakto nya ari bala orang ‘Pelilih Pasifik’ nyengkaum Malaysia.
Jamilah mega mansutka penerang baka ni ‘Pengerusi’ nya datai ari menua Malaysia dua kali setaun ngulu mayuh bengkah aum.
Jaku ambu ti tumu tu terang bendar enda besenutuk enggau jaku ambu laki Jamilah (Sean Hisham Murray) ti madahka kompeni Sakto ditumbuhka sida Murray sebilik, ti nadai sebarang kaul enggau duit ari Taib Mahmud.
Tang jaku ambu nya udah diayanka dalam mayuh bengkah laman web, ti udah nya diturunka udah bekau sida Murray sebilik ditusui media UK ketegal bisi ngupah kompeni PR dikena nyerang laman Sarawak Report ba laman Wikipedia.
Petunggal Sean, Christopher Murray, siku pengurus dalam kompeni Ridgeford Properties di London mega nandu jaku ambu nya ba randau iya enggau Sarawak Report dalam taun 2010.
Tang, surat-surat penerang pasal penumbuh kompeni di Kanada nya terang bendar nunjukka Sakto udah ditumbuhka menyadi iya empu, Onn Mahmud, ti mega nyadika pengari dagang iya dalam taun 1983, sama enggau bala anak iya, Jamilah enggau Abu Bekir, ti benung besekula di Kanada maya nya.
Dalam bulan Tiga 2011 suba Taib empu bisi ngaku madahka sida Murray sebilik enggau bala lawyer sida udah bebulaka jaku timbal sida, lebuh iya berandau ti endur iya madahka iya kala meri “sepenyampau duit” ngagai Jamilah dikena numbuhka kompeni Sakto lebuh iya agi benung besekula di Kanada.
Tang diatu BMF udah bisi bulih arkib penerang ti nunjukka ba taun 1989 suba Jamilah nemu pasal pejalai dagang kompeni nya. Ba renggat nya iya baru nirika rumahtangga enggau Sean Murray lalu iya mega nyadika pengari kompeni Sakto.
Kena 17 haribulan Satu 1989 lebuh berandau enggau suratberita The Ottawa Citizen, iya bisi meri beberapa iti penerang pasal kompeni nya, nyengkaum Pengerusi ti datai ari Malaysia dua kali setaun laban deka meresa sereta ngabas pengawa dagang dalam kompeni nya.
Cherita nya terang bendar nunjukka sapa ti nguasa pejalai kompeni Sakto – lalu iya nya ukai Jamilah tauka Sean Murray. “Penguasa” kompeni nya siku orang dagang ari ‘Pelilih Pasifik’, lebih agi ari menua Australia, Hong Kong enggau Malaysia lalu cherita nya mega madahka Jamilah, lebuh nya baru beumur 29 taun, siku orang ti tau “dikarapka”.
Cherita ti dikarang pengarang berita nya madahka Sakto nya sebuah kompeni dagang menua luar pemadu besai puku ti didudukka di pelilih Ottawa maya nya. Pengarang berita nya madahka timpai bala orang ti beranakka puku ari menua luar dalam kompeni nya udah milih sebuah menua endur sida beranakka puku.
Sekali ke ‘Pengerusi’ Sakto ari menua Malaysia nya ngena atur milih lalu maduka ‘orang ti tau dikarapka’ ba anak iya empu? Enti saut nya ya, sekali ke ketegal nya endur Jamilah dipaduka laban iya endang siku ari sida sebilik ti tau dikarapka?
[Bacha berita dalam The Ottawa Citizen ti ditulis kena 17 haribulan Satu 1989]
Tu ukai ke teruba iya endur jamilah Taib tama ngagai media menua Ottawa. Nyadika siku ari orang indu pemadu kaya di menua nya lalu mega nyadi presiden ke mayuh bengkah kompeni reta tengkira pemadu besai Jamilah udah bulih endur iya dalam berita media menua nya.
Ambi ke banding, ba sebengkah cherita dalam The Ottawa Citizen kena 29 haribulan Duabelas 2001 suba, Jamilah Taib ti pemadu kaya nya digambarka nyadi teladan orang kaya begari.
Cherita nya bisi nyebut Jamilah pulai ke Malaysia laban deka mutarka pengawa dagang sida sebilik!
Penerang ari Taib tau bendar ngasuh tesat runding lebuh iya madahka sida sebilik nadai bedagang di menua Sarawak lalu Jamilah aja ti bisi bedagang nengah 84 buah kompeni sida di menua nya.
Engka iya kelalu gagau bebelika barang ti endur iya enda ingat ke pengawa dagang iya, tang kami deka nuduhka penemu kami madahka semua pengawa dagang sida nya endang dikuasa apai iya Taib Mahmud lalu kepala pion sida nya laki iya empu Sean Murray.
Nangkanka tu kami deka mantaika mayuh agi repot ari arkib Ottawa – teruska macha berita ari Sarawak Report tu.