Lebuh Taib Mahmud bejakuka pasal pinchin iya beberapa taun ke udah iya bis nyebut ba orang mayuh, ku iya, “enti aku pinchin ila, aku deka bedagang”.
Orang mayuh ti ningaka jaku iya maya nya suba bisi berunding, “nama pengawa udah dikereja iya dalam pengelama 40 taun ke udah?”
Agi mega dalam pengelama 40 taun nya Taib udah salahguna ke penuduk iya dikena iya ngerusak rampa kampong ti besai bendar, ngemendarka pengawa muka ladang sawit enggau berampaska tanah perintah ti besai bendar rampa lalu ngemasukka reta menua nyadi dagang bekorporat.
Iya mega udah chakah bendar meri kontrak-kontrak ti besai-besai ngegai kompeni iya empu.
Nya alai, baru diatu kitai nemu iya baru deka berengkah bedagang?
Terang bendar Taib diatu benung kena rampit sebengkah penyakit ‘Wealthmanquesomethingitis’ (iya nya sebengkah penyakit ti ngujungka orang ti kena rampit nya udah bulih pengaya, tang enda numbas ba iya, lalu nyadang mayuh agi pengaya deka datai nyadika penawar iya) lalu diatu iya nyadi Gabenor, penyakit iya dipeda majak ngansak ngagai ikas ti ke penudi.
Udah bekau iya pindah masuk ngagai rumah Astana iya mengkang bejalaika atur ngerampas semua macham peluang, baka ti direpotka ngena jaku ti manah-manah dalam media Malaysia ti dikuasa enggau terit.
Iya mega bisi kala didinga bejaku madahka langgur deka neruska pengawa ngaga tekat ai, ambi ke banding, ngaga 5 buah agi tekat dalam kandang 12 bulan tu – ti endur pansik empas projek ba rampa menua udah enda dikibuhka.
Enggau mayuh agi jaku gerah bukai ti bekaul enggau SCORE lalu ke semua nya nguntungka kompeni-kompeni iya empu enggau sida sebilik.
Lalu diatu Taib dipeda ngelanggur deka ngerebut pegai iya ba dagang ngaga perengka pemadah tama ngagai kuchik iya enggau CMS diasuh iya ngerebut kompeni telekomunikasyen SACOFA.
Anang enda ingat ke Sarawak cable ti enggi anak iya, Mahmud Abu Bekir, udah nguasa semua kontrak masang perengka kuasa karan di menua Sarawak.
Suratberita The Star, ti mantaika cherita pengawa nyual SACOFA udah bebendar amat nempa cherita nerangka baka ni CMS “bisi bagi dalam semua pengawa di menua nya” lalu baka ni kompeni nya udah “netapka diri nyadika proksi penumbuh ekonomi di Sarawak”.
Nya nyadika sebengkah chara dikena nunjukka baka ni Taib udah nentuka sebarang pengawa dagang ti disukung menua iya empu nya patut diberika ngagai kompeni-kompeni sida sebilik.
Tang dini endur jaku tanya pasal pengawa ngambi alih kompeni nya baka ti dilanggurka? Baka ni pematut CMS tau numpuka perati sida ngagai kompeni ti kaya tu lalu ngatur singkang sida ngulihka kompeni nya?
Lalu baka ni pematut pengawa nyual tu ‘dipejuraika’ semina enggau CMS lalu nadai disaraka dulu?
Pemutus penemu ti deka nyual kompeni tu ending ba pemegai syer pemadu mayuh, iya Sekretari Menua Sarawak Morshidi Abdul Ghani, ti megai 70% ari semua syer sida dia. Tang, dini endur sistem tender tebuka, lalu nama kebuah semina orang tu aja ti bejurai enggau CMS, lalu ukai enggau kompeni ti bukai?
Tang, nama kebuah atur pengawa ngubah ikas kompeni dagang ti besai nya, ti ditemu ulih ngerembai ti udah diperambuka perintah besai nya enda dibuka ngambika tau diperebutka kompeni-kompeni bukai, sebaka enggau atur di menua-menua UK enggau di menua bukai?
Taib Mahmud ending lama udah ngelala Sekretari Menua Sarawak, Morshidi Abdul Ghani, munyi ti kala dituliska kami dulu ari tu.
Baka bala pemesai perintah ti bukai ti udah dipaduka menagku pengawa dalam pengelama lebih kurang tiga puluh taun, Morshidi, udah ngumbai Taib Mahmud nya bos iya, lalu ukai orang selama.
Agi mega, sida Morshidi sebilik ending lama udah bulih penguntung ari pemeri Taib baka ba tanah menua ti berega murah ngagai bala kroni iya nengah konsesyen enggau lisin kebun dandang besai ti manggai 14,000 hektar pemesai.
Enggau nya, Kepala Menteri ti udah badu bekereja nya mengkang ngumbai Morshidi tu deka nyain ngelepaska siti ari pengawa dagang ti berega bendar di menua Sarawak nya ngagai sida Taib sebilik enggau nadai mayuh talat.
Pengarang berita dalam The Star udah ngaga simpul iya ti madahka jurai jaku tu udah tembu. Tambah mega CEO CMS Richard Curtis bebansa British nya udah lama bendar chakah dalam beberapa bulan tu laban ngulihka syer ti besai-besai dalam tiap iti kontrak ti dipejalaika dalam pelilih SCORE ke bos iya.
Tang kami deka nuduhka penemu kami nya tu mih maya endur ngatur ubah.
Taib nya ukai bos iya agi, taja pan iya ulih ngumbai adi ipar iya nya nyadika anak patung ti nganti penuduk iya.
Ke bendar iya, Abdul Taib Mahmud nya ukai agi nyadika ATM Sarawak lalu iya mega ukai agi nyadi bos ke Sekretari Perintah Menua.
Sain tauka chap jari Taib nya enda agi diguna lalu iya enda ulih ngemaduka sebarang sapa ari pengawa sida nitihka peneka ati iya.
Deka tauka enggai Perintah Besai ngulurka agih belanja RM1.5 billion ti ending udah ditagaka dalam bajet 2014 dikena nirika tiang kuasa telekomunikesyen di Sarawak tama ngagai kuchik kompeni iya baru?
Enti Adenan Satem nya siku tuai menua ti terit ba atur iya, betanggungpengawa enggau bekuasa penuh lalu ngarika ubah ti tulin, tu mih maya endur iya ngepunka singkang iya ti terubah. Sebengkah proses tender tebuka patut diatur dikena nyual syer SACOFA lalu awakka iya tau nyadika stindit ba maya ti dudi ila.